«28 ناۋرىز كۇنى ساعات 17:30-دا رەسپۋبليكالىق جەدەل-قۇتقارۋ جاساعىنىڭ كەزەكشى-ديسپەتچەرلىك بولىمىنە دەرەۆياننوە كولىندە قايعىلى وقيعا ورىن العانى تۋرالى حابارلاما ءتۇستى. 1973 جانە 1969 جىلى تۋعان ەكى بالىقشى ۇرلەمەلى رەزەڭكە قايىقپەن بالىق اۋلاۋ كەزىندە قايىق كەنەتتەن اۋدارىلىپ, ادامدار سۋعا باتىپ كەتكەن. كۋاگەرلەر ءبىر ەر ادامنىڭ دەنەسىن سۋدان بىردەن شىعارىپ العان», دەلىنگەن حابارلامادا.
رەسپۋبليكالىق جەدەل-قۇتقارۋ جاساعىنىڭ جەدەل توبى وقيعا ورنىنا شىققان.
«ىزدەستىرۋ-قۇتقارۋ شارالارىن جۇرگىزۋ بارىسىندا ساعات تۇنگى 00.00-دە قۇتقارۋشى-سۇڭگۋىرلەر ەكىنشى ەر ادامنىڭ دەنەسىن تاۋىپ, سۋدان شىعاردى. قۇتقارۋشىلار قايىقپەن بالىق اۋلاۋ كەزىندە ساق بولۋدى, قۇتقارۋ كەۋدەشەسىن مىندەتتى تۇردە كيۋ قاجەتتىگىن ەسكەرتەدى. توتەنشە جاعداي تۋىنداعان كەزدە 112 نومىرىنە قوڭىراۋ شالۋ قاجەت», دەدى رجقج ءباسپاسوز قىزمەتىنەن.
