«حالىق ۇنىنە قۇلاق اساتىن مەملەكەت» تۇجىرىمداماسىنىڭ كوزدەگەنى دە سول ەمەس پە؟! اسىرەسە اۋىلداعى اعايىننىڭ ماسەلەسى بيىك مىنبەردە كوتەرىلگەنى قاجەت-اق. بۇل رەتتە, ەل پرەزيدەنتى اۋىلداردى جاڭعىرتۋ جۇمىستارى قالدىق قاراجاتپەن اتقارىلاتىنىن العا تارتىپ, ەلدى مەكەندەردى كوركەيتۋدى مىقتاپ قولعا الۋ كەرەك ەكەنىن ايتتى.
ماڭىزدى مىندەت ەڭ اۋەلى جاڭا سايلاۋ جۇيەسى ارقىلى ىرىكتەلگەن اۋىل اكىمدەرىنە جۇكتەلەتىنى ءسوزسىز. شىنى كەرەك, قازىر بۇرىنعىداي اۋدان بيۋدجەتىنە الاقان جايىپ وتىراتىن كەز ەمەس. ءتورتىنشى دەڭگەيلى بيۋدجەتتىڭ قارجىسىن دۇرىس يگەرىپ, ۋادە ەتىلگەن شارۋانى ساپالى تىندىرۋعا مۇمكىندىك بار. بۇعان دەيىن اۋىلدى جانداندىرۋعا باعىتتالعان جوبالار تاسادا قالىپ قوياتىن. سەبەبى «جارىق, جول ماسەلەسىن شەشۋ كەرەك ەدى», دەپ تەك اۋىزشا عانا ايتىلىپ ءجۇردى. قازىر اۋىلدىق بيۋدجەت ەسەبىنەن جوبالاردىڭ ءتيىستى قۇجاتتارىن ازىرلەۋگە جول اشىلدى. سايكەسىنشە, اۋداندىق بيۋدجەتتەن قارجىلاندىرۋ مۇمكىندىگى زور. قىسقاسى, اۋىل اكىمى ىسكەر بولسا, بيۋدجەت مولايىپ, سايكەسىنشە ۇلكەن شارۋا تىندىرىلاتىنى انىق.
اكىم سايلاۋى دەمەكشى, مەملەكەت باسشىسى ءوز جولداۋىندا پروپورتسيونالدى-ماجوريتارلى سايلاۋ جۇيەسىنە كوشۋدى ۇسىندى. جاڭاشىلدىق بارلىق ازاماتتىڭ قۇقىعىن ەسكەرۋگە مۇمكىندىك بەرمەك. ايتپەسە, سوڭعى ۋاقىتتا تۇرعىندار سايلاۋعا ءاتۇستى قاراپ, قوعامدا «مەنىڭ داۋىسىم نە شەشەر دەيسىڭ» دەگەن تۇسىنىك قالىپتاسقانى بەلگىلى. مۇنى ەل پرەزيدەنتى دە اتاپ ءوتتى. سايلاۋ جۇيەسىن جاڭعىرتۋ ارقىلى ازاماتتاردىڭ بەلسەندىلىگىن ارتتىرىپ, بيلىككە دەگەن سەنىمدى بەكىتۋگە جول اشىلاتىنى ءسوزسىز.
سانيرا ءجۇسىپوۆا,
Amanat پارتياسى پاۆلودار وبلىستىق فيليالى جانىنداعى
Jas Otan جاستار قاناتىنىڭ توراعاسى
