اتاپ ايتقاندا, مەملەكەت باسشىسى قاسىم-جومارت توقاەۆ جاڭا قازاقستاندى قالىپتاستىرۋعا باعىتتالعان بىرقاتار ماڭىزدى ساياسي رەفورمالاردى ۇسىندى.
Amanat پارتياسىنان ءماجىلىس دەپۋتاتتارى, سونداي-اق وبلىستىق جانە قالالىق دەڭگەيدەگى ءماسليحاتتاردىڭ 500-دەن استام دەپۋتاتى قاتىسقان جاس دەپۋتاتتار كورپۋسىنىڭ وتىرىسىندا ەلىمىزدىڭ قوعامدىق-ساياسي ومىرىندەگى الداعى ترانسفورماتسياداعى جاستاردىڭ ءرولى قانداي ەكەندىگى انىقتالدى.
تالقىلاۋعا قاتىسقان ءماجىلىس دەپۋتاتى گەننادي شيپوۆسكيح: «بۇگىن ەل دامۋىنىڭ ساياسي مودەلى قايتا قارالدى. ولاردىڭ ىشىندە قوعامدى دەموكراتيالاندىرۋعا باعىتتالعان پرەزيدەنتتىڭ قۇزىرەتىن شەكتەۋ, زاڭ قابىلداۋعا قاتىستى پارلامەنت ءماجىلىسىنىڭ, جەرگىلىكتى اكىمدەردى تاعايىنداۋعا بايلانىستى ءماسليحاتتاردىڭ ءرولىن كۇشەيتۋ ماسەلەسى بار», دەدى ول.
Jas Otan جاستار قاناتىنىڭ توراعاسى نۇرجان جەتپىسباەۆ پرەزيدەنت ايتقان باستامالاردا جاستاردى قولداۋدىڭ ناقتى تەتىكتەرى ايقىندالعانىن ايتتى: «پارتيانىڭ جاستار قاناتى رەتىندە جاستاردىڭ ازاماتتىق بەلسەندىلىگىن ارتتىرۋ ءبىزدىڭ الدىڭعى قاتارلى جوسپارلارىمىزدىڭ ءبىرى. سوندىقتان بۇگىن مەملەكەت باسشىسى اتاپ وتكەن مەملەكەتتىك ەمەس سەكتور وكىلدەرىن, ازاماتتاردى, بەلسەندىلەردى مەملەكەتتى باسقارۋ ىسىنە ارالاستىرۋ, سول ماقساتتا ۇلتتىق قوعامدىق سەنىم كەڭەسىنىڭ ورنىنا ۇلتتىق قۇرىلتاي قۇرۋ ورىندى جانە ونىڭ قۇرامىندا جاستار دا بولادى دەپ سەنەمىز. تيىسىنشە, بۇعان جاستاردىڭ اتسالىسۋىن قامتاماسىز ەتەتىن بولامىز. سونىمەن قاتار جاستار قاناتىنىڭ «قايسار», «ورلەۋ», «پارتيالىق كونتەنت-فابريكا», «كەڭەس ورتالىعى» جانە ء«ساتتى قادام» سىندى جوبالارىن ىسكە اسىرۋ ارقىلى مەملەكەت باسشىسىنىڭ تاپسىرماسىن ورىنداۋ بويىنشا جۇمىستار جۇرگىزىلۋدە».
سونداي-اق كەزدەسۋگە قاتىسۋشىلار جاڭا وبلىستاردىڭ قۇرىلۋى جاستارعا وڭ ىقپالىن بەرەدى دەگەن پىكىرلەرىن ءبىلدىردى. «بۇگىن شىعىسىمىزدا اباي وبلىسىنىڭ, ورتالىقتا ۇلىتاۋ وبلىسىنىڭ جانە جەتىسۋ وبلىستارىن قۇرۋ ارقىلى ءبىرىنشى جاعىنان تاريحىمىزدى جاڭعىرتساق, ەكىنشى جاعىنان ەلىمىزدەگى اۋماعى جاعىنان ءىرى اكىمشىلىك بولىنىستەردى باسقارۋدى ۇيىمداستىرۋعا ىڭعايلى بولماق. سەبەبى الماتى, قاراعاندى, شىعىس قازاقستان وبلىستارى كولەمى عانا ەمەس, جاستاردىڭ شوعىرلانۋى جاعىنان دا كوشباسشى ايماقتار. وسى ورايدا اتالعان ايماقتاردى ءبولۋ جاستارمەن ناقتى جۇمىس ىستەۋ مەحانيزمىن ۇيىمداستىرۋعا ىقپال ەتەدى. تيىسىنشە جاڭا جۇمىس ورىندارى اشىلىپ, جاستاردىڭ ساياسي-مادەني, تۇلعالىق دامۋىنا جاڭا ينفراقۇرىلىمدار پايدا بولىپ, وسىعان دەيىن وبلىس ورتالىقتارىنان الىس ورنالاسقان اۋىلدارداعى جاستارىمىزدىڭ الەۋمەتتەنۋىنە جاقسى مۇمكىندىك تۋىنداماق», دەدى «جاستار» عىلىمي-زەرتتەۋ ورتالىعى ديرەكتورىنىڭ ورىنباسارى, پرەزيدەنتتىك كادرلىق رەزەرۆ مۇشەسى ەلينا پاۋلي.
