مەزگىل موزايكاسىن قۇراۋ ءۇشىن, ءار كۇننىڭ اۋەنىنە بوي جىلىتۋ قاجەت. سانادان وتكەن ساۋلە كەلەسى جۇرەكتىڭ قۇلپىن اشۋ ءۇشىن كومپوزيتسيانى ىستىق ماحابباتپەن جازۋعا ءتيىسسىز. ايتپەسە اسەرى ۇزاققا بارمايدى. بۇل سەنىڭ جەكە شىعارماشىلىق قۋاتىڭا تىكەلەي بايلانىستى. قازاقستاندىق سۋرەتشى ۆلاديمير كولودەنكونىڭ «قىس. شاڭعىشىلار» كارتيناسى وسى ءۇردىستى ەسكە تۇسىرەدى.
سۋرەتكەردىڭ شىعارماشىلىق لابوراتورياسى ۇلتتىق بەينەلەۋ ونەرى الاڭىندا ەرەكشە ورىنعا يە. ونىڭ پەيزاجدارى مەن ناتيۋرمورتتارى كوپجىلدىق تەاترداعى قىزمەتىمەن بايلانىستى. بۇل – ءتىرى الەمنىڭ شىندىعىنان, مۋزىكالىق اسەرلەردەن, تەاتر قويىلىمدارىنىڭ سۇلۋلىعىنان تۋىنداعان سۋرەتشى فانتازياسى.
اۆتور ۇنەمى سۋرەتتەر مەن نوبايلار سالا ءجۇرىپ, تابيعات ورتاسىندا جۇمىس ىستەدى. ءومىردىڭ بارلىق قىرىن بارىنشا ءدال بەرۋگە ۇمتىلدى. قىلقالامىن تابيعات بوياۋلارىنا مالدى.
باقساڭىز «قىس. شاڭعىشىلار» كارتيناسىندا شاڭعىشىلاردىڭ قىسقى ساياباقتاعى سەرۋەنىن بەينەلەگەن. ءبىرىنشى پلانداعى جايقالعان بيىك اعاشتار كەنەپتىڭ بەتىن تۇتاستاي الىپ جاتىر. بۇتاق شىلتەرلەرى اراسىنان تۇنەرگەن بۇلتتى اسپان مەن قالىڭ توعاي سىعالايدى.
كارتينا سپەكتاكلدىڭ دەكوراتسياسىن ەسكە سالادى. بۇل ونىڭ اباي اتىنداعى ماوبت-دا ستسەنوگراف بولىپ جۇمىس ىستەگەنىن ەسكە تۇسىرەدى. سۋرەتشى ءوز تۋىندىسىندا كورەرمەندەردىڭ سەزىمىن باسقارۋ ءۇشىن مىقتى تەتىك بولاتىن ساندىلىك, ىرعاق, قاراما-قايشىلىق سىندى كوركەمدىك بەينەلەۋ امالدارىن پايدالانادى.
قوشقىل ءتۇستى ء«بيشى» اعاشتاردىڭ قاسىندا شاڭعىشىلاردىڭ فيگۋرالارى كىشكەنتاي, اشىق تاڭبا بولىپ كورىنەدى. بۇل تابيعاتتىڭ ايبىندىلىعىن سەزدىرەدى, ال شاڭعىشىلاردىڭ كىشكەنتاي فيگۋرالارى كورەرمەندەردىڭ نازارىن وزىنە تارتىپ, ولاردىڭ قىسقى ورمانعا جاساعان سەرۋەنىن باقىلاتادى.
