ەلەكتروندىق ۇكىمەتتىڭ ينفوكوممۋنيكاتسيالىق ينفراقۇرىلىمىنا جاۋاپتى «ۇلتتىق اقپاراتتىق تەحنولوگيالار» اق ەكەنى بەلگىلى. وسى ۇلتتىق وپەراتوردىڭ قوعاممەن بايلانىس باسقارماسى تاراتقان مالىمەتكە سۇيەنسەك, eGov mobile قوسىمشاسىندا قازىردىڭ وزىندە 400-گە جۋىق مەملەكەتتىك ونلاين قىزمەت پەن سەرۆيس بار. ەندى 2022 جىلدىڭ سوڭىنا دەيىن ونلاين الۋعا بولاتىن مەملەكەتتىك قىزمەت كولەمىن 80%-عا جەتكىزۋ جوسپارلانىپ وتىر.
ال ديزاينى وزگەرگەن ءموبيلدى قوسىمشانىڭ جاڭارتىلعان نۇسقاسى ينتەرنەتسىز-اق جۇمىس ىستەي بەرەدى. ول ءۇشىن الدىمەن «تسيفرلىق قۇجاتتار» سەرۆيسىنە ەتسق كىلتى ارقىلى تىركەلۋدەن ءوتۋ كەرەك.
«بۇگىندە eGov mobile موبيلدىك قوسىمشاسىنداعى «تسيفرلىق قۇجاتتار» سەرۆيسى 18 قۇجاتتان تۇرادى. اتاپ ايتقاندا, جەكە كۋالىك, جۇرگىزۋشى كۋالىگى, ۆاكتسينالاۋ پاسپورتى, پتر تەست جانە تۋ تۋرالى كۋالىك جانە ت.ب. ىسكە قوسىلعان ساتتەن باستاپ تەك «تسيفرلىق قۇجاتتار» سەرۆيسى 47 ملن-نان استام رەت پايدالانىلدى. قازىرگى ينتەرفەيس بۇرىنعىدان دا ىڭعايلى. ازاماتتار قاجەتتى مەملەكەتتىك قىزمەتتى ينتەرنەت ۇستامايتىن جەردە دە قولدانا الادى», دەيدى «ۇلتتىق اقپاراتتىق تەحنولوگيالار» اق باسقارما توراعاسى روستيسلاۆ كونياشكين.
قوسىمشانىڭ جاڭا نۇسقاسىنا eGov.kz پورتالىنىڭ 20-دان استام مەملەكەتتىك قىزمەتى ەنگىزىلدى. سونىڭ ىشىندە قازاقستان اۋماعىنداعى جىلجىمايتىن مۇلىك وبەكتىلەرىنىڭ مەكەنجايىن ايقىنداۋ بويىنشا انىقتاما بەرۋ, قورعانشىلىق جانە قامقورشىلىق جونىندە انىقتامالار, ۇوس قاتىسۋشىسى كۋالىگى, تاعى باسقا دا قۇجاتتاردى تسيفرلىق نۇسقادا الۋعا بولادى.
جاڭارتىلعان نۇسقاعا «ومىرلىك جاعدايلار» اتتى جاڭا ءبولىمى قوسىلدى. وندا بەلگىلى ءبىر تاقىرىپ بويىنشا پايدالى اقپاراتتار جيناقتالعان. بۇل سەرۆيس مەملەكەتتىك قىزمەتتەردى الۋعا ءوتىنىم بەرۋ جانە اقپاراتتى ىزدەۋ ءۇشىن ۋاقىتتى ۇنەمدەۋگە مۇمكىندىك بەرەدى.
سونداي-اق جۇرتشىلىق تاپسىرىس بەرگەن تسيفرلىق قۇجاتتا قانداي دا ءبىر قاتە مالىمەتتەر انىقتالسا, ول تۋرالى ءتيىستى مەكەمەنى حاباردار ەتە الادى. وسىعان ارنالعان «قاتە تۋرالى حابارلاۋ» باتىرماسى ىسكە قوسىلدى. ءوتىنىش بەرۋ تەتىگى e-Otinish ارقىلى مەملەكەتتىك ورگانعا جولدانادى.
«بيىل «ۇات» اق مەملەكەت باسشىسىنىڭ قۇجاتتار اينالىمىنداعى قاعازباستىلىقتى ازايتۋ تاپسىرماسى شەڭبەرىندە «تسيفرلىق مالىمەتتەر» سەرۆيسىن ىسكە قوسۋدى جوسپارلاپ وتىر. وندا ازاماتتار انىقتامالاردى نەعۇرلىم ىڭعايلى ءارى جىلدام تاسىلمەن الا الادى. قۇجاتتاردى ءتيىستى جەرگە ەلەكتروندىق پوشتا, مەسسەندجەر نەمەسە QR كود ارقىلى جىبەرە الادى. ءبىر سوزبەن ايتقاندا, انىقتامالاردى قاعاز تۇرىندە باسىپ شىعارۋدىڭ قاجەتتىلىگى بولمايدى», دەدى ر.كونياشكين.
Egov mobile موبيلدىك قوسىمشاسىنىڭ جاڭا نۇسقاسىن App Store پلاتفورماسىندا جانە Play Market پەن App Gallery ارقىلى جۇكتەپ الۋعا بولاتىنىن ەستەرىڭىزگە سالامىز.
