ۇلتتىق ەكونوميكا ءمينيسترى الىبەك قۋانتىروۆ اتاپ وتكەندەي, مەملەكەت باسشىسى ۇسىنعان باستامالار ەلىمىزدە جاڭا ساياسي مادەنيەتتى قالىپتاستىرۋعا باعىتتالعان رەفورمالاردىڭ مۇقيات زەردەلەنگەن باعدارلاماسى بولىپ تابىلادى. اتاپ ايتقاندا, ەلىمىزدىڭ كونستيتۋتسياسىنا 30-دان استام وزگەرىستەر مەن تولىقتىرۋلار ەنگىزىلەدى, سونداي-اق جىل سوڭىنا دەيىن 20-دان استام زاڭ قابىلدانادى.
جولداۋدى ىسكە اسىرۋ جونىندەگى جالپىۇلتتىق ءىس-شارالار جوسپارىنىڭ جوباسى ازىرلەندى. مەملەكەت باسشىسىنىڭ تاپسىرمالارىن ىسكە اسىرۋ ماقساتىندا ۇلتتىق ەكونوميكا مينيسترلىگى نەگىزگى 3 باعىت بويىنشا جۇمىس جۇرگىزەدى. 1.ەلدىڭ اكىمشىلىك-اۋماقتىق قۇرىلىمىن جەتىلدىرۋ; 2.جەرگىلىكتى ءوزىن ءوزى باسقارۋدى ورتالىقسىزداندىرۋ; 3.داعدارىسقا قارسى كەزەك كۇتتىرمەيتىن شارالار.
مينيسترلىك باسشىسىنىڭ ايتۋىنشا, اباي, جەتىسۋ جانە ۇلىتاۋ وبلىستارىن قۇرۋ جانە حالىقتىڭ پىكىرىن ەسكەرە وتىرىپ, قاپشاعاي قالاسىن قايتا اتاۋ ماسەلەسى پىسىقتالۋدا. «مەملەكەت باسشىسىنىڭ جارلىعىن دايىنداۋ جونىندەگى جول كارتاسى جانە ونى ىسكە اسىرۋ جونىندەگى ۇيىمداستىرۋ شارالارىنىڭ جوسپارى ازىرلەنەتىن بولادى», دەدى ءا.قۋانتىروۆ.
بۇل قۇجاتتاردا اكىمشىلىك-اۋماقتىق قايتا قۇرۋلارعا بايلانىستى مىناداي ءىس-شارالار اتقارىلادى: مەملەكەت باسشىسىنىڭ وبلىستار مەن ەلدى مەكەندەردى اتاۋ (قايتا اتاۋ) ماسەلەلەرىن قوسا العاندا, وبلىستاردى جانە ولاردىڭ شەكارالارىن ءبولۋ (قۇرۋ) تۋرالى قاجەتتى جارلىقتارىن جانە ۇكىمەت قاۋلىلارىن ازىرلەۋ جانە قابىلداۋ; جەرگىلىكتى اتقارۋشى ورگانداردىڭ جانە ورتالىق مەملەكەتتىك ورگانداردىڭ اۋماقتىق بولىمشەلەرىنىڭ شتات سانىنداعى وزگەرىستەر; كوممۋنالدىق مەنشىكتى بەرۋ جانە قابىلداۋ; زاڭنامالىق اكتىلەرگە وزگەرىستەر ەنگىزۋ; جاڭادان قۇرىلعان وبلىستاردا مەملەكەتتىك ورگاندار قۇرۋ. «بۇل وبلىستاردىڭ قۇرىلۋى تەك وسى ايماقتاردىڭ الەۋمەتتىك-ەكونوميكالىق دامۋىنا عانا ەمەس, بۇكىل ەكونوميكانىڭ دامۋىنا وڭ اسەرىن تيگىزەدى», دەدى مينيستر.
ءا.قۋانتىروۆ جولداۋعا سايكەس «حالىق قاتىساتىن بيۋدجەتتىڭ» فۋنكتسيونالىن كەڭەيتۋ ارقىلى جەرگىلىكتى ءوزىن ءوزى باسقارۋ ورگاندارىن تىكەلەي قارجىلاندىرۋدى ەنگىزۋ ماسەلەسى دە ەنگىزىلەتىنىن ايتتى. بۇل رەتتە ءماسليحاتتاردىڭ وكىلەتتىكتەرىن كەڭەيتۋ ماقساتىندا ولارعا حالىق قاتىساتىن بيۋدجەتتىڭ قاراجاتىن ءبولۋ جونىندەگى فۋنكتسيالار بەكىتىلەتىن بولادى. «شىن مانىندە ونى اۋىلدىق وكرۋگتەر اراسىندا ناقتى جوبالارعا بولەتىن «قور» دەۋگە بولادى. بۇل جوبالاردى جەرگىلىكتى قوعامداستىقتىڭ ۇسىنىستارى بويىنشا اۋىل اكىمدەرى قالىپتاستىرادى», دەدى مينيستر.
سونىمەن قاتار ۋكراينادا بولىپ جاتقان وقيعالار اياسىندا الەۋمەتتىك-ەكونوميكالىق جاعدايدى تۇراقتاندىرۋ ماقساتىندا مەملەكەتتىك ورگانداردىڭ, «اتامەكەن» ۇلتتىق كاسىپكەرلەر پالاتاسىنىڭ, بيزنەس جانە ساراپشىلار قاۋىمداستىعى وكىلدەرىنىڭ قاتىسۋىمەن داعدارىسقا قارسى شارالار جونىندەگى جەدەل شتابتىڭ جۇمىسى جولعا قويىلدى. «جەدەل شتابتىڭ اياسىندا كولىك جانە لوگيستيكا, ينفراقۇرىلىم, ساۋدا جانە قارجىلىق ورنىقتىلىق بويىنشا جۇمىس توپتارى ۇيىمداستىرىلدى. جۇمىس توپتارىنىڭ ءوزارا ءىس-قيمىلىنىڭ بەلگىلى ءبىر الگوريتمىنە سايكەس ۋكرايناداعى وقيعالاردىڭ سىرتقى ەكونوميكالىق جاعدايعا سالدارىن كۇندەلىكتى مونيتورينگتەۋ نەگىزىندە ەلىمىزدىڭ ەكونوميكاسىنا ولاردىڭ ىقپالىنىڭ ستسەناريلەرى ازىرلەنۋدە. وسى اقپارات نەگىزىندە جەدەل دەن قويۋ شارالارى ازىرلەنەدى», دەدى ءا.قۋانتىروۆ.
مەملەكەت باسشىسىنىڭ تاپسىرماسىن ورىنداۋ ماقساتىندا ۇلتتىق ەكونوميكا مينيسترلىگى داعدارىسقا قارسى باعدارلامانى ىسكە اسىرۋدى باستادى. قازىرگى ۋاقىتتا مينيسترلىك جاۋاپتى مەملەكەتتىك ورگاندارمەن ناقتى ۇسىنىستاردى پىسىقتاۋدا. «ۇلتتىق ەكونوميكا مينيسترلىگى مەملەكەت باسشىسىنىڭ قازاقستان حالقىنا جولداۋىندا بەرگەن ءاربىر تاپسىرماسىن تولىق ءارى جەدەل پىسىقتايتىن بولادى. جولداۋدى ءتيىمدى ىسكە اسىرۋ ءۇشىن مينيسترلىكتىڭ جۇمىسى بيۋروكراتيانى بولدىرماۋ جانە ناتيجەگە باعدارلانۋ قاعيداتتارىندا جۇرگىزىلەتىن بولادى», دەدى ءا.قۋانتىروۆ.
قارجى ءمينيسترى ەرۇلان جاماۋباەۆتىڭ ايتۋىنشا, مەملەكەت باسشىسىنىڭ تاپسىرماسىنا سايكەس ەسەپ كوميتەتى جوعارى اۋديتورلىق پالاتا ەتىپ قايتا قۇرىلادى. بۇل رەتتە پارلامەنتتىك باقىلاۋ كۇشەيتىلەدى. مۇنداي تاجىريبە جەكەلەگەن باتىس ەلدەرىندە بار. «وسىنىڭ بارلىعى كونستيتۋتسيانى قوسا العاندا, بىرقاتار زاڭنامالىق اكتىلەرگە وزگەرىستەر ەنگىزۋدى تالاپ ەتەدى. بارلىق ءتيىستى تۇزەتۋلەر مۇددەلى مەملەكەتتىك ورگاندارمەن بىرلەسىپ پىسىقتالادى», دەدى مينيستر.
جەرگىلىكتى ءوزىن ءوزى باسقارۋ ورگاندارىن قايتا قۇرۋدى ەسكەرە وتىرىپ, ساتىپ الۋ ءتارتىبىن ودان ءارى وڭايلاتۋ «جەرگىلىكتى ءوزىن ءوزى باسقارۋ تۋرالى» زاڭ جوباسى شەڭبەرىندە پىسىقتالادى. جۇمىستا فورماليزم مەن ارتىق راسىمدەردى جويۋعا, جەرگىلىكتى ءونىم بەرۋشىلەردى قولداۋعا جانە جۇمىس ورىندارىن اشۋعا, حالىقتىڭ ساتىپ الۋ پروتسەسىنە جانە شارتتاردىڭ ورىندالۋىنا باقىلاۋدى جۇزەگە اسىرۋعا قاتىسۋىنا باسا نازار اۋدارىلادى. جالپى, مەملەكەت باسشىسىنىڭ جولداۋىندا قارجى مينيسترلىگىنىڭ قۇزىرەتىنە قاتىستى باسقا دا تاپسىرمالار بار. ولار بويىنشا ءتيىستى ۇسىنىستار ۋاكىلەتتى مەملەكەتتىك ورگاندارعا ۇسىنىلادى. «الداعى ۋاقىتتا بيىلعا ارنالعان رەسپۋبليكالىق بيۋدجەت شىعىستارىنىڭ پارامەترلەرى مەن باعىتتارىن ناقتىلاۋ كۇتىلۋدە. پرەزيدەنتتىڭ تاپسىرمالارىن ىسكە اسىرۋ بويىنشا بارلىق جوسپارلانعان شارالار ۋاقتىلى قابىلدانىپ, قاجەتتى قارجى ماسەلەلەر بيۋدجەتتىك باعدارلامالار اكىمشىلەرىمەن بىرلەسىپ پىسىقتالاتىن بولادى», دەدى ە.جاماۋباەۆ.
ساۋدا جانە ينتەگراتسيا ءبىرىنشى ۆيتسە-ءمينيسترى ەرلان باتتاقوۆتىڭ ايتۋىنشا, بۇگىنگى تاڭدا ەلىمىزدە 1,3 ملن توننا ازىق-ت ۇلىك تاۋارلارىنىڭ قورى بار, بۇل حالىقتىڭ قاجەتتىلىگىن قامتاماسىز ەتۋ ءۇشىن جەتكىلىكتى. بۇدان باسقا, باعانىڭ نەگىزسىز وسۋىنە جانە الىپساتارلىققا جول بەرمەۋ ءۇشىن رەسپۋبليكالىق جانە جەرگىلىكتى اتقارۋشى ورگاندار دۇكەندەردىڭ ساۋدا ۇستەمەسىن ساقتاۋى بويىنشا تۇراقتى تەكسەرۋلەر جۇرگىزەدى. «اينالىم سحەماسى» شەڭبەرىندە ساتىپ الۋدى قارجىلاندىرۋدى 54,6-دان 100 ملرد تەڭگەگە دەيىن ۇلعايتۋ تۋرالى شەشىم قابىلداندى. ال تۇراقتاندىرۋ قورلارىن ەسەپكە الاتىن بولسا, الەۋمەتتىك ماڭىزى بار ازىق-ت ۇلىك تاۋارلارىن ساتىپ الۋ ءۇشىن قارجىلاندىرۋدىڭ جالپى كولەمى 140 ملرد تەڭگەگە دەيىن جەتكىزىلەتىن بولادى», دەدى ە.باتتاقوۆ.
باعانى تۇراقتاندىرۋ قۇرالدارىن جەتىلدىرۋ ماقساتىندا جاڭا تاسىلدەر ازىرلەنىپ جاتىر.
اۋىل شارۋاشىلىعى ءمينيسترى ەربول قاراشوكەەۆتىڭ ايتۋىنشا, مەملەكەت باسشىسىنىڭ قازاقستان حالقىنا ارناعان جولداۋىندا ايتىلعان تاپسىرمالاردى ورىنداۋ ماقساتىندا اۋىل شارۋاشىلىعى مينيسترلىگى بىرقاتار شارالار قابىلداۋدا. كوكتەمگى دالا جۇمىستارىنىڭ بارلىق تۋىنداعان پروبلەمالىق ماسەلەلەرىن جەدەل شەشۋگە كۇش سالاتىن جەدەل شتاب قۇرىلدى. قازىرگى تاڭدا تەحنيكا دايىندىعى 95 پايىزدى قۇراسا, كوكتەمگى دالا جۇمىستارى جاپپاي جۇرگىزىلە باستاعان ۋاقىتقا 100 پايىزدى قۇراماق.
ءمينيستردىڭ ايتۋىنشا, وڭىرلەرگە ارزانداتىلعان ديزەل وتىنى جونەلتىلە باستادى, جالپى كوكتەمگى دالا جۇمىستارىن جۇرگىزۋگە نارىقتىق باعادان 12-15%-عا تومەن باعامەن 400 مىڭ توننا ءبولىندى, بۇل 2021 جىلمەن سالىستىرعاندا 20 مىڭ تونناعا كوپ. 2,3 ملن توننا تۇقىم نەمەسە جوسپاردىڭ 100 پايىزى دايىندالدى. قازىرگى ۋاقىتتا يمپورتتىق تۇقىم ماتەريالىن جەتكىزۋ ماسەلەسى پىسىقتالۋدا. بۇلار – رەسەيدەن كەلەتىن 19,5 مىڭ توننا جۇگەرى, بيداي, ارپا جانە قارا بيداي تۇقىمى جانە ەۋروپادان جەتكىزىلەتىن 80 توننا جۇگەرى مەن قانت قىزىلشاسىنىڭ تۇقىمى. «مينەرالدى تىڭايتقىشتاردىڭ قولجەتىمدىلىگىنە كەلەر بولساق, جۇمىستار جوسپارلى تۇردە جۇرگىزىلۋدە. ۇكىمەت قولداۋى ارقىلى ديقانداردىڭ سۇرانىسىن قاناعاتتاندىرۋ ماقساتىندا وتاندىق مينەرالدى تىڭايتقىشتاردى وندىرۋشىلەرمەن ۋاعدالاستىققا قول جەتكىزىلدى. اممياك سەليتراسىنىڭ باعاسى 200 مىڭ تەڭگەدەن 160 مىڭ تەڭگەگە دەيىن تومەندەدى», دەدى ە.قاراشوكەەۆ.
كوكتەمگى ەگىس جۇمىستارىن جۇرگىزۋ ءۇشىن اۋىل شارۋاشىلىعى تاۋارىن وندىرۋشىلەر «كەڭ دالا» باعدارلاماسى ارقىلى 70 ملرد تەڭگە كولەمىندە, ازىق-ت ۇلىك كەلىسىمشارت كورپوراتسياسىنىڭ فورۆاردتىق ساتىپ الۋ باعدارلاماسى ارقىلى 80 ملرد تەڭگە كولەمىندە جەڭىلدەتىلگەن كرەديتپەن قامتاماسىز ەتىلگەن. بۇل رەتتە, بيىل فورۆاردتىق ساتىپ الۋ كولەمى 2 ەسەگە ارتتى. 17 ناۋرىزداعى جاعداي بويىنشا, «كەڭ دالا» باعدارلاماسى ارقىلى 94,8 ملرد تەڭگە سوماسىنا وتىنىمدەر كەلىپ ءتۇسىپ, ونىڭ 46,6 ملرد تەڭگەسى قارجىلاندىرىلدى.
اقپارات جانە قوعامدىق دامۋ ءمينيسترى اسقار وماروۆتىڭ ايتۋىنشا, مەملەكەت باسشىسىنىڭ بەرگەن تاپسىرماسىنا سايكەس اشىق اقپاراتتىق كەڭىستىك پەن باسەكەگە قابىلەتتى وتاندىق بۇقارالىق اقپارات قۇرالدارىن قۇرۋعا ەرەكشە نازار اۋدارىلماق. «وسىعان وراي بۇگىنگى تاڭدا مينيسترلىك الدىندا بۇقارالىق اقپارات قۇرالدارىنىڭ ءرولىن, مارتەبەسىن جانە جاۋاپكەرشىلىگىن نىعايتۋ بويىنشا بىرقاتار مىندەت تۇر», دەدى ا.وماروۆ.
بىرىنشىدەن, قوعامنىڭ سۇرانىستارى مەن مەملەكەتتىڭ مۇددەلەرىن ەسكەرە وتىرىپ, بۇقارالىق اقپارات قۇرالدارى تۋرالى زاڭ قايتا قارالاتىن بولادى. «بۇل پروتسەسس كەڭ قوعامدىق جانە ساراپتامالىق تالقىلاۋ نەگىزىندە جۇزەگە اسىرىلاتىنىن اتاپ وتكەن ماڭىزدى. وسىلايشا, جۋرناليستىك قوعامداستىقتىڭ اعىمداعى زاڭناماعا قاتىستى بارلىق وزەكتى ماسەلەلەرى ەسكەرىلەدى», دەدى ا.وماروۆ.
ەكىنشىدەن, ازاماتتىق باقىلاۋدى جۇزەگە اسىراتىن ء«تورتىنشى بيلىك» رەتىندە ارەكەت ەتەتىن بۇقارالىق اقپارات قۇرالدارى ءۇشىن اشىق باسەكەلەستىك ورتا داميدى.
ۇشىنشىدەن, مەملەكەتتىك اقپاراتتىق جۇمىس بويىنشا جاڭا تاسىلدەر ازىرلەنەدى.
مەملەكەت باسشىسى سونداي-اق ماڭىزدى الەۋمەتتىك ماسەلەلەردى شەشۋدەگى ۇكىمەتتىك ەمەس سەكتوردىڭ ءرولىن جانە ازاماتتىق قوعام ينستيتۋتتارىن جۇيەلى تۇردە قايتا جاڭعىرتۋ قاجەتتىگىن اتاپ ءوتتى. وسىعان بايلانىستى, مينيسترلىك قوعامدىق كەڭەستەردىڭ قىزمەتىن جەتىلدىرۋ جانە قۇرامىن جاڭارتۋ جونىندەگى جۇمىستى جالعاستىرادى. قازىر 102 قوعامدىق كەڭەس قۇرىلعان, 111-ءى قالىپتاسۋ بارىسىندا. «بيىل العاش رەت قازاقستان رەسپۋبليكاسىنداعى قوعامدىق كەڭەستەردىڭ قىزمەتى تۋرالى ۇلتتىق بايانداما دايىندالادى. وندا قوعامدىق كەڭەستەر جۇمىسىنىڭ تيىمدىلىگىنە جانە ونىڭ ودان ءارى دامۋى پەرسپەكتيۆالارىنا تالداۋ جاسالادى», دەدى ا.وماروۆ.
وسىعان قوسا, مەملەكەتتىك الەۋمەتتىك تاپسىرىس جۇيەسى ارقىلى ۇەۇ جوبالارىن جوسپارلاۋ ءتاسىلى قايتا ساراپتالادى. «ماسەلەن, قازىر پارلامەنتتە ءتيىستى زاڭ جوباسى قارالۋدا, ول ۇەۇ-نى مەملەكەتتىك قولداۋدىڭ ساپاسى مەن اشىقتىعىن ايتارلىقتاي دارەجەدە جاقسارتاتىنى انىق», دەدى ا.وماروۆ.
ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ كوكتەمگى ەگىس جۇمىستارى بارىسىندا اۋىل شارۋاشىلىعى تاۋار وندىرۋشىلەرىن سۋارمالى سۋمەن قامتاماسىز ەتۋ ءۇشىن بارلىق شارالار قابىلدانعانىن ايتتى. «ەلىمىزدىڭ نەگىزگى وزەن باسسەيندەرى سۋ ازدىعى تسيكلىنە بيىل دا تاپ بولىپ وتىر. وسىعان قاراماستان, فەرمەرلەر كوكتەمگى ەگىس جۇمىستارى بارىسىندا قاجەتتى سۋارمالى سۋمەن قامتاماسىز ەتىلەدى», دەدى س.برەكەشەۆ.
ونىڭ ايتۋىنشا قابىلدانىپ جاتقان شارالاردىڭ ناتيجەسىندە توقتوعۇل سۋ قويماسىندا سۋدىڭ جينالۋىنا بايلانىستى جاعداي بىرتىندەپ قالىپقا كەلە باستاعان. سونىمەن قاتار ۆەگەتاتسيا كەزەڭىندە قوسىمشا سۋ كولەمىن الۋ بويىنشا قىرعىزستانمەن كەلىسىمگە قول جەتكىزىلدى. شاردارا سۋ قويماسىنا بارىنشا ەڭ جوعارى اعىندى قامتاماسىز ەتۋ بويىنشا شارالار قابىلدانۋدا. ونىڭ باستى ماقساتى – تۇركىستان وبلىسىنىڭ شاردارا, وتىرار جانە ارىس اۋداندارىنداعى قىزىلقۇم القابىن, سونداي-اق قىزىلوردا وبلىسىنىڭ فەرمەرلەرىن سۋمەن قامتاماسىز ەتۋ. «وزبەك جانە تاجىك تاراپتارىمەن جۇرگىزىلگەن جۇمىستىڭ ناتيجەسىندە شاردارا سۋ قويماسىنا قۇياتىن اعىن سۋ كولەمى ۇلعايتىلدى. ناقتى ايتساق, اقپان ايىنداعى كورسەتكىش قاڭتارمەن سالىستىرعاندا 22%-عا ارتتى. سونداي-اق اقپان ايىندا «باحري توچيك» سۋ قويماسىنان قازاقستان جاققا قوسىمشا 181 ملن تەكشە مەتر سۋ اعىزىلدى» دەدى مينيستر.
ادىلەت ءمينيسترى قانات مۋسين مەملەكەت باسشىسى جولداۋىن ىسكە اسىرۋ جونىندەگى جالپىۇلتتىق جوسپاردىڭ جوباسى ازىرلەنگەنىن ايتتى.
ماڭىزدى ماسەلەنى قورىتىندىلاعان پرەمەر-مينيستر ءاليحان سمايىلوۆ پرەزيدەنت ۇسىنعان ساياسي رەفورمالار مەملەكەتتىك قۇرىلىستى نىعايتۋدىڭ جاڭا تاريحي كەزەڭى ءارى «حالىق ۇنىنە قۇلاق اساتىن مەملەكەت» ۇستانىمىنىڭ ايقىن كورىنىسى ەكەنىن اتاپ كورسەتتى.
جولداۋداعى تاپسىرمالاردى ورىنداۋعا جەدەلدەتىپ كىرىسۋ ءۇشىن پرەمەر-مينيستر ۇلتتىق ەكونوميكا مينيسترلىگىنە ۇلتتىق بانكپەن جانە جاۋاپتى مەملەكەتتىك ورگاندارمەن بىرلەسىپ, 2022 جىلعى 25 ناۋرىزعا دەيىن ۇكىمەتكە داعدارىسقا قارسى جوسپاردى ەنگىزۋدى مىندەتتەدى. «مەملەكەت باسشىسى داعدارىسقا قارسى شارالار پاكەتىن تەز ارادا جۇزەگە اسىرۋدى تاپسىردى. داعدارىسقا قارسى شارالار ەكونوميكانى قولداۋعا, ينفلياتسيانى باقىلاۋدى كۇشەيتۋگە, ۆاليۋتا نارىعىن تۇراقتاندىرۋعا, جاڭا جۇمىس ورىندارىن قۇرۋعا, سونداي-اق كاسىپكەرلىكتى دامىتۋعا باعىتتالعان», دەدى ءا.سمايىلوۆ.
سونداي-اق ۋاكىلەتتى مەملەكەتتىك ورگاندارعا مەملەكەت باسشىسى ۇسىنعان رەفورمالاردى قامتاماسىز ەتۋ ءۇشىن قاجەتتى زاڭ جوبالارىن ازىرلەۋگە جانە ولاردى تالقىلاۋعا دەرەۋ كىرىسۋدى تاپسىردى. «مەملەكەت باسشىسى الدىمىزعا ەلىمىزدى قارقىندى تۇردە دامىتۋ, ەكونوميكانىڭ تۇراقتىلىعى مەن باسەكەگە قابىلەتتىلىگىن ارتتىرۋ جانە حالىقتىڭ تۇرمىس دەڭگەيى مەن ءال-اۋقاتىن جاقسارتۋ جونىندە اسا اۋقىمدى مىندەتتەر قويدى. قازىر ارقانى كەڭگە سالاتىن زامان ەمەس. بارشامىز مەملەكەت باسشىسى باستاپ بەرگەن رەفورمالاردى تاباندى ىسكە اسىرۋعا جاۋاپتىمىز. ءبىز حالقىمىزدىڭ سەنىمىن اقتاۋعا ءتيىسپىز», دەدى پرەمەر-مينيستر.
