بۇرىندارى كسرو-نىڭ قۇرامىندا بولعان مەملەكەتتەر اراسىندا الەم چەمپيوناتتارىندا ەڭ ۇزدىك ناتيجەگە ۋكراينانىڭ بالۋاندارى قول جەتكىزگەن ەكەن. 1993-2021 جىلدار ارالىعىندا ولار 8 التىن, 6 كۇمىس جانە 19 قولا مەدالدى ولجالادى. بارلىعى – 33 جۇلدە. ەكىنشى ورىنداعى رەسەيدىڭ 60 جۇلدەسى بار. الايدا التىن مەدالدارىنىڭ از بولۋى سالدارىنان ولار جارىس كەستەسىندە باستى قارسىلاستارىنان قالىپ قويدى. رەسەيلىك بۇرىمدىلار 5 التىن, 22 كۇمىس جانە 33 قولانى يەلەندى. ءدال وسى كورسەتكىشتەرىنىڭ ارقاسىندا اتالعان ەلدىڭ سپورتشىلارى الەمدىك ولشەم بويىنشا دا وزىق كوماندالاردىڭ قاتارىنا ەركىن ەنۋدە. ناقتىلاپ ايتساق, ۋكراينالىقتار تەك جاپونيا, اقش, قىتاي جانە كانادا سەكىلدى الپاۋىتتاردى عانا العا جىبەرىپ, بەسىنشى ورىنعا تابان تىرەسە, رەسەي قۇراماسى جەتىنشى ورىنعا تۇراقتادى.
الەم چەمپيوناتتارىنىڭ قورىتىندىسى بويىنشا قازاقستان بۇرىنعى «باۋىرلاس» رەسپۋبليكالار اراسىندا التىنشى ورىندى يەمدەنۋدە. جەرلەستەرىمىز ازىرگە 5 كۇمىس پەن 7 قولانى قاناعات تۇتۋدا. بارلىعى – 12 جۇلدە. ءبىزدىڭ بۇرىمدىلارىمىزدىڭ ناتيجەلەرى مىناداي: كۇمىس – ەلەنا شالىگينا (2007, 2010 جىلدارى), جۇلدىز ەشىموۆا (2008), گيۋزەل مانيۋروۆا (2012) جانە ءجاميلا باقبەرگەنوۆا (2021). قولا – ولگا سميرنوۆا (2007), ولگا جانىبەكوۆا (2007), ەلەنا شالىگينا (2009), جۇلدىز ەشىموۆا (2011), ەكاتەرينا لاريونوۆا (2013), ايىم ءابدىلدينا (2016) جانە ۆالەنتينا يسلاموۆا (2019).
جەرلەستەرىمىزگە قاراعاندا ازەربايجان مەن بەلارۋستىڭ كورسەتكىشتەرى الدەقايدا جاقسى. ىرگەمىزدەگى قىرعىزستاننىڭ قورجىنىندا نەبارى بەس-اق جۇلدە بولعانىمەن, ساپا جاعىنان ولار دا ءبىزدىڭ الدىمىزدا تۇر. ويتكەنى سوڭعى ۋاقىتتا الاتاۋدىڭ ارعى بەتىندە كۇرەستىڭ بۇل ءتۇرى كەرەمەت قارقىنمەن دامىپ كەلەدى. وسىدان ءۇش جىل بۇرىن نۇر-سۇلتاندا ايسۇلۋ تىنىبەكوۆا التىن تۇعىردان قول بۇلعاسا, بىلتىر ايسۇلۋمەن قاتار مەيىرىم جۇمانازاروۆا دا ءدال سول مەجەدەن كورىندى. ياعني تورتكۇل دۇنيەنىڭ مىقتىلارى جينالعان جارىستا اتالعان ەلدىڭ ءانۇرانى ءۇش مارتە شىرقالدى. ودان بولەك, ولاردىڭ قورجىنىندا تاعى قوس قولا مەدال بار. ءبىر كەرەمەتى, سول جۇلدەلەردىڭ بارلىعى دا تەك ءوز ورەندەرىنىڭ ەنشىسىندە. مىنە, قازىرگى كەزدە قازاق جانكۇيەرلەرىنىڭ قىرعىز قىزدارىنىڭ تولاعاي تابىسىنا قىزىعا قاراۋىنىڭ دا سەبەبى سول.
سالىستىرمالى تۇردە الساق, قازاقستاننىڭ قورجىنىنداعى 12 جۇلدەنىڭ جەتەۋىن لەگيونەرلەر جەڭىپ العانىن ايتا كەتۋگە ءتيىسپىز. ناقتىلاپ ايتساق, ەلەنا شالىگينا – رەسەيدىڭ كەمەروۆوسىنان, ولگا سميرنوۆا – چۋۆاشيادان, گيۋزەل مانيۋروۆا – موردوۆيادان, ۆالەنتينا يسلاموۆا – نوۆوسىبىردەن جانە جۇلدىز ەشىموۆا – قىرعىزستاننان.
2004-2021 جىلدار ارالىعىندا وليمپيا ويىندارىندا ايەلدەر كۇرەسىنەن بارلىعى 24 جۇلدە جيىنتىعى ساراپقا سالىندى. سول 24 التىننىڭ 15-ءىن جاپوندار ولجالادى. اقش, قىتاي جانە كانادانىڭ ءانۇراندارى ەكى مارتە شىرقالدى. گەرمانيا, رەسەي جانە ۋكراينا بالۋاندارىنىڭ ءبىر-ءبىر رەتتەن باق جۇلدىزدارى جاندى. نەبارى وسى جەتى مەملەكەتتىڭ وكىلدەرىنە عانا تورتجىلدىقتىڭ باستى دوداسىندا باس جۇلدەنى ولجالاۋ باقىتى بۇيىرعان ەكەن.
الەم چەمپيوناتىندا ۋكراينالىقتارعا كەتكەن ەسەسىن رەسەيلىكتەر وليمپيادادا قايتاردى. بۇل كوماندانىڭ ساپىندا ناتاليا ۆوروبەۆا توپ جارسا, گيۋزەل مانيۋروۆا, الەنا كارتاشوۆا, ۆالەريا كوبلوۆا فينالدا ۇتىلدى. ليۋبوۆ ۆولوسوۆا مەن ەكاتەرينا بۋكينا ءۇشىنشى ساتىعا جايعاستى. ۋكرايناعا جالعىز التىندى يرينا مەرليني سىيعا تارتتى. ءدال سول مەرليني جانە يرينا كوليادەنكو مەن اللا چەركاسوۆا قولاعا قول سوزدى. بارلىعى – 4 جۇلدە.
ۇزدىك ۇشتىكتى ازەربايجان قورىتىندىلادى. ولاردىڭ باقانداي التى مەدالى بار. سول جۇلدەلەردىڭ تورتەۋىن ايگىلى ماريا ستادنيك ولجالادى. ۋكراينانىڭ باتىس بەتكەيىندە ورنالاسقان لۆوۆ قالاسىندا دۇنيەگە كەلگەن داڭقتى بالۋان ءوزى قاتىسقان ءتورت وليمپيادانىڭ بارلىعىنان ولجالى ورالدى. اتاپ ايتساق, 2008 جىلى بەيجىڭ مەن 2020 جىلى توكيودا قولا السا, 2012 جىلى لوندون مەن 2016 جىلى ريو-دە-جانەيرودا كۇمىسپەن كۇپتەلدى. لوندوندا يۋليا راتكەۆيچ جانە ريو-دە-جانەيرودا ناتاليا سينيشينا ءۇشىنشى ورىنداردى يەلەندى. بۇل سپورتشىلار دا لەگيونەرلەر. راتكەۆيچ – بەلارۋستە, ال سينيشينا ۋكراينادا دۇنيەگە كەلدى. وسى مالىمەتتەردىڭ ءوزى-اق ازەربايجاندىقتار كۇنى بۇگىنگە دەيىن ءوز بالۋاندارىنا كوڭىل بولمەي, تەك كەلىمسەكتەرگە عانا ارقا سۇيەپ كەلە جاتقانىن اڭعارتادى.
قازاقستان قۇراماسى وليمپيادادا بەس جۇلدەگە قول جەتكىزدى. 2008 جىلى ەلەنا شالىگينا مەن 2012 جىلى گيۋزەل مانيۋروۆا ءۇشىنشى ساتىعا تۇراقتادى. وتانداستارىمىز ءۇشىن 2016 جىلى برازيليانىڭ ريو-دە-جانەيرو قالاسىندا الاۋى تۇتانعان وليمپيا ويىندارى وتە تابىستى بولعانىن سپورت سۇيەر قاۋىم ۇمىتا قويعان جوق. سول جارىستا مانيۋروۆا كۇمىس السا, ەكاتەرينا لاريونوۆا مەن ەلميرا سىزدىقوۆا قولا مەدالدى مويىندارىندا جارقىراتتى.
وزدەرىڭىز بايىپتاپ قاراساڭىزدار, ايەلدەر كۇرەسىنەن جەڭىس تۇعىرىنا كوتەرىلۋ وڭاي شارۋا ەمەس ەكەن. ماسەلەن, بۇرىندارى وداقتىڭ بودانىندا بولعان 15 رەسپۋبليكانىڭ سەگىزى عانا الەم چەمپيوناتىندا جۇلدە الدى. وليمپيا ويىندارىندا ونداي قۇرمەتكە تەك التاۋى بولەندى. ءبىر قۋانتارلىعى, تابىستى ونەر كورسەتىپ جۇرگەندەر قاتارىندا قازاقستان وكىلدەرى دە بار. جەرلەستەرىمىزدىڭ قورجىنىندا كۇمىس تە, قولا دا بار. دەسەك تە ءبىزدى تەك التىن مەدالدىڭ ازدىعى الاڭداتادى. ەگەر بۇرىمدىلارىمىز اسا ءىرى بايراقتى باسەكەلەردە باس جۇلدەگە قول جەتكىزە العاندا, تۇعىرىمىز بۇگىنگىدەن الدەقايدا جوعارى بولاتىنى ءسوزسىز ەدى...
الەم چەمپيوناتتارىنىڭ ناتيجەسى
(1993-2021 جىلدار ارالىعى)
|
ورىن |
كوماندالار |
التىن |
كۇمىس |
قولا |
بارلىعى |
|
1. |
ۋكراينا |
8 |
6 |
19 |
33 |
|
2. |
رەسەي |
5 |
22 |
33 |
60 |
|
3. |
ازەربايجان |
3 |
6 |
8 |
17 |
|
4. |
قىرعىزستان |
3 |
0 |
2 |
5 |
|
5. |
بەلارۋس |
2 |
5 |
8 |
15 |
|
6. |
قازاقستان |
0 |
5 |
7 |
12 |
|
7. |
ەستونيا |
0 |
1 |
2 |
3 |
|
8. |
لاتۆيا |
0 |
0 |
3 |
3 |
|
9-15. |
ارمەنيا, گرۋزيا, ليتۆا, وزبەكستان, مولدوۆا, تاجىكستان, تۇرىكمەنستان |
0 |
0 |
0 |
0 |
وليمپيا ويىندارىنىڭ ناتيجەسى
(1996-2021 جىلدار ارالىعى)
|
ورىن |
كوماندالار |
التىن |
كۇمىس |
قولا |
بارلىعى |
|
1. |
رەسەي |
1 |
4 |
2 |
7 |
|
2. |
ۋكراينا |
1 |
0 |
3 |
4 |
|
3. |
ازەربايجان |
0 |
2 |
4 |
6 |
|
4. |
بەلارۋس |
0 |
2 |
1 |
3 |
|
5. |
قازاقستان |
0 |
1 |
4 |
5 |
|
6. |
قىرعىزستان |
0 |
1 |
1 |
2 |
|
7-15. |
ارمەنيا, گرۋزيا, ليتۆا, لاتۆيا, وزبەكستان, مولدوۆا, تاجىكستان, تۇرىكمەنستان, ەستونيا |
0 |
0 |
0 |
0 |
