جولداۋدا پرەزيدەنتتىك باسقارۋ نىسانىن ودان ءارى جاڭعىرتۋ, پارلامەنت پەن جەرگىلىكتى وكىلدى ورگانداردىڭ ءرولىن كۇشەيتۋ, سايلاۋ زاڭناماسىن, پارتيالىق جانە قۇقىق قورعاۋ جۇيەلەرىن, اكىمشىلىك-اۋماقتىق قۇرىلىمدى جانە باسقالاردى جەتىلدىرۋ بويىنشا پارمەندى شارالار ۇسىنىلدى.
اسىرەسە پرەزيدەنتتىڭ كونستيتۋتسيالىق باقىلاۋ ورگانىنا ازاماتتاردىڭ, سونداي-اق باسقا سۋبەكتىلەردىڭ ءوتىنىش بەرۋىنە جول اشىپ, كونستيتۋتسيالىق كەڭەستى كونستيتۋتسيالىق سوتقا اينالدىرۋ باستاماسىن ەرەكشە اتاپ وتكىم كەلەدى.
كونستيتۋتسيالىق باقىلاۋ ورگاندارى اتا زاڭنىڭ تالاپتارىن جۇزەگە اسىرۋدا ماڭىزدى ءرول اتقارادى. بۇل نەگىزىنەن رەسمي تۇسىندىرمە بەرۋ, كونستيتۋتسيالىق-قۇقىقتىق داۋلار بويىنشا قورىتىندىلار بەرۋ, زاڭنامانىڭ كونستيتۋتسيالىلىعىن تەكسەرۋ ارقىلى جاسالادى.
1995 جىلى كونستيتۋتسيا قابىلدانعاننان كەيىن قۇرىلعان كونستيتۋتسيالىق كەڭەس قۇقىقتىق مەملەكەت قاعيداتتارىن بەكىتۋ ىسىنە لايىقتى ۇلەس قوستى. الايدا زامان اعىمى جاڭا تالاپتار قويىپ وتىر. كونستيتۋتسيالىق رەفورمالار پراكتيكاسىنىڭ سوڭعى ونجىلدىعى كونستيتۋتسيالىق قۇقىقتارىن قورعاۋ ماقساتىندا ازاماتتاردىڭ كونستيتۋتسيالىق باقىلاۋعا قول جەتكىزۋىن كەڭەيتۋ ءۇردىسىن بايقاتادى.
حالىقارالىق قۇقىق قورعاۋ قۇرىلىمدارى مەن كوپتەگەن مەملەكەت ازاماتتاردىڭ تىكەلەي كونستيتۋتسيالىق شاعىمىن ەنگىزۋگە باسىمدىق بەرەدى. سوڭعى ۋاقىتتا بۇل تۇركيادا (2011), ماجارستاندا (2012), ۋكراينادا (2016), ليتۆادا (2019), قىرعىزستاندا (2021), وزبەكستاندا (2021), بەلارۋستە (2022) جانە باسقا ەلدەردە جۇزەگە اسىرىلدى. الەمدىك تاجىريبەنى ەسكەرە وتىرىپ, ءبىز بۇعان دەيىن وسىنداي ۇسىنىستار ەنگىزگەن ەدىك. ەندى, مىنە, ولار مەملەكەت باسشىسىنىڭ قولداۋىنا يە بولدى.
مەملەكەت باسشىسىنىڭ اتالعان يدەيالارىن ىسكە اسىرۋ قۇقىقتىق جۇيەنى دامىتۋعا, ازاماتتاردىڭ كونستيتۋتسيالىق قۇقىقتارىن قورعاۋ كەپىلدىكتەرىن جانە ەلدەگى زاڭدىلىق رەجىمىن نىعايتۋعا, حالىقتىڭ مەملەكەتتىك ينستيتۋتتارعا سەنىمىن ارتتىرۋعا ىقپال ەتەتىن بولادى.
قايرات ءمامي,
قازاقستان رەسپۋبليكاسى كونستيتۋتسيالىق كەڭەسىنىڭ توراعاسى
