تىرلىگى تاعىلىم مەن تالىمگە تولى حالقىمىزدىڭ تانىم-تۇسىنىگى - انا دەنساۋلىعىنا, ايەلدىڭ بوسانۋى مەن بالا كۇتىمىنە قاتىستى نەبىر تاڭعاجايىپ ىرىم-تىيىم مەن سالت-ءداستۇردىڭ قازىناسى. ايەل تولعاتىپ باستاعانداعى جارىسقازان ۇيىمداستىرۋ, بوسانۋدى جەڭىلدەتۋ جانە جىلدامداتۋ ءۇشىن ارقانعا اسىلۋ سىندى ارەكەتتەر تەك سالت-ءداستۇر عانا ەمەس, مەديتسينالىق تۇرعىدان اسا ماڭىزدى جانە وراسان پايدالى ادىستەر. وسىنى ەسكەرگەن ماڭعىستاۋلىق اكۋشەر-گينەكولوگتار امال مەرەكەسىندە وزدەرىنىڭ ءساتتى يدەيالارىن جۇزەگە اسىردى. ول – زاماناۋي قۇرالدارمەن تولىقتاي جابدىقتالعان ۇلتتىق ناقىشتا بەزەندىرىلگەن بوسانۋ بولمەسىنىڭ اشىلۋى.
– بۇل بولمەدە زاماناۋي ءۇردىس پەن قازاقي ناقىش ۇندەستىرىلگەن. بولمەدە ۇلتتىق مادەنيەت پەن ءداستۇردىڭ ۇستىنى – كيەلى شاڭىراق, كيىز ءۇي, ونىڭ ىشكى دۇنيەلەرى – كيىز ءۇيدىڭ باسقۇر-باۋى, ەرتەرەكتە تولعاعى جەتكەن ايەل ءبىر شەتىن كەرەگەگە, ءبىر شەتىن باقانعا بايلاپ اسىلىپ تۇرىپ بوسانعان ارقان مەن جالپاق باۋ جانە ويۋ-ورنەكتى تىستارى بار توسەك-ورىن, ءسابيىن بوسانىپ قولىنا العان باقىتتى انا سۋرەتى مەن دومبىرا بەينەسى بار. بارلىق اتريبۋتتار جۇكتى ايەلگە زيان كەلتىرمەيتىن ماتەريالداردان جاسالعان, ياعني سۇرتۋگە, جۋعا, زارارسىزداندىرۋعا بولادى. بارلىق اتريبۋتتا قازاق حالقىنىڭ بولمىسى بار. كورۋگە, قاراۋعا جايلى, جىلى سۋرەتتەر ايەلدىڭ بوسانۋ كەزىندەگى پسيحوەموتسيونالدىق كوڭىل-كۇيىنە جاقسى اسەرىن تيگىزەدى دەپ ۇمىتتەنەمىز, دەيدى ورتالىقتىڭ ماركەتينگ بويىنشا پاتسيەنتتەرمەن جانە قوعاممەن بايلانىس ءبولىمىنىڭ مامانى ا. ءىزمۇراتوۆا.
ونىڭ ايتۋىنشا, بوسانۋ بولمەسىن ۇلتتىق ناقىشتا بەزەندىرۋدىڭ وزىندىك سەبەپتەرى بار ەكەن. ياعني بوساناتىن ايەلدەردىڭ دەنى – ءار وتباسىنىڭ كەلىندەرى, ياعني جاستار بولعاندىقتان بولمەدەن ۇلتىمىزدىڭ تاريحىمەن بايلانىس تاپقانداي اسەر السىن, ءداستۇردى تانىپ ءبىلسىن, سابيلەرىن دە ۇلتتىق بولمىسپەن تاربيەلەۋگە ۇمتىلسىن دەگەن نيەت.
مەرەكەگە وراي قازاقتىڭ سالت-ءداستۇرىن دارىپتەيتىن قويىلىمدار, كورىنىستەر قويىپ, سايىستار ۇيىمداستىرعان ورتالىق قىزمەتكەرلەرى مەن دارىگەرلەردىڭ ۇلتتىق بولمىستى, تاريحتى تانۋ, جاس ۇرپاق ساناسىنا ونى ءسىڭىرۋ باعىتىنداعى باستامالارى قىزىقتى. ونى الەۋمەتتىك جەلىلەردەن حاباردار بولىپ ءوز قىزىعۋشىلىعىن جاسىرا الماعان جاس انالاردىڭ لەبىزىنەن بايقادىق. ەل-جۇرت كيەلى شاڭىراق استىندا, تەكەمەتتىڭ ۇستىندە تۋىلاتىن ۇرپاقتىڭ ۇلتجاندى بولىپ وسۋىنە تىلەكشى.
ماڭعىستاۋ وبلىسى
