TopIQ.kz ەلەكتروندى كىتاپتارىنىڭ digital ۇستازدار مەن وقۋشىلار اراسىندا تانىمالدىلىعى ارتىپ كەلەدى. مەكتەپ وقۋشىلارىنا قولايلى بولۋى ءۇشىن «الماتىكىتاپ» باسپاسى ەلىمىزدە العاش رەت ءۇش باسپانىڭ 86 ەلەكتروندى كىتابىن ءبىر پلاتفورماعا جيناقتادى. بۇل جوبا «تسيفرلى قازاقستان» باعدارلاماسى شەڭبەرىندە باسپا قاراجاتى ەسەبىنەن اتقارىلدى. ءبىز بۇعان دەيىن دە TopIQ.kz تۇعىرناماسى ەل وڭىرلەرىندە سىناقتان وتكىزىلىپ جاتقانى تۋرالى بايانداعانبىز. سوڭعى ەكى جىل كولەمىندە, ياعني 2020 – 2022 وقۋ جىلدارى رەسپۋبليكا ايماقتارىنداعى اپروباتسيا ءساتتى اياقتالىپ, وسى ارالىقتا 2 ملن-نان اسا قولدانۋشى تۇعىرنامانى قولدانىپ كوردى.
ء«بىزدىڭ تۇعىرنامامىز وزىنە مەملەكەتتىك ءبىلىم باعدارلاماسى اياسىنداعى بىرەگەي ينتەراكتيۆتى جانە مۋلتيمەديالى ماتەريالداردى كىرىكتىرەدى. ەلەكتروندى كىتاپتار تەك سىنىپ قابىرعاسىندا عانا ەمەس, وقۋشىمەن جەكە نەمەسە توپپەن بىرگە جۇمىس ىستەۋگە مۇمكىندىك بەرەدى. ەلەكتروندى كىتاپ ەكسكۋرسيادا, جولدا, سپورتتىق جيىنداردا قولدانۋعا يكەمدى, وقۋشىعا ىڭعايلى جانە جەڭىل. سونىمەن قاتار, TopIQ.kz تۇعىرناماسىن كەز كەلگەن ۋاقىتتا, كەز كەلگەن قۇرىلعىدا, قولايلى جىلدامدىقپەن قولدانۋعا بولادى», دەيدى «الماتىكىتاپ» باسپاسىنىڭ باسشىسى ەلەونورا باتالوۆا.
كىتاپتىڭ ءارتۇرلى ۇلگىلەرى مەن ماتەريالداردىڭ الۋاندىعىنا وراي, «الماتىكىتاپ» باسپاسىنىڭ ەلەكتروندى كىتاپتارىن ساراپتاۋ ماقساتىندا تۇعىرنامادا ەكى جىلىن وتكەرگەن ۇستازداردىڭ كوپشىلىگى وقۋشىلاردىڭ ساباق ۇلگەرىمدەرىندە ىلگەرىلەۋ بار ەكەنىن, جاڭا بۋىن ءۇشىن بۇل اسا ماڭىزدى ەكەنىن ايتىپ وتىر.
تۇعىرنامانىڭ تۇساۋكەسەر ءراسىمىن Digital Ustaz Almaty 2021 بايقاۋىنىڭ جەڭىمپازى, تاريح ءپانىنىڭ مۇعالىمى ساعىنعالي قاليەۆ اتقاردى.
تۇساۋكەسەر كەزىندە وپتيكالىق گولوگرافيا قولدانعان ساعىنعالي قاليەۆ: «قازىرگى ۇستازدىڭ مىندەتى – وقۋشىلاردىڭ ميدى اشىتاتىن, تىم كوپ ءارى تۇسىنىكسىزدەۋ, اسا قاجەتسىز دەرەكتەردى قابىلداۋعا ماجبۇرلەۋ ەمەس, جاڭا ءبىلىمدى تالداۋ جانە تابا ءبىلۋ. بۇل جاڭا ءتاسىل تسيفرلى پەداگوگيكامەن تىعىز بايلانىستا. تسيفرلى پەداگوگيكا دەگەنىمىز – 40 مينۋت بويى zoom ارقىلى سويلەپ تۇرعان مۇعالىم مەن تاپسىرمالاردى whatsApp ارقىلى جىبەرۋ ەمەس. تسيفرلى پەداگوگيكا – بۇل ينتەراكتيۆتى وقىتۋ, ياعني وقۋشىنىڭ ساباق بويى ءۇنسىز وتىرىپ تىڭداۋى ەمەس, كەرىسىنشە ۇستازبەن, سىنىپتاستارمەن, ساندىق كىتاپپەن, ساندىق تەحنولوگيالارمەن ءوزارا بايلانىستا بولۋى. قازىرگى تاڭدا «الماتىكىتاپ» باسپاسى مەن ونىڭ Pearson Education, Cambridge, Oxford University Press ارىپتەستەرى وسى ىسپەن اينالىسىپ وتىر», دەدى.
«گەوگرافيا» كىتابىنىڭ اۆتورى, پروفەسسور رۋسلان قاراتابانوۆ جۇيەلى ءبىلىم مەن ساندىق ورتانىڭ ىقپالداسۋىن, وقىتۋدىڭ ءداستۇرلى جانە يننوۆاتسيالىق ادىستەرىنىڭ سيمبيوزىن, بالالارعا ارنالعان مۇمكىندىكپەن بىرگە ءوزىنىڭ مەنشىكتى كلاسسيكالىق كونتەنتىنىڭ رەتتى ءارى پاراساتتى ۇيلەسىمىن قۇرۋدى قولدايتىنىن بىلدىرە كەلە: «ساندىق ورتادا بىلىمدىك تۇعىرنامالاردى ازىرلەۋ «اقىلدى» تەحنولوگيالاردى جاي عانا وقىتۋدىڭ جانە كوممۋنيكاتسيانىڭ قۇرالىنا ەمەس, ادەتتەگى الەۋمەتتىك تاجىريبەگە اينالدىرعان ۇرپاققا باعىتتالۋعا ءتيىس. جەرگىلىكتى ساندىق ۇرپاققا ارنالعان شىنايى, تولىقتىرىلعان, ۆيرتۋالدى, تارتىمدى ءبىلىم ورتاسىن قۇرۋ ماڭىزدىراق. وسى ساۋالداردىڭ قازىرگى ۇتىمدى شەشىمى TopIQ ءبىلىم تۇعىرناماسى بولىپ وتىر.
TopIQ ەلەكتروندى كىتاپتار تۇعىرناماسى بالالارعا نە بەرەدى دەگەن ساۋالعا پروفەسسور رۋسلان قاراتابانوۆ: «بىرىنشىدەن, وقۋعا ينكليۋزيۆتى كەلۋى, ياعني كىتاپتارعا ءبارى بىردەي قول جەتكىزە الادى, بارلىق كوممۋنيكاتسيالىق ەلەكتروندى قۇرىلعىلارعا تىكەلەي جەلى تەگىن. تىركەلۋدىڭ, قۇپياسوزدى ەستە ساقتاۋدىڭ, جۇكتەۋدىڭ قاجەتى جوق. ەكىنشىدەن, دەنساۋلىقتى ساقتاۋ – مەكتەپتىڭ ينتەرنەت جەلىسى مەن ورىندى اكت ساياساتىندا بارلىق كىتاپتاردى كوتەرىپ ءجۇرۋ قاجەت ەمەس», دەگەن پىكىرىن ورتاعا سالدى.
سونىمەن قاتار پروفەسسور ۇستازدارعا تۇعىرناما ارالاس وقىتۋدىڭ (Blended Learning) تالابىنا ياعني وقىتۋدىڭ ينتەراكتيۆتى ادىستەمەسىن ءارى قاراي قولدانۋ ءۇشىن, ماتەريالدىڭ ءبىر بولىگىن قانداي دا ءبىر تاقىرىپقا دەيىن تىكەلەي جەلىمەن وقىتۋدا جاۋاپ بەرەتىنىن ەسكەرتتى. البەتتە, تۇعىرناما وقۋشىلاردىڭ عانا ەمەس, ۇستازداردىڭ دا اكت-داعدىلارىن دامىتۋدى قاراستىرعان. ماڭىزدى بولىگى – تۇعىرناما ءبىر-بىرىنە كەرى بايلانىس جاساۋعا مۇمكىندىك بەرەدى. ال جالپى قوعامعا – تج, پاندەميا جاعدايىندا قاۋىپسىزدىكتى قامتاماسىز ەتە الادى.
«نەگىزىندە, كوپ ەل وسىنداي پلاتفورمالاردىڭ وزدەرىندە بولۋىنا مۇددەلىلىك تانىتىپ, بارىن سالىپ وتىر. ال بىزدە بۇل تۇعىرناما بارىنشا جاقسى جاسالدى. كوپشىلىك ساندىق تەحنولوگيالاردى كەلەشەك ۋاقىتپەن ايتقاندى ۇناتادى. الايدا ول بولاشاق تۋرالى ەمەس. ول – بۇگىن جايلى! قازاقستاننىڭ بارلىق مەكتەپتەرىنىڭ ساندىق ۇستازدارى, بىرىگىڭدەر!» دەيدى پروفەسسور.
قورىتا ايتقاندا, تسيفرلى پەداگوگيكامەن ساباقتارىن وتكىزەتىن Digital Ustaz Almaty 2021 فيناليستەرى الماتىدا توعىسىپ, تەحنولوگيالاردى جاقىنداتىپ, شاكىرتتەرىن وقۋعا ىنتالاندىرۋعا سەپتەسەتىن Teachers Lab تۇعىرناماسىمەن تولىق تانىستى. زاماناۋي ۇستازدار وقىتۋ بالالارعا قىزىقتى ءارى پايدالى بولۋى ءۇشىن ءارى قاراي وسىنداي جاڭا سەرۆيستەردى مەڭگەرەدى. «تەحنولوگيالاردى جاقىنداتىپ, وقۋشىلارعا ىنتا بەرۋ!» ۇرانى الداعى ۋاقىتتا الماتىنىڭ ءاربىر مەكتەبىندە ايتىلادى. الماتى قالاسىنىڭ اكىمدىگى مەن EdCrunch Academy زاماناۋي ءبىلىم بەرۋدى دامىتۋ ينستيتۋتى ۇيىمداستىرعان Digital Ustaz Almaty 2022 بايقاۋى جاقىن كۇندەردە باستالادى.
الماتى
