ماسەلەن, بەرەكە اۋىلىندا ءبىر اۋىسىمدا 25 ادامعا مەديتسينالىق قىزمەت كورسەتەتىن امبۋلاتورياعا 3 044 ادام تىركەلگەن. تىركەلگەندەردىڭ اراسىندا 800 ءجاسوسپىرىم, ونىڭ ىشىندە ءبىر جاسقا دەيىنگى 160 بالا بار. قازىر امبۋلاتوريادا ەكى جالپى پراكتيكالىق دارىگەرى مەن اكۋشەر, بەس مەيىربيكە جۇمىس ىستەيدى. امبۋلاتوريانىڭ جالپى پراكتيكالىق دارىگەرى سەرىك قۇلعازيەۆتىڭ ايتۋىنشا, اۋىلدا ديسپانسەرلىك ەسەپكە الىنعان ناۋقاستاردىڭ سانى كوپ. بالا تۋ كورسەتكىشى ارتىپ وتىر. ال المالى اۋىلىنداعى وسىنداي امبۋلاتوريادا 3 700 تۇرعىن تىركەۋگە الىنعان.
– اۋىلدارداعى ەمدەۋ مەكەمەلەرىن بىلىكتى كادرلارمەن قامتاماسىز ەتۋ پروبلەماسىن شەشۋگە ەرەكشە نازار اۋدارعان ءجون. اسىرەسە جاس مامانداردىڭ اۋىلدا جۇمىس ىستەۋگە قۇلشىنىسىن ارتتىراتىنداي بىرنەشە جايتتى ۇسىنامىز. بىرىنشىدەن, ولاردى جەرگىلىكتى بيۋدجەت قارجىسىنا وقىتۋ, باسپانامەن قامتۋ جانە باسقا الەۋمەتتىك قولداۋ تەتىكتەرىن قاراستىرعان ءجون. ەكىنشىدەن, مەديتسينالىق قىزمەتكەرلەر ءۇشىن سارالانعان جالاقى جۇيەسىن ەنگىزۋ قاجەت. ياعني جالاقى بارىنە بىردەي مولشەردە ەمەس, ءبىلىمى مەن بىلىكتىلىگىنە قاراي تولەنۋى كەرەك. مەملەكەت باسشىسىنىڭ قويىپ وتىرعان بۇگىنگى تالابى – حالىققا كورسەتىلەتىن مەديتسينالىق قىزمەت ساپاسىن ارتتىرۋ, تۇرعىنداردىڭ دەنساۋلىعىن جاقسارتۋ قاجەت, – دەيدى ا.عينيات.
مينيستر جالپى پراكتيكالىق دارىگەرلەردىڭ كاسىبي بىلىكتىلىگىن جەتىلدىرىپ, تەراپەۆتىك بەيىندەگى ءارتۇرلى پاتولوگياسى بار ناۋقاستارعا كومەك كورسەتۋگە بەت بۇرعانىن قالايدى. بۇل پاتسيەنتتەردىڭ ارنايى مامانداردىڭ قابىلداۋىنا كىرۋ كەزەگىنىڭ ۋاقىتىن ازايتار ەدى. اسپاپتىق دياگنوستيكانىڭ قولجەتىمدىلىگىن ارتتىرۋ ءۇشىن جىلجىمالى مەديتسينالىق كەشەندەردى ساتىپ الۋ ماسەلەسى شەشىمىن تابۋعا ءتيىس. اۋىل تۇرعىندارى ءۇشىن چەكاپ تۇرىندە كاسىبي تەكسەرۋلەر تىزبەسى كەڭەيتىلەدى. سكرينينگتەردىڭ قولجەتىمدىلىگىن, اۋىلدارداعى مەديتسينا قىزمەتىنە بىرقاتار ءتاريفتى ارتتىرۋ جوسپارلانىپ وتىر.
ا.عينيات اتىراۋ قالاسىنداعى اكۋشەرلىك-گينەكولوگيالىق, نەوناتالدىق كومەكتىڭ تولىق سپەكترى كورسەتىلەتىن 100 ورىندىق پەرزەنتحانا مەن 250 توسەكتىك وبلىستىق پەريناتالدىق ورتالىقتىڭ جۇمىسىنا نازار اۋداردى.
– رەسپۋبليكالىق كوميسسيا تەكسەرۋى كەزىندە اۋىلداردا تالاپقا ساي مەديتسينا نىساندارىنىڭ جوقتىعى بايقالدى. مەديتسينا قىزمەتكەرلەرىنە, اسىرەسە دارىگەرلەرگە, تۇرعىندارعا دا قولايلى جاعدايدىڭ جاسالماعانىنا كوز جەتتى. اكىمدىكتىڭ اقپاراتىنا سۇيەنسەك, مەديتسينا نىساندارىن سالۋ ءۇشىن ءتيىستى قۇجاتتار ازىرلەنىپ جاتىر, – دەدى مينيستر.
اتىراۋ وبلىسى
