ولار بويىنشا ازاپتاۋ جانە قىزمەتتى اسىرا پايدالانۋعا قاتىستى 243 قىلمىستىق ءىس قوزعالعان. سىبايلاس جەمقورلىققا قارسى قىزمەتتە 234 قىلمىستىق ءىس قارالىپ جاتىر.
«ۋاقىتشا ۇستاۋ يزولياتورلارىندا ادامداردىڭ قازا بولعانى تۋرالى توعىز جاعدايدى ارنايى پروكۋرورلار تەرگەۋگە الدى. اتالعان ىستەر اياسىندا ۇستالعاندار 9 لاۋازىمدى تۇلعا, ونىڭ ىشىندە 8 ادام ۇقكد قىزمەتكەرى جانە بىرەۋى پوليتسيا قىزمەتكەرى. ولار سوتتىڭ سانكتسياسىمەن قاماۋعا الىندى. ونىڭ ىشىندە الماتى وبلىسى پوليتسيا دەپارتامەنتىنىڭ عيماراتىندا ۇتىك قولدانىپ ازاپتاعان پوليتسەي بار. الماتى قالاسىندا دا ۇقكد-نىڭ التى قىزمەتكەرى ازاپتاۋدى قولداندى دەگەن كۇدىككە ءىلىندى. بۇعان قوسا, «ديكي» ارمان قىلمىستىق توبى ۇرلاپ كەتكەن 24 ازاماتتىڭ بارلىعى دەنە جاراقاتىن الىپ, ءبىر ادام قايتىس بولدى. الماتى وبلىسى ۇقكد-نىڭ تاعى ەكى قىزمەتكەرى بۇرىن ۋاقىتشا ۇستاۋ يزولياتورىندا ۇستالعان ادامدى ۇرىپ-سوققان. تەرگەۋ جالعاسۋدا», دەيدى باس پروكۋرور بەرىك اسىلوۆ.
ونىڭ ايتۋىنشا, رەسپۋبليكا بويىنشا بارلىعى 230 ادام قازا تاپتى, سونىڭ ىشىندە 19 اسكەري جانە قاۋىپسىزدىك كۇشتەرى. الماتى قالاسىندا قازا تاپقاندار سانى 139 ادام. ونىڭ ىشىندە 53 قايتىس بولعان ادامنىڭ ءولىمنىڭ ءمان-جايى انىقتالۋدا. ولار قالا اۋماعىندا ءارتۇرلى جاراقاتتارمەن, سونىڭ ىشىندە 48 – اتىس, 2 – پىشاق جاراقاتتارىمەن تابىلعان.
