دامۋعا بىرلىكتەن باسقا جول جوق

قازاقستان تاۋەلسىزدىگىن ەندى العان كەزدە الدىمەن ءمان بەرىلەتىن وزەكتى ماسەلەلەرگە باسىمدىق بەرىلگەنى ايان. ەلباسى نۇرسۇلتان نازارباەۆ قازاقتىڭ كەڭ دالاسىن جايلاعان ءتۇرلى ۇلتتار وكىلدەرىنىڭ اراسىنداعى تاتۋلىق پەن بىرلىكتى, تۇسىنىستىكتى نىعايتۋدى وزەكتى ماسەلە ەتىپ الدى. بۇل تەگىن ەمەس ەدى. جالپى مەملەكەتتى دامىتۋ رەفورمالارىن قولعا العاندا ەڭ كەرەگى سول قوعامدا ءومىر ءسۇرىپ وتىرعان ۇلتتار وكىلدەرىنىڭ تىنىشتىعى, بىرلىگى, تۇسىنىستىگى بولىپ تابىلادى. اتالارىمىز: «ءبىر كۇن ۇرىس بولعان ءۇيدىڭ قىرىق كۇن بەرەكەسى كەتەدى» دەگەن ەمەس پە؟ ىنتىماق بار جەردە مەملەكەتتە كوپ جاقسى ىستەر اتقارىلاتىنىن, ەكونوميكانىڭ, الەۋمەتتىك سالانىڭ قالىپتى داميتىندىعىن ءبىزدىڭ تاۋەلسىز ەلىمىزدىڭ تاريحى پاش ەتىپ وتىر. قازاقستان ءوزىنىڭ تاريحىندا كوپ ۇلت وكىلدەرى مەكەندەگەن ەل بولىپ قالىپتاستى. سوندىقتان قوعامدا ءتۇرلى ۇلت وكىلدەرىنىڭ سىيلاستىعىن, ءتۇسى­نىس­تىگىن ساقتاۋ ءۇشىن ءبىر كۇش قاجەت بولدى. ول – ەلباسىمىز نۇرسۇلتان نازارباەۆتىڭ باستاماسىمەن قۇرىلعان قازاقستان حالقى اسسامبلەياسى بولاتىن. الەمدەگى وقيعالارعا قاراپ وتىرىپ, ەلباسىنىڭ بۇل ساياساتىنىڭ ومىرشەڭ ءارى وزەكتى ەكەنىنە كوز جەتكىزەمىز. قازاقستان حالقى اسسامبلەيا­سىنىڭ ءوز ەرەكشەلىگى بار. ونىڭ توراعاسى مەملەكەت باسشىسى نۇرسۇلتان نازارباەۆتىڭ ءوزى بولىپ تابىلادى. ۇيىم مەملەكەت تاراپىنان قولداۋ تاۋىپ وتىر. ەكىنشىدەن, ەتنومادەني بىرلەستىكتەر جوعارىدان, بيلىكتىڭ ايتۋىمەن ەمەس, تومەننەن قولداۋ تاۋىپ, ءار ۇلت وكىلدەرى وزدەرىنىڭ ىنتا-ىقىلاسىمەن قۇرىپ جاتىر. پارلامەنت ماجىلىسىندەگى 107 دەپۋتاتتىڭ 9-ى قازاقستان حالقى اسسامبلەياسىنان باردى. ولار قازاقستانداعى بارلىق ۇلتتار وكىلدەرىنىڭ مۇددەسىن قورعايدى, ەلدىڭ بىرلىگىن ويلايدى. قوستاناي وبلىسىنىڭ ورتا­لىعىندا 18 ەتنومادەني ورتالىقتار جۇمىس ىستەيدى. ال وبلىستىڭ وزگە اۋداندارى مەن قالالارىندا تاعى دا 60 وسىنداي ۇيىمدار بار. ولاردىڭ بارلىعى دا وزدەرىنىڭ ءتىلىن, ءداستۇرىن, مادەنيەتىن ساقتاۋ ءۇشىن جۇرگىزەتىن شارالاردى وتكىزگەندە مەملەكەتتەن قارجىلاي قولداۋ تابادى. ءبىز عىلىمي-ساراپتاۋ توبىنىڭ مۇشەلەرى اۋداندار مەن قالالارعا ءجيى شىعىپ, ەتنومادەني ورتالىقتار جۇمىسىمەن تانىسامىز, تۇرعىندارمەن كەزدەسەمىز. جاقىندا ا.بايتۇرسىنوۆ اتىن­داعى قوستاناي مەملەكەتتىك ۋنيۆەرسيتەتىندە دە ستۋدەنتتەر اسسامبلەياسى قۇرىلدى. وندا 7 ۇلتتىڭ وكىلى باس قوسادى. ولار قۇرعان ەتنومادەني بىرلەستىك قىزىقتى شارالاردى باستاپ تا كەتتى. ماقساتى  – قازاقستاندىق ءپاتريوتيزمدى ناسيحاتتاۋ, ەلدىڭ دامۋىنا ۇلەس قوسۋ. قالقامان جاقىپ, وبلىستىق قازاقستان حالقى اسسامبلەياسى عىلىمي-ساراپتاۋ كەڭەسىنىڭ مۇشەسى, ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ پروفەسسورى. قوستاناي.