– ءبىر تاۋلىك ىشىندە 122 ادام قۇتقارىلدى. ونىڭ ىشىندە 7 ءسابي بار. قارعا باتىپ قالعان 9 اۆتوكولىكتى شىعارىپ الدىق. مىسالى, 12 ناۋرىزدا تاڭعى ساعات 04.50-دەن 11.45-كە دەيىن قۇتقارۋشىلار ارقالىق پەن الۋا اۋىلىنىڭ اراسىنداعى كۇرە جولدا 8 جەڭىل اۆتوكولىك پەن 49 ادامدى ەۆاكۋاتسيالادى. 21 جولاۋشى ارقالىققا, قالعاندارى جاقىن ماڭايداعى ەلدى مەكەندەرگە ورنالاستىرىلدى, – دەپ مالىمدەدى وبلىستىق تج-نىڭ ءباسپاسوز قىزمەتى.
ءدال وسى كۇنى ناۋىرزىم اۋدانىنداعى ءدامدى اۋىلىنان 15 شاقىرىم قاشىقتا جاتقان تاس جولدىڭ بويىندا 50 جولاۋشىسى بار 17 جەڭىل اۆتوكولىك پەن 1 جۇك كولىگى قار قۇرساۋىندا قالعان. قۇتقارۋ قىزمەتىنىڭ جىگىتتەرى التى ساعات بويى ارپالىسىپ ءجۇرىپ جولاۋشىلاردىڭ ءبارىن امان-ەسەن ءدامدى مەكتەبىندە ورنالاسقان جىلىنۋ پۋنكتى مەن اۋىل تۇرعىندارىنىڭ ۇيلەرىنە جەتكىزدى. جولاۋشىلار جول اشىلعانشا وسى اۋىلدا ىستىق اس ءىشىپ, تىنىعىپ ۇيىقتاپ العان. توتەنشە جاعداي دەپارتامەنتى وكىلدەرىنىڭ ايتۋىنشا, قۇتقارۋ وپەراتسياسى ويداعىداي وتكەندىكتەن, جول ۇستىندە قالعانداردىڭ ءبارى مەديتسينالىق كومەكتەن باس تارتقان, دەنەسىن ۇسىك شالعان ەشكىم جوق.
جولاۋشىلاردىڭ ىشىندە جاس بالا ەرتكەن ەكى انا ءدامدى اۋىلىنىڭ ۋچاسكەلىك ينسپەكتورى نۇرجان يسمادياروۆتىڭ ۇيىنە تۇنەپ شىعىپتى. 4 جاسار جانە جاسقا تولماعان ەكى بالاسى بار سىمبات دۇيسەنوۆا سول كۇنى قوستانايدان تورعايعا باراتىن تاكسيگە مىنگەن ەكەن.
– قوستانايدان شىققاندا كۇن اشىق بولاتىن. دامدىگە جەتە بەرگەندە اۋا رايى كۇرت بۇزىلىپ, قارلى بوران كوتەرىلىپ كەتتى. سالدەن سوڭ كولىك قارعا باتىپ, مۇلدە قوزعالا الماي قالدىق. جول تالعامايتىن اۋىر كولىكپەن كومەككە جەتكەن پوليتسيا قىزمەتكەرى بىردەن ۇيىنە اپارىپ, ەت اسىپ قۇدايى قوناق ەتىپ, قۇرمەت كورسەتتى. وزدەرىنىڭ دە سەگىز ايعا تولعان نارەستەلەرى بار ەكەن, – دەدى جاس انا.
جورگەكتەگى ءسابيىن باۋىرىنا قىسقان كۇلجامال تايماسوۆانىڭ, كەرىسىنشە, امانگەلدىدەن قوستانايعا قاراي كەلە جاتقان بەتى ەكەن. ءدال وسى ءدامدىنىڭ تۇسىنان وتە بەرگەندە قارلى بوراننىڭ استىندا قالىپتى.
– ماشينامىز توقتاپ قالعاندا قاتتى قورقىپ كەتتىم. ۋچاسكەلىك ينسپەكتورعا العىسىم شەكسىز. زايىبى اقمارال دا قولى اشىق, قوناقجاي ادام ەكەن. بالام ەكەۋمىزدى ءوز تۋعانىنداي قارسى الدى, – دەدى كۇلجامال.
قوناقتارىن ۇيىنە جايعاستىرعان نۇرجان يسمادياروۆ اۋىلدىڭ ماڭايىندا قۇتقارۋ شارالارىن جۇرگىزىپ جاتقان تج قىزمەتكەرلەرىنە كومەكتەسۋ ءۇشىن قايتادان كۇرە جولدىڭ بويىنا كەتەدى. ءتۇنى بويى كوز ىلمەگەن قۇتقارۋشىلار جولاۋشىلاردىڭ ءبارىن مەكتەپتىڭ جىلى عيماراتى مەن اۋىل تۇرعىندارىنىڭ ۇيلەرىنە ورنالاستىرعان.
قوستاناي وبلىسى
