تسيفرلى ترانسفورماتسيا – جۇيەلى رەفورمالاردى ىسكە اسىرۋدىڭ, مەملەكەتتىك باسقارۋدى جەتىلدىرۋدىڭ جانە حالىق سەنىمىن ارتتىرۋدىڭ ءتۇيىندى قۇرالدارىنىڭ ءبىرى. بۇل ءۇردىستى بارىنشا ءتيىمدى, قولايلى جانە ءونىمدى ىسكە اسىرۋ ءۇشىن تسيفرلى وفيتسەرلەر ينستيتۋتى قۇرىلىپ, بىلتىر تسيفرلاندىرۋعا جاۋاپتى ۆيتسە-مينيسترلەرگە ارنالعان (CDO) KPI جۇيەسى ەنگىزىلگەن ەدى.
«اسىرەسە بۇگىنگى جاعدايدا CDO – يننوۆاتسيالىق جانە تەحنولوگيالىق ەكونوميكانى قالىپتاستىرۋ جولىندا جۇيەلى وزگەرىستەردىڭ درايۆەرى. ولار وزدەرى قاداعالايتىن سالالاردا, ياعني اۋىل شارۋاشىلىعى, ونەركاسىپ, ەنەرگەتيكا جانە تاعى باسقا سالادا يننوۆاتسيالاردى ەنگىزىپ, جاھاندىق ۇردىستەردەن قالماي يننوۆاتسيالىق ەكوجۇيەنى قالىپتاستىرىپ, مىندەتتەردى جۇزەگە اسىرۋ ءۇشىن وتاندىق ستارتاپتاردى تارتا وتىرا حالىقارالىق BigTech كومپانيالار مەن وتاندىق عىلىمي قاۋىمداستىقتىڭ مۇمكىندىكتەرىن كەڭىنەن پايدالانۋ ءتيىس», دەدى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين.
ۆەدومستۆو باسشىسى ايتقانداي, ەلدى مەكەندەردى ينتەرنەتپەن قامتۋ, بايلانىس ساپاسىن ارتتىرۋ جانە اقپاراتتىق قاۋىپسىزدىكتى قامتاماسىز ەتۋ باعىتىندا دا ءبىراز جۇمىس اتقارىلدى. اتاپ ايتقاندا, باس شاھار مەن الماتى, شىمكەنت قالالارىندا سىناقتان وتكىزىلىپ جاتقان 5G بۋىن تەحنولوگياسىن بيىل وسى قالالاردا كوممەرتسيالىق ماقساتتا ەنگىزۋ كوزدەلىپ وتىر. 2021 جىلدىڭ قورىتىندىسىنا سايكەس, 1 257 اۋىل تالشىقتى-وپتيكالىق بايلانىس جەلىلەرى (توبج) ارقىلى كەڭ جولاقتى ينتەرنەتپەن, 928 ەلدى مەكەن ءموبيلدى ينتەرنەتپەن قامتىلدى.
بايلانىس ساپاسىن ارتتىرۋعا دا باسا نازار اۋدارىلىپ جاتىر دەيدى مينيسترلىك وكىلدەرى. بىلتىر 611 ەلدى مەكەندە ءموبيلدى ينتەرنەت جاقسارتىلسا, بيىل دا 157 اۋىلداعى ينتەرنەت ساپاسىن ارتتىرۋ جۇمىستارى جوسپارلانعان. 2021 جىلى ۆەدومستۆو ماماندارى بايلانىس ساپاسى بويىنشا 562 تەكسەرىس جۇرگىزىپ, بەكىتىلگەن پارامەترلەردى بۇزعانى ءۇشىن بايلانىس وپەراتورلارىنا 132 ملن تەڭگە ايىپپۇل سالىندى. بۇل ورايدا بيىل ساپاسىز بايلانىسقا ايىپپۇل كولەمىن 1 500 اەك-كە دەيىن كوتەرۋ جوسپاردا بار.
قازىر كاسپي تەڭىزىنىڭ تۇبىندە توبج سالۋ جۇمىستارى قولعا الىنىپ, بۇل – ەلىمىزدى ەۋرازيا ورتالىعىنداعى تسيفرلى حابقا اينالدىرۋ جولىنداعى ماڭىزدى جانە اۋقىمدى جوبالاردىڭ بىرىنە اينالدىرادى.
سونداي-اق بىلتىر قازاقستان +997 تەلەفوندى كودىن رەزەرۆكە الىپ, بىراق ءالى دە +7 ايماعىندا قالۋ مۇمكىندىگى بار. وسى باعىتتا قۇزىرلى ورگان ماماندارى رەسەيلىك تاراپپەن جانە حالىقارالىق ەلەكتربايلانىس وداعىمەن ءتيىستى جۇمىستار جۇرگىزىپ جاتىر.
مەملەكەتتىك قىزمەتتەردى جەتىلدىرۋ, بيزنەس-پروتسەستەرگە رەينجينيرينگ جاساۋ جۇمىستارى دا قارقىندى ءجۇرىپ جاتىر. بۇل ورايدا 110 بيزنەس-پروتسەسكە اناليز جاسالىپ, قاجەتسىز ۇدەرىستەر انىقتالدى. قازىر وزەكتى پروتسەستەردى تسيفرلاۋ باستالىپ, وڭ ناتيجەسى بايقالىپ جاتىر.
بۇگىندە بىرقاتار ماڭىزدى مەملەكەتتىك قىزمەت پرواكتيۆتى تۇردە كورسەتىلەدى. الايدا ءمينيستردىڭ ايتۋىنشا, بارلىق قىزمەت پرواكتيۆتى فورماتتا ۇسىنىلۋى ءتيىس, دەمەك ازاماتتار ءتۇرلى مەكەمەلەرگە جۇگىنىپ, تابان توزدىرماۋى كەرەك. وسى باعىتتا مينيسترلىك 2022 جىلى تاعى 20 پرواكتيۆتى قىزمەت ەنگىزۋدى جوسپارلاپ وتىر.
القا ءماجىلىسى بارىسىندا ەلىمىزدەگى اەروعارىش ونەركاسىبى سالاسىنداعى ماسەلەلەر, گەودەزيا جانە كارتوگرافيا سالاسىندا اتقارىلىپ جاتقان جۇمىستار مەن «حالىق ۇنىنە قۇلاق اساتىن مەملەكەت» تۇجىرىمداماسى اياسىندا جۇزەگە اسىپ جاتقان جوبالار, تسيفرلى سەرۆيستەردىڭ ەنگىزىلۋى جونىندەگى ماڭىزدى ماسەلەلەر پىسىقتالىپ, جان-جاقتى تالقىلاندى.
