باسقوسۋدا مەكتەپكە دەيىنگى ساپالى جانە ورتا ءبىلىم الۋ, مەديتسينالىق قىزمەت, جەڭىلدەتىلگەن يپوتەكالىق نەسيەلەندىرۋگە قول جەتكىزۋ, كوپبالالى وتباسىلارمەن جانە ەرەكشە كۇتىمگە مۇقتاج بالالارمەن جۇمىس ىستەيتىن ۇەۇ اراسىندا مەملەكەتتىك الەۋمەتتىك تاپسىرىستى ورنالاستىرۋدىڭ تيىمدىلىگى ماسەلەلەرى تالقىلاندى.
كەزدەسۋگە قاتىسۋشىلار قازىرگى كوپبالالى انالارعا بەرىلەتىن اتاۋلى الەۋمەتتىك كومەكتى الەۋمەتتىك مارتەبەسىنە قاراماستان, بىرىڭعاي جاردەماقىعا اۋىستىرۋ ماسەلەسىنە جەكە توقتالدى. قالا اكىمى كوپبالالى انالاردىڭ ۇسىنىستارىن ەكشەلەپ, ەڭبەك جانە حالىقتى الەۋمەتتىك قورعاۋ مينيسترلىگىمەن تالقىلاۋعا ۋادە بەردى.
كەزدەسۋدە كوتەرىلگەن وتكىر ماسەلەنىڭ ءبىرى بالالاردى الەۋمەتتىك مارتەبەسىنە قاراماستان, ىستىق تاماقپەن قامتاماسىز ەتۋ مەن ونىڭ قۇنارلىلىعىن ارتتىرۋ بولدى. بۇل ۇسىنىسقا ە.دوساەۆ مەملەكەت باسشىسىنىڭ تاپسىرماسىنا سايكەس «بالالار جىلى» اياسىندا اكىمدىك قاجەتتى جۇمىس جۇرگىزگەنىن, رەسۋرستار تاپقانىن, 2022 جىلدىڭ 1 قىركۇيەگىنەن باستاپ الماتىداعى مەملەكەتتىك مەكتەپتەردىڭ بارلىق باستاۋىش سىنىپ وقۋشىلارى الەۋمەتتىك مارتەبەسىنە قاراماستان, تەگىن ىستىق تاماقپەن قامتاماسىز ەتىلەتىنىن جەتكىزدى.
«بالالاردىڭ ساپالى تاماقتانۋىن ۇيىمداستىرۋ ءۇشىن ءبىلىم باسقارماسى تەڭگەرىمدى جانە ءارتۇرلى راتسيوندى قۇرۋ ماسەلەسىن پىسىقتادى. قارجىلاندىرۋ ماسەلەسى جەرگىلىكتى بيۋدجەتتى ناقتىلاۋ شەڭبەرىندە ءماسليحاتتا قارالادى», دەدى ە.دوساەۆ.
مەكتەپتەردە وقۋشى ورىندارىنىڭ جەتىسپەۋشىلىگى جانە بالاباقشالارعا كەزەك تاقىرىبى ەرەكشە پىكىرتالاس تۋدىردى. بۇگىندە قالا مەكتەپتەرىندە 19 611 ورىن, بالاباقشالاردا 41 080 ورىن جەتىسپەيدى. بالا تۋدىڭ جوعارى بولۋىنا جانە حالىقتىڭ مەگاپوليسكە بەلسەندى كوشۋىنە بايلانىستى جىل سايىنعى ءوسىم تيىسىنشە 15 مىڭ جانە 8 مىڭ بالانى قۇرايدى.
«الماتىدا مەكتەپتەر مەن بالاباقشالاردى سالۋعا بوس جەرلەر مۇلدەم جەتىسپەيدى, ال قۇرىلىس قارقىنى تەك جىل سايىنعى ءوسىمدى جابۋعا مۇمكىندىك بەرەدى», دەپ اتاپ ءوتتى قالا باسشىسى.
الماتى قالاسىنىڭ اكىمى بيىل مەكتەپتەردە 15 461 ورىنعا, بالاباقشالاردا 39 520 ورىنعا دەيىن ورىن جەتىسپەۋشىلىگى ازاياتىنىن ايتىپ وتىر. تاياۋ ۋاقىتتا اكىمدىك وسى ماسەلەلەردى شەشۋدى جەدەلدەتۋ ءۇشىن قوسىمشا شارالار ازىرلەپ, ۇسىناتىن بولدى.
كەزدەسۋ بارىسىندا ەرەكشە كۇتىمدى قاجەت ەتەتىن بالالارمەن جۇمىس ىستەۋ, مۇگەدەكتىكتى ەرتە انىقتاۋ ماسەلەلەرى مەن سونىڭ سالدارىنان بالالاردى ودان ءارى الەۋمەتتەندىرۋدىڭ مۇمكىن ەمەستىگى, تيىمسىزدىگى ءسوز بولدى.
«بالاباقشالار مەن مەكتەپتەردە بالالاردى وڭالتۋ, ەمدەۋ, ينكليۋزيۆتى قولداۋ – بۇل اكىمدىكتىڭ الەۋمەتتىك بلوك باسقارمالارى جۇمىسىنىڭ نەگىزگى مىندەتى. بالالاردى ينكليۋزيۆتى دامىتۋدىڭ قازىرگى باعدارلاماسى قايتا قارالاتىندىقتان, وسى جۇمىسقا قالانىڭ مۇددەلى قوعامدىق قورلارى مەن ۇەۇ-لاردى بەلسەندى قاتىسۋعا شاقىرامىن», دەدى مەگاپوليس باسشىسى.
الماتى
