قۇرمانعازى اۋدانىندا 5 ناۋرىزدان بەرى ەلەكتر ەنەرگياسىنداعى اقاۋ ءالى تولىق قالپىنا كەلتىرىلگەن جوق.
«جوندەۋ جۇمىستارىن جۇرگىزۋدىڭ ناتيجەسىندە قۇرمانعازى اۋدانىنىڭ ورتالىعىنداعى شاعىن اۋداندارعا ەلەكتر ەنەرگياسىن كەزەڭ-كەزەڭمەن بەرۋ ىسكە اسىرىلدى. قازىر قۇرمانعازى, بايدا, ورلى, شورتانباي, دىڭعىزىل, قيعاش, سۇيىندىك, اسان, ازعىر, نۇرجاۋ, جاڭاتالاپ, تەڭىز, كۋدرياشوۆ, ەڭبەكشى, ماقاش, سافون, اقكول وكرۋگتەرىنە توك كوزى بەرىلدى. ال, كوپتوعاي وكرۋگىندە قۇرامىندا 6 ادام, 4 تەحنيكا بار 1 بريگادا, بىرلىك اۋىلدىق وكرۋگىندە 3 بريگادانىڭ قۇرامىندا 14 ادام مەن 3 تەحنيكا ەلەكتر ەنەرگياسىن, كەيبىر ەلدى مەكەندەردە ەلەكتر جانە بايلانىس جەلىلەرىن قالپىنا كەلتىرۋ جۇمىستارىن جالعاستىرىپ جاتىر. «قازاقتەلەكوم» اق-نىڭ 27 ستانساسىنىڭ 20-سىندا بايلانىس ورناتىلدى», دەپ حابارلادى اۋدىندىق اكىمدىك تاراتقان اقپاراتتا.
قۇرمانعازى اۋدانىندا ەلەكتر جەلىلەرىن قالپىنا كەلتىرۋ جۇمىستارىنا «اتىراۋ-جارىق» اق-نىڭ 8 بريگاداسى (56 ادام, 20 تەحنيكا) جانە «قازاقستان تەمىرجولى» اق ەلەكترمەن قامتۋ ءبولىمىنىڭ 1 بريگاداسى (15 ادام, 6 تەحنيكا) جۇمىلدىرىلىپ وتىر.
«تابيعي اپاتتىڭ سالدارىنان ءبىر 22 مەترلىك 35 كۆت, التى 22 مەترلىك 10 كۆت, 400-گە جۋىق 11 مەترلىك 10 كۆت ەلەكتر باعاناسى قۇلاعان. وسىعان بايلانىستتى مەديتسينا مەكەمەلەرى مەن وزگە دە الەۋمەتتىك ماڭىزى بار نىسانداردا ۋاقىتشا ديزەل گەنەراتورى ىسكە قوسىلعان», دەپ حابارلادى وڭىرلىك كوممۋنيكاتسيالار قىزمەتى.
