ول مەكتەپكە دەيىنگى جاستاعى بارلىق بالانىڭ اقىل-وي تاربيەسىنە باسا ءمان بەرىپ, ونىڭ وزىندىك ادىستەمەسىن جاساپ, بۇگىندە تاجىريبەگە ەنگىزىپ وتىر. ءوزى دە سانالى تۇردە بالا تاربيەشىسى بولۋدى تاڭداپ, ماماندىعىنا ادالدىق تانىتىپ كەلەدى. ۇرپاق تاربيەسىنىڭ ماڭىزدىلىعىن ءبىرىنشى جولعا قويعان مامان ون ەكى جىلدان بەرى ءبىر سالادا ەڭبەك ەتۋدە. ەلىمىزدىڭ ءال-فارابي, اباي قۇنانباي ۇلى, جۇسىپبەك ايماۋىتوۆ جانە وزگە دە تاريحي تۇلعالاردىڭ بالا تاربيەسى تۋرالى وزەكتى ويلارىن نەگىزگى تەمىرقازىق ەتىپ الىپ, جۇيەلى جۇمىس جۇرگىزۋدە.
جوعارى ساناتتى تاربيەشى ءوز سوزىندە اقىل-ويدىڭ دامۋى بالانىڭ جاسى مەن تاجىريبەسىنىڭ مولايۋىنا بايلانىستى ەكەنىن دە اتاپ ءوتتى. ونىڭ ايتۋىنشا, ءتۇرلى تاربيەلىك قۇرالداردىڭ اسەرىنە بايلانىستى بالانىڭ ويلاۋ ارەكەتىندە پايدا بولاتىن سان جانە ساپالىق وزگەرىستەردىڭ جيىنتىعى دا اقىل-ويدىڭ دامۋىنا اسەر ەتەدى.
سونىمەن قاتار اينۇر بەكبولاتقىزى سەنسورلىق تاربيە تۋرالى دا ءوز ويىن ايتتى. بۇل باعىتتاعى بىرقاتار تاجىريبەسىمەن ءبولىستى.
«بۇل – تۇيسىك پەن قابىلداۋدىڭ دۇرىس باعىتتا دامۋى. بالانىڭ سەنسورلىق پروتسەستەرىنىڭ دامۋىنا مۇمكىندىك تۋدىراتىن ءىس-ارەكەتتىڭ ءتيىمدى ءتۇرى – كوركەم سۋرەت سالۋ, سازبالشىقتان جانە ەرمەكسازدان ءتۇرلى مۇسىندەر جاساۋ, سالىنعان سۋرەتتەردى, ورنەكتەردى قيىپ, جەلىمدەۋ ارەكەتتەرى, بىرلەسكەن ديداكتيكالىق ويىندار. بۇل پەداگوگيكالىق باسشىلىقپەن ۇيىمداستىرىلعان ءىس-ارەكەت بولىپ ەسەپتەلەدى. اقىل-وي تاربيەسى اينالاداعى تىرشىلىك قۇبىلىستارى جايلى بالاعا دۇرىس تۇسىنىك قالىپتاستىرۋعا جانە تانىمدىق-پسيحيكالىق پروتسەستەردى دامىتۋعا باسا ءمان بەرەدى», دەيدى تاربيەشى ءوز سوزىندە.
ا.قوجامقۇلوۆانىڭ بۇل سالادا جەتكەن جەتىستىكتەرى دە از ەمەس. Center of Excellence NIS Nazarbayev Intellectual Schools بويىنشا «قاشىقتان وقۋدى ۇيرەنەمىن» تاقىرىبى اياسىندا 40 ساعات كولەمىن راستايتىن سەرتيفيكاتپەن ماراپاتتالعان. سونداي-اق نۇر-سۇلتان قالاسىندا وتكەن «كۇز مەزگىلىنىڭ قىزىقتى وقيعالار قامالى» ءىى رەسپۋبليكالىق بايقاۋىندا «سۋرەت سالۋ» نوميناتسياسى بويىنشا جۇلدەگەر دايىنداعانى ءۇشىن ءى دارەجەلى ديپلوم العان. بۇدان وزگە دە بايقاۋلاردا بالا تاربيەسى تۋرالى ادىستەمەسىمەن توپ جارىپ, جۇلدەگەر اتانىپ جۇرگەن اينۇر بەكبولاتقىزىنىڭ «قۇلپىناي» كىشى توبىنداعى شاكىرتتەرى دە بيىك بەلەستەردەن كورىنۋدە. ماسەلەن, وتكەن جىلى نۇر-سۇلتان قالاسىندا وتكەن ءىىى رەسپۋبليكالىق «قىس تىنىسى» بايقاۋىندا «سۋرەت سالۋ» اتالىمى بويىنشا ميراس جولدىحان 1-ورىندى جەڭىپ السا, «مەنىڭ سۇيىكتى بالاباقشام» اتتى بالالاردىڭ ونلاين شىعارماشىلىق بايقاۋىندا «مەن بولاشاق عالىممىن» نوميناتسياسى بويىنشا نۇرسايا تۋلەەۆا ءى دارەجەلى ديپلوممەن ماراپاتتالعان. قازىرگى كەزدە دە كوپتەگەن شاكىرت تاربيەلەپ كەلەدى.
بالالاردىڭ اقىل-وي تاربيەسىن قالىپتاستىرۋدى ءبىرىنشى ورىنعا قويىپ, سول تۇرعىدا تالماي ەڭبەك ەتىپ كەلە جاتقان بىلىكتى مامان ءاردايىم ءوز بىلگەنىن جاس تاربيەشىلەرگە ۇيرەتۋدەن جالىقپايدى. بالا تاربيەشىسى بولۋدى باقىت دەپ بىلگەن اينۇر بەكبولاتقىزى ەڭبەك ەتپەي, بيىك ناتيجەلەرگە جەتۋ مۇمكىن ەمەس ەكەنىن, مۇنىڭ ءتۇپ نەگىزى جاۋاپكەرشىلىكتە جاتقانىن ايتادى.
«تاربيەشى دەگەن جاس ۇرپاقتىڭ بويىنا تاربيەنىڭ العاشقى نەگىزدەرىن قالىپتاستىرا الاتىن ادامگەرشىلىگى جوعارى, مادەنيەت پەن عىلىم جەتىستىكتەرىن دۇرىس باعالاي الاتىن, ادەبيەت پەن ونەردىڭ, تەحنيكانىڭ دامۋ جاعدايىن بىلەتىن جانە ونى بالالارعا تۇسىندىرە الاتىن ادام بولۋى كەرەك. تاربيەشىنىڭ بويىندا بولاتىن اقىلدىلىق, مادەنيەتتىلىك, كاسىبي شەبەرلىك, تارتىپتىلىك پەن بالالارعا دەگەن سۇيىسپەنشىلىك تاربيەلەنۋشىلەرگە ءاردايىم ۇلگى بولۋى كەرەك دەپ ويلايمىن», دەيدى ا.قوجامقۇلوۆا.
جامبىل وبلىسى
