«سپورت پاديشاسى» دەپ اتالىپ كەتكەن جەڭىل اتلەتيكانىڭ ءۇش قارعىپ سەكىرۋ دودالارىندا دارالانىپ جۇرگەن ولگا رىپاكوۆانىڭ جەتىستىگى, كەدەرگىلەر ارقىلى جۇگىرۋدەگى تۇڭعىش ازيا چەمپيونى ايگەرىم شىنازبەكوۆانىڭ جەڭىسى, بىرەر اي بۇرىن شاحماتتان الەم چەمپيوناتىندا توپ جارعان ءبيبىسارا اساۋباەۆانىڭ, بوكسشى نازىم قىزايبايدىڭ, اۋىر اتلەت جازيرا جاپپارقۇلدىڭ, سونىمەن قاتار كوركەم گيمناستيكا, كۇرەس جانە باسقا دا سپورت تۇرلەرىندەگى قىزدارىمىزدىڭ قازىرگى تاڭدا الەمدەگى كەز كەلگەن سپورتشىنىڭ باستى باسەكەلەسىنە اينالعالى قاشان؟! ال بۇل سپورت تۇرلەرىنىڭ ەلىمىزدە كەڭ تارالىپ, بۇقارالىق سيپاتقا يە بولۋىنا نە اسەر ەتتى دەپ ويلايسىز؟ ارينە, بىرىنشىدەن, مەملەكەتتىڭ سپورتقا ەرەكشە كوڭىل ءبولۋى بولسا, ەكىنشىدەن, وسى سپورتتىڭ تۇڭعىش چەمپيوندارى ەرەكشە ىقپال ەتتى دەپ نىق سەنىممەن ايتا الامىز.
ماسەلەن, كوركەم گيمناستيكادان قازاقستان ۇلتتىق قۇراماسىنىڭ حالىقارالىق ارەنالارداعى بۇگىنگى كۇنگە دەيىنگى ءىرى جەتىستىكتەرى – افينا وليمپياداسىنىڭ ءتورتىنشى, بەيجىڭ وليمپياداسىنىڭ بەسىنشى ورىن يەگەرى, داڭقتى گيمناسشى ءاليا ءجۇسىپوۆانىڭ جەتىستىكتەرىمەن تىكەلەي بايلانىستى ەكەنىن ەشكىم جوققا شىعارا المايدى. ول قازاق قىزدارىنىڭ كوركەم گيمناستيكامەن اينالىسىپ قانا قويماي, الەم ۇزدىكتەرىمەن جۇلدەگە تالاسا الاتىنىن دالەلدەپ بەردى. ءاليا قازاقستاننىڭ توعىز دۇركىن چەمپيونى, سونىمەن قاتار الەم كۋبوگى, ازيا چەمپيوناتى, جازعى ۋنيۆەرسيادا ويىندارىندا جۇلدە الىپ, گيمناستيكانىڭ كوپسايىس تۇرىنەن الەمدەگى ەڭ ۇزدىك ون سپورتشىنىڭ قاتارىنا ەنگەن العاشقى قازاق قىزى.
ءاليا ءجۇسىپوۆانىڭ كوركەم گيمناستيكاداعى وسىنداي تاماشا جەتىستىگىنەن باستاپ بۇل سپورت ءتۇرى قازاقستاندا كەڭ قانات جايا باستادى. ال ءاليانىڭ ءوزى سپورتتىق كارەراسىن اياقتاعان سوڭ شىمكەنتتە سپورت مەكتەبىن اشىپ, باپكەرلىككە بەت بۇردى. كەيىننەن كوركەم گيمناستيكادان قازاقستان ۇلتتىق قۇراماسىنىڭ باس جاتتىقتىرۋشىسى بولىپ تاعايىندالدى.
قازىرگى ۋاقىتتا شاكىرتتەرىنىڭ دە ناتيجەسى كوڭىلگە قۋانىش سىيلايدى. ماسەلەن, ريو وليمپياداسىنىڭ قاتىسۋشىسى ءسابينا اشىربەكوۆا – ازيا ويىندارىنىڭ بىرنەشە دۇركىن جۇلدەگەرى, 2014 جىلعى ينچحونداعى ازيا ويىندارىنىڭ قولا جۇلدەگەرى اتانسا, توكيو وليمپياداسىندا باق سىناعان الينا ءادىلحانوۆا دا ازيا ويىندارى مەن ازيا چەمپيوناتىنىڭ جەڭىمپازى.
قازاقستان مانەرلەپ سىرعاناۋ سپورتىنىڭ جارىق جۇلدىزىنا اينالعان ەليزابەت تۇرسىنباەۆا قازاق قىزدارى ىشىندە جاسوسپىرىمدەر جانە ەرەسەكتەر اراسىنداعى وليمپيا ويىندارىنا قاتىسىپ, جۇلدە العان تۇڭعىش سپورتشى. 2016 جىلى نورۆەگيانىڭ ليللەحاممەر قالاسىندا وتكەن جاسوسپىرىمدەر وليمپياداسىندا ول رەسەيلىك سپورتشىلاردى العا جىبەرىپ, قولا جۇلدەنى قاناعات تۇتقان ەدى.
وتانداسىمىز ەرەسەكتەر دۋىنا اۋىسقاندا دا جۇلدەدەن شاشاۋ شىعارعان جوق. كەيىنگى 6-7 جىلدا 30-عا جۋىق تۋرنيرگە قاتىسىپ, تەڭ جارتىسىندا ۇزدىكتەر قاتارىنان كورىندى. 2019 جىلدىڭ ناۋرىزىندا سايتامادا (جاپونيا) وتكەن مانەرلەپ سىرعاناۋدان الەم چەمپيوناتىندا كۇمىس مەدال الىپ, نەگىزگى باعدارلامادا 4 اينالىم سالحوۆ (4S) ەلەمەنتىنە سەكىردى. ول ءتورت اينالىم ەلەمەنتكە سەكىرگەن العاشقى مانەرلەپ سىرعاناۋشى ايەل رەتىندە تاريحقا ەندى. بۇعان دەيىن مانەرلەپ سىرعاناۋ تاريحىندا 16 جاستان اسقان بويجەتكەندەر اراسىندا ەشكىم ءتورت اينالىم ەلەمەنتكە سەكىرمەگەن. سونىمەن قاتار تۇرسىنباەۆا 2019 جىلى كراسنويارسكىدە (رەسەي) وتكەن قىسقى ۋنيۆەرسيادا مەن اناحايمدا (اقش) ۇيىمداستىرىلعان ءتورت قۇرلىق چەمپيوناتىندا ەكىنشى ورىن يەلەندى.
جازيرا جاپپارقۇل – اۋىر اتلەتيكادان قازاق قىزدارى اراسىنان الەم چەمپيوناتىنىڭ جانە وليمپيا ويىندارىنىڭ كۇمىس جۇلدەسىن جەڭىپ العان تۇڭعىش سپورتشى. سونىمەن قاتار ول 2010 جىلى سينگاپۋردە وتكەن جاسوپىرىمدەر اراسىنداعى ءبىرىنشى جازعى وليمپيا ويىندارىندا دا چەمپيون اتانعان العاشقى قازاق قىزى سانالادى.
2001 جىلدان باستاپ اۋىر اتلەتيكاعا دەن قويعان جەرلەسىمىز سينگاپۋردە 63 كيلو سالماق دارەجەسى بويىنشا التىن مەدال يەلەنسە, 2012 جىلى گۆاتەمالادا وتكەن جاسوسپىرىمدەر اراسىنداعى الەم بىرىنشىلىگىندە دە چەمپيون اتاندى. 2013 جىلى ميانماداعى جاستار اراسىنداعى ازيا چەمپيوناتىندا جازيرا قوسسايىستا 232 كيلو زىلتەمىردى ەڭسەرىپ, كۇمىس مەدال الدى. ال 2014 جىلدان باستاپ ەرەسەكتەر جارىسىنا قاتىسا باستاعان ول سول جىلعى الماتىداعى الەم چەمپيوناتىندا كۇمىس جۇلدە ەنشىلەپ, ءوز اتىن قازاقستان اۋىر اتلەتيكا تاريحىنا التىن ارىپپەن جازدىردى. اراعا ەكى جىل سالىپ وتانداسىمىزدىڭ ريو تورىندە دە كۇمىسكە قول جەتكىزگەنى بارشا جانكۇيەردىڭ ەسىندە بولسا كەرەك.
شاحماتتان قازاق قىزدارى الەمدىك جارىستا ۇنەمى ولجا سالىپ جۇرگەنىنە ءبىرشاما ۋاقىت بولدى. وتانداستارىمىز جىل سايىن جانكۇيەرلەرىن قۋانتىپ, ءتۇرلى قۇرلىق جارىستارىندا ۇزدىكتەر قاتارىنان تۇسپەي كەلەدى. سونىڭ ءبىر دالەلى رەتىندە بىلتىر پولشا استاناسى ۆارشاۆادا وتكەن شاحماتتىڭ بليتس تۇرىنەن ايەلدەر اراسىنداعى الەم چەمپيوناتىندا باس جۇلدەنى جەڭىپ العان 17 جاستاعى ءبيبىسارا اساۋباەۆانى ەرەكشە اتاپ وتۋگە بولادى. ول وسىنداي تاماشا جەتىستىگىنىڭ ارقاسىندا قازاقستاندىق شاحماتشىلار اراسىنان ەرەسەكتەر باسەكەسىندە دۇنيەجۇزىلىك دودادا توپ جارعان تۇڭعىش سپورتشى اتاندى. سونداي-اق وتانداسىمىز ەرەسەكتەر اراسىنداعى əلەم چەمپيوناتتارىندا چەمپيون اتانعان العاشقى ەڭ جاس سپورتشى رەتىندە دە تاريحقا ەندى.
ايەلدەر اراسىنداعى قازاقستان بوكسى تاريحىندا تۇڭعىش رەت الەمدىك دودادا ولجا سالعان العاشقى قازاق قىزى – نازىم قىزايباي. 2014 جىلى وڭتۇستىك كورەيانىڭ چەدجۋ قالاسىندا وتكەن ءدۇبىرلى دودادا نازىم بارلىق قارسىلاسىن ويسىراتا ۇتىپ, تۇڭعىش رەت ايەلدەر اراسىندا وتكەن بوكستان الەم چەمپيوناتىندا ەلىمىزدىڭ بايراعىن جەلبىرەتىپ, ءانۇرانىن شىرقاتتى. 2001 جىلدان بەرى وتكىزىلىپ كەلە جاتقان چەمپيوناتتا نازىم قىزايباي ەڭ ءبىرىنشى 2012 جىلى قىتايدا وتكەن بوكستان 7-ءشى الەم چەمپيوناتىندا قولا جۇلدە ەنشىلەگەن بولاتىن. اراعا ەكى جىل سالىپ, وڭتۇستىك كورەيادا التىن الدى.
جەرلەسىمىز بۇل جەتىستىگىن 2016 جىلى ەلوردادا ۇيىمداستىرىلعان الەم بىرىنشىلىگىندە دە قايتالاپ, قازاق قىزدارى اراسىندا ەكى دۇركىن الەم چەمپيونى اتانعان العاشقى قازاق قىزى رەتىندە تاريحقا ەندى. سونىمەن قاتار نازىم بىلتىر ازيا بىرىنشىلىگىندە دە الدىنا جان سالعان جوق. بارلىق كەزدەسۋىندە مىقتىلىق تانىتقان وتانداسىمىز سارى قۇرلىقتىڭ تەڭدەسسىز بوكسشىسى اتاندى.
قازاق قىزدارى اراسىنداعى بالۋاندىق ونەردە ەلميرا سىزدىقوۆانىڭ باعى جانىپ تۇر. ول 2016 جىلى ريودا ۇيىمداستىرىلعان وليمپيا ويىندارىندا ايەلدەر كۇرەسىنەن قولا ولجالاپ, قازاق قىزدارى اراسىنداعى العاشقى جۇلدەگەر رەتىندە قازاق سپورتىنىڭ جىلناماسىنا جازىلدى. 30 جاستاعى وتانداسىمىزدىڭ بۇگىنگە دەيىن باعىندىرعان بيىگى از ەمەس. 2008 جىلى جاسوسپىرىمدەر اراسىندا, 2012 جىلى جاستار اراسىندا ازيا چەمپيونى اتانسا, 2014 جىلى ەرەسەكتەر اراسىندا وتكەن ازيا چەمپيوناتىندا قولا جۇلدەگە يە بولدى. سونىمەن قاتار ول بىلتىر كۇرەستەن الماتىداعى ازيا بىرىنشىلىگىندە التىننان القا تاقسا, 2018 جىلعى ازيا ويىندارىندا قولانى قاناعات تۇتتى.
مىنە, بۇل – بۇگىنگە دەيىن ءوز سپورتىنىڭ تۇڭعىشى دەگەن اتاققا يە بولعان قازاق قىزدارىنىڭ تەك ءبىر بولىگى عانا. وسى سپورتشىلارىمىزدىڭ جەتىستىگى, جەتكەن بيىگى ولاردىڭ ءىزىن باسىپ كەلە جاتقان سىڭلىلەرىن شابىتتاندىرارى ءسوزسىز.
