مۋزەيدىڭ ەكسكۋرسيا جەتەكشىسى ءمادينا پازىلوۆانىڭ ايتۋىنشا, قوردا ءماشhۇر ءجۇسىپ جازىپ قالدىرعان قولجازبالار كونەلىگىنە قاراماستان, كوپشىلىگىنىڭ ساپاسى كوڭىل تولارلىق. جازۋ بارىسىندا كوك, قىزىل, قارا جانە وزگە دە سيالار ونبەگەن, تەك سۋ تيگەن بەتتەرىنىڭ شەتكى تۇستارى عانا ءوشىرىلىپ قالعان نە ۇزىلگەن ەكەن.
– قازىرگى تاڭدا مۋزەيدە بويتۇمار, تاقيا, قورجىن, ومىراۋشا, شالبارى مەن بەلبەۋى سىندى وزگە دە جەكە زاتتارى قويىلعان. سونداي-اق مازار ۇيىندە كىتاپ سالىنىپ تۇرعان شكاف بار. بۇل شكافقا كىشى ۇلى مۇحاممەد-فازىل يە بولعان. ال مۋزەيگە ەكسپونات رەتىندە 2019 جىلى اقىننىڭ نەمەرەسى قاجىمۇقان پازىلوۆ وتكىزگەن. مۇنى «بۋفەت شكافى» دەپ اتايدى. سەبەبى ونىڭ ىشىندە ىدىس-اياق ساقتايتىن بولعان, – دەيدى ول.
ءماشhۇر ءجۇسىپ كوزى تىرىسىندە ماڭگىلىك مەكەنىن ەكى بولمەلى ەتىپ سالدىرعان. مازار ساۋلەت ونەرىنە جاتپاسا دا, بابامىز ونىڭ بەرىكتىگىنە, قۇرىلىستى ورىنداۋشى ادامدارعا اسا ۇلكەن ءمان بەردى. كىرە بەرىس بولمەسىنە قۇران, كىتاپ, ىدىس-اياق, ەرتوقىم, ات ابزەلدەرى, ناسىباي ۇككىشى مەن شاقشاسىن, سونداي-اق تۇتىنعان زاتتارىن ساقتاۋدى تاپسىردى. مۇنىسى ولاي-بۇلاي جۇرگەن جولاۋشىلار پايدالانسىن دەگەن ماقساتتى كوزدەگەن ەكەن. سول سەبەپتى بابامىزدىڭ ءار جازباسى مەن زاتتارى, كىتاپتارىنىڭ بىزگە جانە بىزدەن كەيىنگى ۇرپاققا بەرەر تاربيەسى مەن دانالىعى مول.
