وتكەن جىلدىڭ مامىر ايىنان باستاپ ايەلدەرگە ءتورتىنشى نەمەسە ودان دا كەيىنگى بالانى تۋعان كەزدە تاعايىندالاتىن كوپ بالالى وتباسىلار جاردەماقىسىن الۋ ءۇشىن حقو-عا جۇگىنۋ مىندەتتى ەمەس, مەملەكەتتىڭ ءوزى بارلىعىن قاشىقتان SMS ارقىلى راسىمدەۋدى ۇسىنادى.
بۇدان بۇرىن اتالعان جاردەماقىنى رەسىمدەۋ ءۇشىن حقو-عا بارىپ, ءوتىنىش جازىپ, جەكە كۋالىك, بالالاردىڭ تۋ تۋرالى كۋالىكتەرى مەن نەكە قيۋ كۋالىگى سياقتى قۇجاتتاردى ۇسىنۋ قاجەت ەدى, ال جاردەماقى ءوتىنىش بەرىلگەن كۇننەن باستاپ تاعايىندالاتىن.
«وتباسىندا ءتورتىنشى نەمەسە ودان كەيىن تاعى بالا تۋىلعان جاعدايدا, پرواكتيۆتى تۇردە بالانىڭ تۋ تۋرالى كۋالىگىن, بالا تۋ مەن ونىڭ ءبىر جاسقا دەيىنگى كۇتىمىنە بايلانىستى بەرىلەتىن جاردەماقىلاردى عانا ەمەس, كوپ بالالى وتباسىلار ءۇشىن جاردەماقىنى رەسىمدەۋدى ۇسىناتىن SMS-حابارلاما دا جىبەرىلەدى. مۇندا كليەنتتىڭ SMS-كە كەلىسىمى عانا كەرەك. قاجەتتى مالىمەتتەر مەملەكەتتىك ورگانداردىڭ اقپاراتتىق جۇيەلەرىنەن الىنادى. حقو-عا بارۋدىڭ قاجەتى جوق», دەيدى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما توراعاسى ءادىل قوجىقوۆ.
كوپ بالالى وتباسىلار ءۇشىن جاردەماقى 2020 جىلدىڭ باسىنان باستاپ تولەنەدى. تولەمدى ءتورت جانە ودان دا كوپ بالا تۋعان ايەلدەر الا الادى. قازىرگى ۋاقىتتا بۇل جاردەماقىنى 487 مىڭنان استام قازاقستاندىق وتباسى الادى.
ونىڭ ىشىندە 63 437 ايەل «التىن القا», 138 571 ايەل «كۇمىس القا» يەگەرلەرى. 2022 جىلى كوپ بالالى وتباسىلارعا تاعايىندالاتىن جاردەماقى مولشەرى:
4 بالاعا 49 100 تەڭگە;
5 بالاعا 61 383 تەڭگە;
6 بالاعا 73 666 تەڭگە;
7 بالاعا 85 948 تەڭگە;
8 بالاعا 98230 تەڭگە;
كەلەسى ءار بالاعا +4 اەك.
ايتا كەتەيىك, قازاقستاندا 4 جانە ودان دا كوپ كامەلەتكە تولماعان بالاسى نەمەسە 23 جاسقا تولعانعا دەيىن كۇندىزگى بولىمدە وقيتىن بىرگە تۇراتىن بالالارى بارلار كوپبالالى وتباسى بولىپ سانالادى.
