ەلىمىزدە دەمالىس كۇندەرى جەل تۇرىپ, تۇمان بولۋى مۇمكىن

رەسپۋبليكامىزدا دەمالىس كۇندەرى, ياعني 29-30 ناۋرىز ارالىعىندا جەل تۇرىپ, تۇمان بولۋى ىقتيمال. بۇل تۋرالى «قازگيدورمەت» مەملەكەتتىك مەتوقىزمەتى حابارلادى. «كاسپي تەڭىزىنىڭ ۇستىندە قالىپتاسقان تسيكلون  ەلىمىزدىڭ باتىس, ورتالىق جانە سولتۇستىك وبلىستارى ارقىلى باتىس سىبىرگە قاراي جىلجيدى. وسى تسيكلون سالدارىنان جەر-جەرلەردە جاۋىن-شاشىن, كوكتايعاق جانە تۇمان بولۋى مۇمكىن. جەلدىڭ ەكپىنى سەكۋندىنا 15-20 مەترگە دەيىن جەتەدى. ال 31 ناۋرىز كۇنى رەسپۋبليكامىزدىڭ باتىسى مەن سولتۇستىگىندە جەلدىڭ ەكپىنى سەكۋندىنا 18-23 مەترگە دەيىن, كەي جەرلەردە ونىڭ ەكپىنى 28 مەتر بولادى»,-دەلىنگەن حابارلامادا. وسى تسيكلونعا بايلانىستى 29-31 ناۋرىز ارالىعىندا  ەلىمىزدىڭ وڭتۇستىگىندە جانە وڭتۇستىك-شىعىستا جاڭبىر مەن قار جاۋى ىقتيمال. سوندىقتان سينوپتيكتەر اتالعان ءوڭىر تۇرعىندارىنا جولعا شىققاندا قاۋىپسىزدىك شارالارىنا مۇقيات بولۋ كەرەكتىگىن ەسكەرتەدى. ءامىرحان الماعانبەتوۆ. دەرەككوز: «قازگيدرومەت». فوتو: www. E-Crimea.info.