18 اقپان مەن 1 ناۋرىز ارالىعىندا قازاقستان رەسپۋبليكاسىنىڭ اۋماعىنا فيتوسانيتاريالىق تاۋەكەلى جوعارى كارانتينگە جاتقىزىلعان ءونىمدى زاڭسىز اكەلۋدىڭ 31 فاكتىسى اشكەرەلەنىپ, جولى كەسىلدى.
«اتاپ ايتقاندا 14 جاعدايدا رەسەي فەدەراتسياسىنان 152,7 توننا جەمىس-جيدەك پەن ءسابىز, يراننان 45,2 توننا الما جانە وڭتۇستىك كورەيادان 1 توننا جۇگەرى ۇنىن يمپورتتاۋ كەزىندە فيتوسانيتاريالىق سەرتيفيكاتتاردىڭ جوقتىعى انىقتالدى.
سونىمەن بىرگە رەسەي فەدەراتسياسىنان 113 توننا ۇن, جۇگەرى, قۇرما, ليمون, بانان, كوكونىستەر مەن باسقا دا جەمىستەر, تۇركيادان 80,4 توننا كەپتىرىلگەن ورىك پەن انار جانە وزبەكستاننان 123,3 توننا كەپتىرىلگەن جەمىس يمپورتى كەزىندە ءونىم قايتالاما تەكسەرۋگە ۇسىنىلماۋدىڭ 11 جاعدايى بەلگىلى بولدى», دەلىنگەن مينيسترلىك حابارلاماسىندا.
ۆەدومستۆونىڭ حابارلاۋىنشا 3 جاعدايدا رەسەي فەدەراتسياسىنان 20 توننا كەبەك پەن 30 تەكشە مەتر كەسىلگەن اعاش ماتەريالدارى مەن وزبەكستاننان 5,4 توننا انار يمپورتتاعان كەزدە ورامداردا تاڭبالاۋ بولماي شىقتى.
«بۇعان قوسا رەسەي فەدەراتسياسىنان 40 توننا ليمون يمپورتى كەزىندە ۋاكىلەتتى ورگاننىڭ رۇقساتىنسىز ءجۇرۋ جولىندا ءونىمنىڭ باسقا مەكەن-جايعا جىبەرىلگەنى اشكەرە بولدى. سونداي-اق قىتاي حالىق رەسپۋبليكاسىنان 58 توننا اسقاباق يادروسىنىڭ تۇقىمىن اكەلۋ كەزىندە كارانتيندىك ءونىم جارامسىز فيتوسانيتاريالىق سەرتيفيكاتپەن اكەلىنگەن.
قر اقبتك-ءنىڭ 400-بابىنا سايكەس, وسىمدىكتەر كارانتينى سالاسىنداعى زاڭنامانىڭ بۇزىلۋىنا جول بەرگەن كىنالى تۇلعالارعا اكىمشىلىك ماتەريالدار تولتىرىلىپ, 1,9 ملن تەڭگەدەن استام سوماعا ايىپپۇل سالىندى.
سونىمەن قاتار, جىل باسىنان بەرى قازاقستان رەسپۋبليكاسى اۋىل شارۋاشىلىعى مينيسترلىگى وسىمدىكتەر كارانتينى سالاسىندا 320 بۇزۋشىلىقتى انىقتاپ, ناتيجەسىندە 24 ملن تەڭگەدەن استام سوماعا اكىمشىلىك ايىپپۇل سالىندى», دەپ جازدى اۋىل شارۋاشىلىعى مينيسترلىگى.
