ۇلتتىق ەكونوميكا مينيسترلىگىنىڭ مالىمەتى بويىنشا رەفورمانىڭ نەگىزگى ءۇش ماڭىزدى اكتىسى بار. ونىڭ ءبىرىنشىسى «كاسىپكەرلىك سالاداعى مىندەتتى تالاپتار تىزىلىمىنە» ەنگىزىلۋگە جاتاتىن سالالاردى ايقىنداۋ تۋرالى» ۇكىمەت قاۋلىسى بولسا, ەكىنشىسى – كاسىپكەرلىك سالاداعى مىندەتتى تالاپتاردىڭ ءتىزىلىمىن جۇرگىزۋ قاعيدالارى, ال ءۇشىنشىسى – كاسىپكەرلىك سالاداعى مىندەتتى تالاپتار ءتىزىلىمى. «بۇگىندە اكتىلەر ازىرلەندى, ەندى وسى قۇجاتتار نەگىزىندە كەلىسۋ پروتسەسى جۇرگىزىلىپ جاتىر. وسىعان بايلانىستى مەملەكەتتىك ورگاندار جوبالاردى ۋاقتىلى ازىرلەۋ جانە قابىلداۋعا بەلسەندىلىك تانىتۋى ءتيىس. تىزىلىمدە رەتتەۋشىلىك اكتىلەردىڭ جاڭادان قابىلدانىپ جاتقان ساياساتقا سايكەستىگى تەكسەرىلىپ, تالداۋ جۇرگىزىلەدى. ەگەر رەتتەۋشى ورگان وسى تالداۋدى مەرزىمدە جۇرگىزبەگەن جاعدايدا مۇنداي اكتىلەردىڭ كۇشى جويىلادى جانە تىزىلىمىنەن شىعارىلادى», دەيدى مينيسترلىك تاراتقان حابارلامادا.
وسىنىڭ الدىندا عانا گازەتىمىزگە بەرگەن سۇحباتتا «اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى ەربول وستەمىروۆ كاسىپكەرلىك سالاسىن «تازا پاراقتان» رەتتەۋ ساياساتىنىڭ كاسىپكەرلەرگە پايدالى تۇسى كوپ ەكەنىن اتاپ وتكەن ەدى. ونىڭ ايتۋىنشا, بيزنەس سالاسىندا جۇرگەن ازاماتتاردىڭ قۇقىعى كەيدە زاڭ اياسىندا قورعالماعان بولىپ شىعادى. سودان بولىپ كاسىپكەرلەر ءبىراز قيىندىقتارعا تاپ بولىپ ءجۇر. جاڭا رەتتەۋشىلىك ساياسات وسى ماسەلەنى وڭىنان شەشۋگە ءتيىس. «زاڭ مەملەكەتتىك رەتتەۋدىڭ قاعيداتتارى مەن نەگىزگى ەرەجەلەرىن بەلگىلەيدى جانە بيزنەسكە قويىلاتىن تالاپتار قانداي بولۋ كەرەكتىگىن ناقتىلايدى. بۇل زاڭ بولعاندىقتان رەتتەۋدەگى قاعيداتتار مىندەتتى تۇردە ورىندالادى. جاڭا قۇجات ەڭ الدىمەن كاسىپكەرلەردىڭ مۇددەسىن قورعايدى. ولارعا قانداي دا ءبىر تالاپ قوياردا ولاردىڭ جاعدايى, ول تالاپتاردى ورىنداي الۋ مۇمكىندىگى, سالماق سالماۋى ەسكەرىلەدى. بۇعان قوسا, مەملەكەت تاراپىنان بيزنەسمەندەرگە ءبىر جاڭا تالاپ ەنگىزىلگەن جاعدايدا قولدانىستاعى ەكى تالاپ جويىلىپ وتىرادى», دەگەن ەدى ە.وستەمىروۆ.
تالاپ دەمەكشى, ۇكىمەت بەكىتكەن تىزىلىمدە بەلگىلى ءبىر تالاپتار كۇشىن جويعان بولسا, وندا كاسىپكەرلەر سول تالاپتاردى بۇزعانى نەمەسە ۋاقىتىندا ورىنداماعانى ءۇشىن ەشقانداي اكىمشىلىك جاۋاپكەرشىلىك ارقالامايدى.
مينيسترلىك وكىلدەرىنە سەنسەك, بيزنەستى «تازا پاراقتان» رەتتەۋدى ەنگىزۋ جۇمىستارىنىڭ 2022-2023 جىلدارعا ارنالعان جوسپار-كەستەسى دايىن تۇر. كاسىپكەرلىكتى رەتتەۋدىڭ جاڭا تاسىلدەرىنە وقىتۋ ءۇشىن ساراپشىلار قۇرامى دا بەكىتىلگەن. وقىتۋ ءبىر اي بويى جۇرگىزىلەدى. «بيىلعى ناۋرىزدىڭ سوڭىنا دەيىن مەملەكەتتىك ورگاندار جۇمىس توپتارىمەن بىرلەسىپ, تىزىلىمگە ەنەتىن سالالار بويىنشا رەتتەۋ اكتىلەرىنىڭ تىزبەسىن ناقتىلايدى. ال 30 ناۋرىزدان باستاپ جاڭا رەتتەۋشىلىك ساياساتقا قولدانىستاعى قانداي تالاپتار سايكەس كەلەتىنىنە تالداۋ جۇرگىزىلەدى. بۇگىنگى تاڭدا بيزنەس-ومبۋدسمەن جانە «اتامەكەن» ۇلتتىق كاسىپكەرلەر پالاتاسىمەن بىرلەسىپ, رەتتەۋشى اكتىلەردى زەرتتەۋ جۇمىستارى جۇرگىزىلدى. 2021 جىلى الدىن الا 424 قۇقىقتىق اكتىلەر قارالدى, وندا شامامەن 17 558 تالاپ بەلگىلەنگەن, ونىڭ 40%-دان استامى جاڭا تاسىلدەرگە سايكەس كەلمەيدى», دەيدى ۇەم ءباسپاسوز قىزمەتى.
سونداي-اق زاڭدا مەملەكەتتىك باقىلاۋ جانە قاداعالاۋ جۇيەسىن وزگەرتۋ كوزدەلگەن. مينيسترلىك تەكسەرۋلەر جۇرگىزۋ كەستەلەرىن قۇرۋ كەزىندە بولۋى مۇمكىن تاۋەكەلدەردى باسقارۋ جۇيەسىن اۆتوماتتاندىرۋدى زاڭنامالىق تۇرعىدان بەكىتپەكشى. بۇل نورما 2023 جىلعى 1 قاڭتاردان باستاپ كۇشىنە ەنەدى. «مۇنداي اۆتوماتتاندىرۋ بيزنەستىڭ پروبلەمالىق سۋبەكتىلەرىن رەتكە كەلتىرۋگە جانە شوعىرلاندىرۋعا, زاڭعا باعىناتىن كاسىپكەرلەرگە اكىمشىلىك قىسىمدى تومەندەتۋگە مۇمكىندىك بەرەدى. مەملەكەت باسشىسى كاسىپكەرلەرمەن كەزدەسۋدە مەملەكەتتىك باقىلاۋ جۇيەسىن اۆتوماتتاندىرۋدى اياقتاۋدى تاپسىردى. بۇل شارالار وسى تاپسىرمانى ورىنداۋعا مۇمكىندىك بەرەدى», دەيدى مينيسترلىك وكىلدەرى.
