ياعني ساياسي پارتيانىڭ قاتارىنا بۇرىنعى پارتيالىق نومەنكلاتۋرانى ەمەس, قوعامنىڭ بەلگىلى ءبىر الەۋمەتتىك توپتارى مەن تاپتارىنىڭ مۇددەلەرىن بىلدىرەتىن ەڭ بەلسەندى وكىلدەرىن تارتۋ ارقىلى ونىڭ ەرىكتى ساياسي ۇيىم رەتىندەگى ماڭىزىن كوتەرۋ تۋرالى ويلار ايتىلدى. بۇل – حالىقتىڭ سەنىمىن قالىپتاستىرۋعا باعىتتالعان ماڭىزدى مىندەتتەردىڭ ءبىرى. وسىلايشا, تاياۋ بولاشاقتا ادامداردىڭ ساياسي پارتيالارعا دەربەس جانە ەركىن بىرىگۋى, قوعامداعى وزەكتى ماسەلەلەردى شەشۋگە بەلسەندى ارالاسۋى جۇزەگە اساتىنى كۇمان كەلتىرمەيدى.
پارتيانىڭ قاتارىنا پروپورتسيونالدى تۇردە بارلىق ايماقتىڭ وكىلدەرى كىرەتىن بولدى. بۇل باستاما وڭىرلەردىڭ وزەكتى ماسەلەلەرىن شەشۋگە باستى نازار اۋدارىلاتىنىن كورسەتەدى. سونىمەن قاتار ازاماتتىق سەكتوردان كىرەتىن وكىلدەر سانىنىڭ ارتۋى – قۋانتارلىق جاعداي. ويتكەنى نارىق جاعدايىندا بۇل سەكتور الەۋمەتتىك ءالجۋاز توپتاردىڭ مۇددەسىن قورعاۋعا, مەملەكەتتىڭ ينكليۋزيۆتىك ساياساتىن جەتىلدىرۋگە ۇلەس قوساتىنى ايتپاسا دا تۇسىنىكتى.
ۇەۇ مەن باق وكىلدەرىنىڭ, ءبىلىم سالاسىنىڭ ماماندارىنىڭ كوبەيتىلۋى دە پارتيا شەشەتىن ماسەلەلەردىڭ كۇردەلىلىگىن, حالىققا اشىق بولاتىنىن سيپاتتايدى. پارتيا قاتارىنا كىرەتىن مەملەكەتتىك قىزمەتكەرلەر سانىنىڭ ۇشتەن بىرىنە دەيىن قىسقارتىلۋى ونىڭ ساياسي پارتيا رەتىندە مەملەكەتتىك ورگاندارمەن بىرىگىپ كەتپەيتىن دەربەس ساياسي ۇيىم رەتىندە قالىپتاسۋىنا, تەك بيلىكتىڭ مۇددەسىن جاقتايتىن پارتياعا اينالىپ كەتپەۋىنە مۇمكىندىك بەرەدى دەپ كۇتەمىز.
بەلگىلى نەمىس الەۋمەتتانۋشىسى ماكس ۆەبەر «ساياسات قىزىعۋشىلىق جانە كاسىپ رەتىندە» دەگەن ەڭبەگىندە «ادامدار ساياساتقا اقشا ءۇشىن كەلەدى, سودان كەيىن ولار ساياسات ارقىلى كۇن كورەدى نەمەسە ولارعا الەۋمەتتىك بەدەل كەرەك, مۇنداي جاعدايدا ولار ساياسات ءۇشىن جۇمىس ىستەيدى» دەپ ساياساتقا كەلەتىن ادامداردىڭ ماقساتتارىن انىق بەينەلەدى. ساياساتقا ارالاسۋدى كاسىپ رەتىندە قاراستىرمايتىن, ساياساتتى دۇرىس تۇسىنە بىلەتىن, قوعامنىڭ دامۋىنا شىن ۇلەس قوساتىن مامانداردى قولداۋ – دۇرىس شەشىم. سوندىقتان وسى ماسەلەگە قاتىستى ويلار ەل پرەزيدەنتىنىڭ Nur Otan پارتياسىنىڭ كەزەكتەن تىس سەزىندە سويلەگەن سوزىندە ەرەكشە بايقالدى.
2022 جىلدىڭ 1 ناۋرىز كۇنى پارتيا اتاۋىن Amanat دەپ وزگەرتۋگە قاتىستى ايتىلعان ۇسىنىستى دۇرىس شەشىم دەپ ەسەپتەيمىز. بۇل اتاۋ جاڭا قازاقستاندى جاڭا وزگەرىستەرگە باستايتىن, تاۋەلسىزدىگىمىزدى قورعاۋعا باعىتتالعان, قوعامدى بىرىكتىرەتىن وزەكتى يدەيا بولاتىنىنا سەنىمىمىز مول.
گۇلناپيس ابدىكەروۆا,
ءال-فارابي اتىنداعى قازاق ۇلتتىق ۋنيۆەرسيتەتى
الەۋمەتتانۋ جانە الەۋمەتتىك جۇمىس كافەدراسىنىڭ پروفەسسورى, الەۋمەتتانۋ عىلىمدارىنىڭ دوكتورى
