Anonymous حاكەرلەر توبى «رەسەي ۇكىمەتىنە قارسى كيبەرشابۋىلدى رەسمي تۇردە باستاعانىن» Twitter پاراقشاسىندا جاريا ەتتى. #Ukraine حەشتەگىمەن تارالعان بەينەۇندەۋدە حاكەرلەر «سوعىستى توقتاتپاسا, جىلدار بويى جابۋلى تۇرعاننىڭ ءبارى جارىققا شىعاتىنىن» مالىمدەدى.
اقپاراتتىق جۇيەنى بۇزۋعا كەلگەندە الدىنا جان سالمايتىن جانداردىڭ بۇل ارەكەتى ەشكىمدى دە بەي-جاي قالدىرعان جوق. رەسەي دە ولاردان قاۋىپتەنەتىنىن بايقاتىپ قويدى. فەدەرالدى قاۋىپسىزدىك قىزمەتىنىڭ قۇرىلىمى رەسەي اقپاراتتىق كەڭىستىگى كيبەرشابۋىلداردىڭ قاۋىپتى دەڭگەيىندە تۇرعانىن مويىندادى. ال باۋمان اتىنداعى ماسكەۋ مەملەكەتتىك تەحنيكالىق ۋنيۆەرسيتەتىنىڭ «تسيفرلى الەمدەگى قاۋىپسىزدىك» كافەدراسىنىڭ پروفەسسورى ۆيتالي ۆەحوۆ اقپاراتتىق قۇرالدارىنىڭ بىرىندە بەرگەن سۇحباتىندا «ەگەر Anonymous حاكەرلەرىنە رەسەيدىڭ اقپاراتتىق الاڭىن شابۋىلداۋ تۋرالى تاپسىرىس كەلىپ تۇسسە, وندا الدىمەن ۇكىمەتتىك جانە قارجى رەسۋرستارى زارداپ شەگەتىنىن» جەتكىزدى. «مەملەكەتتىك تۇرعىدان دا, جەكە ادام كوزقاراسى تۇرعىسىنان دا العاندا كيبەرشابۋىلدار كوبىنە سول ەلدىڭ ءىرى ناسيحاتتاۋشى اقپارات قۇرالىنا جاسالادى. بۇل جەردە الەۋمەتتىك جەلىلەرگە, بەلگىلى ءبىر تۇلعالاردىڭ جەكە پاراقشالارىنا شابۋىلداۋ دەگەن اڭگىمە جوق. نەگىزگى نىسانا ەلدىڭ تسيفرلى ەكونوميكاسىن قاماتاماسىز ەتىپ وتىرعان ءىرى اقپاراتتىق رەسۋرستار بولادى», دەيدى ول. بىراق ساراپشى حاكەرلەردىڭ كيبەرسوعىسى ايتارلىقتاي قاۋىپ توندىرمەيتىنىن, مۇنداي شابۋىلدارعا مەملەكەت بۇرىننان دايىن دەگەن پىكىردە.
Infosecurity a Softline Company اقپاراتتىق قاۋىپسىزدىك ءاۋديتى دەپارتامەنتىنىڭ باسشىسى سەرگەي نەناحوۆ بولسا, Anonymous حاكەرلەرىنىڭ شابۋىلى اسا قاۋىپ توندىرمەگەنىمەن سولاردىڭ اتىن جامىلعان باسقا توپتار شىقسا, ولاردىڭ ارەكەتى اقپاراتتىق كەڭىستىككە, ەكونوميكاعا ۇلكەن سوققى بولۋى مۇمكىن ەكەنىن ەسكەرتتى.
اقپاراتتىق تەحنولوگيا قارىشتاپ دامىعان قازىرگى زاماندا ادامنىڭ ءومىرى, تىنىس-تىرشىلىگى ينتەرنەتكە بايلاۋلى ەكەنى بەلگىلى. ەگەر ينتەرنەت ءبىر كۇن, ءتىپتى ءبىر ساعاتقا وشسە, بەرەكەمىز كەتىپ-اق قالاتىنىن ەشكىم جوققا شىعارمايدى. وعان بيىلعى قاڭتار وقيعاسى دالەل. عالامتور جۇيەسى بىرنەشە كۇنگە ىستەن شىعىپ ەدى, بانكتەن باستاپ بايلانىس ءۇزىلىپ, الىس-جاقىننان حابار الۋ قيىنداپ كەتتى. ال ەگەر ءبۇتىن ءبىر مەملەكەتتىڭ بارلىق اقپاراتتىق كوممۋنيكاتسيالىق, ينفراقۇرىلىمدىق جۇيەسىنە قاۋىپ تونسە, بۇل ايتارلىقتاي ءىرى ەكونوميكالىق سوققى بولارى ءسوزسىز. قانداي ەل بولسىن, حاكەرلەردەن اياق تارتا جۇرەتىنى سوندىقتان. ال الەمدى اۋزىنا قاراتقان «انونيمۋستار» – جوعارى دەڭگەيدە قورعالعان سايتتاردىڭ ءوزىن دەمدە بۇزا سالاتىن حاكەرلەر توبى. عالامتورداعى اشىق دەرەككوزدەرگە سۇيەنسەك, ولار 5 مىڭنان استام Twitter-اككاۋنتىنا, ءدال وسى شامادا Facebook پاراقشالارىنا شابۋىل جاساعان. ونىڭ سىرتىندا دۇنيە جۇزىنە بەلگىلى ۇيىمداردىڭ اقپاراتتىق جۇيەلەرىن بۇزىپ, 30 مىڭنان استام بانك شوتتارىن جاريا ەتكەن. قاۋىپسىزدىك جاعىنان جان-جاقتى قورعالعان دەگەن سايتتاردىڭ ءوزى انونيمۋستاردىڭ شابۋىلىنا توتەپ بەرە الماعان.
Anonymousتار وزدەرىن ينتەرنەت ەركىندىگى مەن ادىلدىك ءۇشىن كۇرەسكەن قۇسقا تەڭەيدى. بۇل ءسوز اعىلشىن تىلىنەن اۋدارعاندا «بەلگىسىز» دەگەن ماعىنانى بىلدىرەدى. شىنىمەن دە باسقان ءىزى بىلىنبەيتىن, وزدەرىن كىم ەكەنىن ايتپايتىن حاكەرلەر توبى بۇل. ۇيىمداسقان حاكتيۆيستەر توبىنىڭ بەلگىسى دە اتتارىنا ساي. ونىڭ ورتاسىندا گالستۋك تاعىپ, اق جەيدە مەن قارا كوستيۋم كيگەن باسى جوق ادام بەينەلەنگەن. بۇل «ۇيىمنىڭ باسشىسى جوق, ونداعى ادامداردىڭ ءبارى بىردەي, قۇقى تەڭ» دەگەندى مەڭزەيدى.
Anonymousتار وزدەرىنىڭ جاريا بولعانىن قالامايدى. بەتتەرىنە ۇنەمى گاي فوكس بەتپەردەسىن تاعىپ جۇرەدى. كەزىندە جۇيەگە قارسى شىققان اقسۇيەك فوكستىڭ كىم ەكەنى اۋستريالىق بەلگىلى رەجيسسەر دجەيمس ماكتيگتىڭ «V — زناچيت ۆەندەتتا» اتتى فيلمىندە ەگجەي-تەگجەيلى باياندالادى.
ءوزىن «سالقىنقاندى» دەپ تانىستىرعان حاكەرلەر توبىنداعى بەلسەندىلەردىڭ ءبىرى: ء«بىز ادىلەتسىزدىككە توزبەيمىز جانە ينتەرنەتتىڭ باقىلاۋدا بولعانىن قالامايمىز. عالامتور بارىنە ورتاق بولۋى كەرەك. ءبىز ەشتەڭەنى ۇمىتپايمىز. ادىلەتسىزدىك بولسا, ءبىز ەشكىمدى كەشىرمەيمىز جانە ىستەگەن ءىسىمىزدى اياعىنا دەيىن جەتكىزەمىز. ءبىزدىڭ اتىمىز – لەگيوندار» دەگەن.
كەيبىر سىنشىلار ولاردى «حاكتيۆيستەر» دەپ سىنعا العانىمەن ولاردىڭ كومپيۋتەردەگى شەبەرلىگىنە ءتانتى ەكەنىن جاسىرمايدى. اتاقتى بيلل گەيتس انونيمۋس حاكەرلەرى تۋرالى: «انونيمۋس — بۇل ينتەرنەتتە پايدا بولعان العاشقى جوعارعى سانا. بۇلار قۇستار سياقتى. ء«دۇر» ەتىپ تەك ءبىر باعىتتا ۇشادى. ولاردىڭ توبى كوبەيە بەرۋى مۇمكىن» دەگەن.
ۆيكيپەدياداعى مالىمەتكە سۇيەنسەك, انونيمۋستار بەلگىلى ءبىر سايتتارعا بايلانىپ قالماعان, بىراق بەلگىلى ءبىر جەلىلەرمەن تىعىز بايلانىستا جۇمىس ىستەيدى. ولاردىڭ قاتارىندا 4chan سياقتى يميدجبوردتار, ۆيكي-سايتتار, Encyclopædia Dramatica جانە بىرقاتار ينتەرنەت-فورۋم بار.
2012 جىلى Time امەريكالىق جۋرنالى انونيمۋس حاكەرلەر توبىن الەمدەگى ەڭ ىقپالدى 100 ادامنىڭ تىزىمىنە قوسقان.
