پارتيا توراعاسى ۇيىمنىڭ اتاۋىن Amanat دەپ وزگەرتۋ تۋرالى ۇسىنىسقا قولداۋ ءبىلدىردى. بۇل ءسوز – حالقىمىز ءۇشىن تەرەڭ ماعىنالىق مانگە يە كيەلى ۇعىم. ول مەملەكەتتىلىگىمىزدى جانە تاۋەلسىزدىگىمىزدى ساقتاۋ جولىندا بابالارىمىز بەن بولاشاق ۇرپاق الدىنداعى جاۋاپكەرشىلىكتى ارتتىراتىن قاسيەتتى پارىز دەگەندى بىلدىرەدى.
رەبرەندينگ پەن جاڭا اتاۋ پارتيادا بولىپ جاتقان اۋقىمدى وزگەرىستەردىڭ ءبىر بولشەگى عانا. بۇل ىستە ماڭدايشاداعى جازۋدى وزگەرتۋمەن شارۋا بىتپەيتىنى بەلگىلى. سوندىقتان ساياسي ۇيىمنىڭ قىزمەتى مەن جۇمىس ءتاسىلىن جۇيەلى تۇردە وزگەرتۋ اسا ماڭىزدى.
پارتيا بارشا قازاقستاندىقتىڭ مۇددەسىن قورعايتىن نەگىزگى ۇيىم رەتىندەگى جۇمىسىن جالعاستىرا بەرەدى. مەملەكەت باسشىسى اتاپ وتكەندەي, Amanat ادىلدىكتىڭ, بىرلىك پەن العا ىلگەرىلەۋدىڭ, حالىقتىڭ پىكىرى مەن ەل مۇددەسىن ەسكەرەتىن, ازاماتتارىمىزدىڭ يگىلىگى جولىندا قىزمەت ەتەتىن پارتيا بولۋعا ءتيىس.
ول ءۇشىن پارتيا جۇمىسىنداعى نەگىزگى باسىمدىق ورتالىقتان جەرگىلىكتى دەڭگەيگە, ياعني وڭىرلىك فيليالدار مەن باستاۋىش پارتيا ۇيىمدارىنا ويىسۋ كەرەك. ۇيىم ءۇشىن سايلاۋشىلارمەن جۇمىس ىستەۋ, ازاماتتاردى الاڭداتقان ماسەلەلەرگە نازار اۋدارۋ, حالىقتىڭ مۇڭ-مۇقتاجىنا قۇلاق ءتۇرىپ, ونى ءتيىستى دەڭگەيگە جەتكىزۋ اسا ماڭىزدى. ياعني Amanat, شىن مانىندە, حالىق پەن اتقارۋشى بيلىك اراسىنداعى التىن كوپىرگە اينالۋى قاجەت.
وسى رەتتە پارتيا توراعاسى جۇمىس بارىسىندا بيۋروكراتيادان, فورماليزمنەن جانە قاعازباستىلىقتان ءۇزىلدى-كەسىلدى باس تارتۋ اسا ماڭىزدى مىندەت ەكەنىن ايرىقشا اتاپ ءوتتى. تىڭ باستامالار تەك ورتالىقتىڭ نۇسقاۋىمەن عانا قولعا الىنباۋى كەرەك. كۇن ءتارتىبىن ازىرلەۋگە پارتيانىڭ جەرگىلىكتى جەرلەردەگى مۇشەلەرى دە بەلسەندى اتسالىسۋى قاجەت. اسىرەسە, باستاۋىش پارتيا ۇيىمدارىندا ماڭىزدى ماسەلەلەردى تالقىلاپ, ولاردى شەشۋ جولدارىن ۇسىنۋعا مۇمكىندىكتەر بار. ويتكەنى ولار ەلمەن تىكەلەي بايلانىستا بولعاندىقتان, كوپشىلىكتىڭ كوكەيىندەگى وزەكتى پروبلەمالاردى جاقسى بىلەدى. سوندىقتان باستاۋىش پارتيا ۇيىمدارىنىڭ الەۋەتىن كەڭىنەن پايدالانۋ كەرەك.
كەيبىر زاڭ جوبالارى قوعامدا قىزۋ پىكىرتالاس تۋدىراتىنى بەلگىلى. پارتيالىق ينستيتۋتتار ارقىلى الەۋمەتتىك ماڭىزى جوعارى سونداي نورمالاردى تالقىلاۋعا جۇرتشىلىق پەن وڭىرلەردەگى بەلسەندى ازاماتتاردى جۇمىلدىرۋ قاجەت.
پرەزيدەنتىمىز بەلگىلەپ بەرگەن مىندەتتەردىڭ ماڭىزدى بولىگى كادر دايارلاۋ جانە الەۋمەتتىك ليفت قالىپتاستىرۋ ماسەلەلەرىنە قاتىستى بولدى. جاڭارعان پارتيا بەلسەندى جاستار ءۇشىن ساياسي مەنەدجمەنت مەكتەبىنە اينالۋعا ءتيىس. پارتيا قىزمەتى كوشباسشىلىق قاسيەتتەردى قالىپتاستىرۋعا, ازاماتتارمەن ءتيىمدى كەرى بايلانىس ورناتۋعا جانە ورىن العان ماسەلەگە بايلانىستى جەدەل ءۇن قاتۋعا زور مۇمكىندىكتەر بەرەدى.
بۇدان بىلاي Amanat مەملەكەت باسشىسىنىڭ ەلىمىزدى جاڭارتۋ باعدارىن ىسكە اسىرۋعا بەلسەندى قاتىسىپ قانا قويماي, الەۋمەتتىك-ەكونوميكالىق جانە ساياسي قايتا جاڭعىرۋدىڭ تىرەگى ءارى وزەگى رەتىندە جۇمىس ىستەيدى. پرەزيدەنتىمىز جانە پارتيا توراعاسى ق.توقاەۆ بارشا پارتيالاستاردى تىڭ يدەيالار مەن ۇسىنىستار جيناۋ جونىندەگى رەسپۋبليكالىق اكتسيا ۇيىمداستىرۋعا, رەفورمالاردى ازىرلەۋ جانە جاڭا باسىمدىقتاردى ايقىنداۋ ىسىنە بەلسەندى قاتىسۋعا شاقىردى.
وسىلايشا, پارتيانى ترانسفورماتسيالاۋ دەموكراتيالىق جاڭارۋ جانە جاڭا ادىلەتتى قازاقستان قۇرۋ جولىنداعى اسا ماڭىزدى قادام بولاتىنى ءسوزسىز.
الداعى ۋاقىتتا بارلىق پارتيالاستاردىڭ پارتيا توراعاسى ايقىنداپ بەرگەن باسىمدىقتاردى ىسكە اسىرۋ ءۇشىن جۇدىرىقتاي جۇمىلىپ ارەكەت ەتۋى اسا ماڭىزدى. بۇل ىسكە سەنات دەپۋتاتتارى دا ۇلەس قوسىپ, ەلدىك مۇددە جولىنداعى قىزمەتتەرىن بەلسەندى تۇردە جالعاستىرا بەرەدى.
ماۋلەن اشىمباەۆ,
پارلامەنت سەناتىنىڭ توراعاسى
