CARTO 3V7 Prime – ناۋقاستىڭ جۇرەگىندەگى بارلىق «كورىنىستەردى» ەكرانعا شىعاراتىن وتە اقىلدى جابدىقتارمەن تولتىرىلعان شاعىن تىرەۋ. وسى ارقىلى رەسەيدەگى ىرگەلى جانە ترانسلياتسيالىق مەديتسينا فەدەرالدى زەرتتەۋ ورتالىعىنىڭ جەتەكشى مامانى سەرگەي ارتەمەنكو وتاندىق كلينيكانىڭ اريتمولوگتەرى ءۇشىن شەبەرلىك ءدارىسىن وتكىزدى.
«بيىل ءبىز رەنتگەنەندوۆاسكۋليارلىق وپەراتسيالىق بلوكتى حالىقارالىق ساپا ستاندارتتارىنا سايكەس جەتىلدىردىك. جۇرەك اريتمياسىن ەمدەۋ ىسىندە «التىن ستاندارت» دەپ تانىلعان CARTO 3V7 Prime, ياعني ءۇش ولشەمدى جۇرەكىشىلىك ناۆيگاتسيا جۇيەسىن ورناتتىق. بۇل جۇيە جۇرەك ىرعاعى قاتتى بۇزىلعان ناۋقاستاردى ءتيىمدى ەمدەۋگە جول اشادى. ول حالىقارالىق تاجىريبەدە جۇرەككە جاسالاتىن ءتۇرلى اريتمولوگيالىق وپەراتسيادا ءساتتى قولدانىلادى», دەيدى كىاعزي باسقارما توراعاسى, پروفەسسور روزا قۋانىشبەكوۆا.
ەمدەۋدىڭ ەڭ يننوۆاتسيالىق ادىستەرىنىڭ ءبىرى – راديوجيىلىكتى ابلاتسيا (رجا). CARTO 3V7 Prime پايدالانۋ وسىنداي پروتسەدۋرانىڭ تيىمدىلىگى مەن قاۋىپسىزدىگىن قامتاماسىز ەتەدى. وسى ەرەكشە قوندىرعى جۇرەكتىڭ تولىق ءۇش ولشەمدى كارتالارىن جاساۋ جانە كەيدە قايعىلى جاعدايلارعا دۋشار ەتەتىن اريتميانىڭ كوپتەگەن ءتۇرىن ەمدەۋگە قابىلەتتى.
رەسەي كارديوحيرۋرگى, ءنوۆوسىبىر قالاسىنىڭ رەنتگەنەندوۆاسكۋليارلىق دياگنوستيكا مەن ىرگەلى جانە ترانسلياتسيالىق مەديتسيناداعى فزو جەتەكشى ماماندارىنىڭ ءبىرى سەرگەي ارتەمەنكونىڭ ايتۋىنشا, وسى ءادىس الىناتىن پارامەترلەردىڭ دالدىگىنىڭ ناتيجەسىندە پروتسەدۋرانى ءتيىمدى جانە جىلدام ەتەدى. 1 مم-گە دەيىنگى دالدىكپەن 3D-تەحنولوگيالارى اريتميا كوزىن – باسقا قان تامىرلارىنا زاقىم كەلتىرمەي پاتولوگيالىق وشاقتى تابۋعا مۇمكىندىك بەرەدى, پاتسيەنت تولىقتاي قالپىنا كەلەدى, ءتىپتى وپەراتسيا بارىسىندا ناتيجە كورىنەدى.
CARTO 3V7 Prime وپەراتسيا جاساۋ جۇيەسىمەن جاراقتاندىرۋ – ساۋىعىپ شىققان پاتسيەنتتەردى كوبەيتىپ, جۇرەك ىرعاعىنىڭ بۇزىلۋلارىن دياگنوستيكالاۋدىڭ دالدىگىن, كاتەتەر لوكاليزاتسياسى ەسەبىنەن پاتسيەنتتەردى ەمدەۋ مەن ادىستەمەنىڭ تيىمدىلىگىن ارتتىرىپ, ءبىر پاتسيەنتتە قايتا قاراۋ قاجەتتىلىگىن ازايتىپ, ينفاركت, جۇرەك جەتكىلىكسىزدىگى, ينسۋلت سياقتى باسقا دا كەنەتتەن بولاتىن ءولىم مەن اسقىنۋلاردىڭ سانىن ازايتۋعا مۇمكىندىك بەرەدى.
وسىلايشا, اقپاننىڭ 16-19-ى ارالىعىندا شەبەرلىك ءدارىسى شەڭبەرىندە ءتۇرلى جاستاعى جۇرەكتىڭ كۇردەلى دەرتى بار 30 شاقتى پاتسيەنتكە وپەراتسيا جاسالادى. ەرەكشە ءبىر جاعدايدى ايتا كەتۋ كەرەك, جۇكتى بولعانىنا 20 اپتا تولعان 27 جاستاعى پاتسيەنتكە وپەراتسيا جاسالدى. ول ءالى قۇرىپ, باس اينالۋى, ەسىنەن تانۋ, جۇرەك جۇمىسىنداعى ۇزىلىستەر, قالىپتى دەنە قيمىلى كەزىندە دە ەنتىگۋ, جالپى السىزدىك, شارشاۋ سەكىلدى بەلگىلەرمەن بىرگە جۇرەتىن جۇرەك سوعىسىنىڭ جيىلەنۋ ۇستاماسىنا شاعىمدانعان. پاتسيەنتكە پاروكسيزمالدى قارىنشاۇستى تاحيكارديا دياگنوزى قويىلدى. سينكوپە. وپەراتسيا ءساتتى ءوتتى. جۇكتى كەلىنشەكتىڭ جاعدايى قازىر جاقسى.
CARTO 3V7 Prime جۇرەكىشىلىك ناۆيگاتسيانىڭ وسى ۇشولشەمدى جۇيەسى الماتى قالاسىندا تەك كارديولوگيا جانە ىشكى اۋرۋلار عزي-دا, ال استانادا – ۇلتتىق عىلىمي كارديوحيرۋرگيا ورتالىعىندا ورناتىلعان.
الماتى
