كەزدەسۋ بارىسىندا ماۋلەن اشىمباەۆ قازاقستان پرەزيدەنتى قاسىم-جومارت توقاەۆتىڭ ەلدى جاڭارتۋ ساياساتىن ىسكە اسىرۋ اياسىندا قولعا الىنعان الەۋمەتتىك-ەكونوميكالىق جانە قوعامدىق-ساياسي باعىتتاعى شارالارعا توقتالىپ ءوتتى.
تاراپتار ەكى ەل اراسىنداعى ىنتىماقتاستىقتى ارتتىرۋ ماسەلەسىنە نازار اۋدارىپ, بۇل رەتتە پارلامەنتارالىق بايلانىستى نىعايتۋ دا ماڭىزدى ەكەنىن تىلگە تيەك ەتتى. ء«بىزدىڭ ەلدەرىمىزدىڭ زاڭ شىعارۋ ورگاندارى اراسىنداعى قارىم-قاتىناس سەرپىندى دامىپ كەلەدى. وعان ەكى ەلدىڭ پارلامەنتتەرىندە جۇمىس ىستەيتىن دوستىق توپتارى بەرىك نەگىز بولىپ وتىر. ەكى جاق تا مۇددەلى ماسەلەلەر بويىنشا وسى توپتاردىڭ الەۋەتىن ءتيىمدى پايدالانۋى ماڭىزدى.
سونداي-اق قازاقستان دەپۋتاتتارى ەقىۇ پارلامەنتتىك اسسامبلەياسى, ەۋروپا كەڭەسى پارلامەنتتىك اسسامبلەياسى جانە پارلامەنتارالىق وداق اياسىندا يتاليا پارلامەنتشىلەرىمەن كوپجاقتى بايلانىستاردى دامىتۋعا مۇددەلى», دەدى ماۋلەن اشىمباەۆ.
يتاليانىڭ قازاقستانداعى ەلشىسى دە ەكى ەلدىڭ پارلامەنتارالىق قارىم-قاتىناسىن ارتتىرۋدىڭ ماڭىزدى ەكەنىن اتاپ ءوتتى. ديپلومات ءوز سوزىندە رەسمي ريم قازاقستان پرەزيدەنتى قاسىم-جومارت توقاەۆتىڭ قولعا العان رەفورمالارىن تولىق قولدايتىنىن جانە ولاردى ۋاقتىلى شارالار دەپ ەسەپتەيتىنىن جەتكىزدى.
ماركو البەرتيدىڭ ايتۋىنشا, يتاليا الەمدىك جانە ءداستۇرلى دىندەر ليدەرلەرىنىڭ سەزى اياسىندا قازاقستاننىڭ اتقارىپ وتىرعان قىزمەتىن جوعارى باعالايدى. سونىمەن قاتار كەزدەسۋدە يننوۆاتسيا, ءبىلىم بەرۋ جانە باسقا دا باعىتتار بويىنشا ىنتىماقتاستىقتى نىعايتۋ ماسەلەلەرى ءسوز بولدى.
سەنات توراعاسى قازاقستان پارلامەنتىنىڭ دەپۋتاتتارى ەلىمىزگە يتاليالىق ينۆەستيتسيانى ودان ءارى تارتۋعا جاردەمدەسۋگە جانە قاجەت بولعان جاعدايدا ينۆەستيتسيالىق احۋالدى جاقسارتۋ بويىنشا قوسىمشا زاڭنامالىق شارالار قابىلداۋعا دايىن ەكەنىن دە ايتتى.
