ەلباسىمىزدىڭ 14 اقپان كۇنى ۇكىمەتتىڭ كەڭەيتىلگەن وتىرىسىندا ازاماتتىق قىزمەتشىلەردىڭ جالاقىسىن, زەينەتكەرلەردىڭ زەينەتاقىسىن, سونداي-اق, جاردەماقىلاردى كوتەرۋ جونىندە بەرگەن تاپسىرماسىنىڭ ورىندالا باستايتىن ۋاقىتىنا دا ساناۋلى كۇندەر عانا قالدى. ياعني, تاپسىرما 1 ساۋىردەن باستاپ جۇزەگە اسپاق.
وسىعان وراي ەل وڭىرلەرىنەن رەداكتسيا پوشتاسىنا قۋانىشتارىن جەتكىزگەن, العىستارىن بىلدىرگەن لەبىزدەر لەگى اعىلۋدا. تومەندە سونىڭ ءبىرازىن جاريالاعاندى ءجون كوردىك.
جىگەرىمىزدى ارتتىرا تۇسەتىنى انىق
ۇستىمىزدەگى جىلدىڭ اقپان ايىنىڭ ورتاسىندا مەملەكەت باسشىسى نۇرسۇلتان نازارباەۆتىڭ ۇكىمەتتىڭ كەڭەيتىلگەن ماجىلىسىندە ازاماتتىق قىزمەتكەرلەردىڭ جالاقىسىن, زەينەتكەرلەردىڭ زەينەتاقىسىن جانە جاردەماقىلاردى كەزەكتەن تىس كوتەرۋ ءجونىندەگى ۇكىمەتكە بەرگەن تاپسىرماسىن تىڭداعانىمدا ءبىر جاقسىلىقتىڭ نىشانىن سەزگەندەي قۋانىپ قالعان ەدىم. وسى قۋانىشىم بەكەر ەمەس ەكەن. ەندى, مىنە, مەن جۇمىس ىستەيتىن وسكەمەن قالاسىنداعى تەمىر- جول قىزمەتكەرلەرىنە ارنالعان اۋرۋحانا ۇجىمىنداعىلاردىڭ دا جالاقىسى 1 ساۋىردەن باستاپ 10 پايىزعا كوتەرىلەتىندىگىن ەستىدىك. وسى جايىندا حابار جەتكەن كەزدە قىزمەتكەرلەر ءبىرىن-ءبىرى قۇتتىقتاپ جاتتى. مەنىڭ بۇل اۋرۋحانادا بالالار دارىگەرى بولىپ قىزمەت ىستەي باستاعانىما ءبىراز جىلداردىڭ ءجۇزى بولدى. جالپى ەڭبەك ءوتىلىم جيىرما جىلدان اسىپ بارادى. دارىگەر جۇمىسى جەڭىل ەمەس. ءويتكەنى, ءار ادامنىڭ دەنساۋلىعىنا دەگەن جاۋاپكەرشىلىك جۇگى مول بولسا, بالالار جاعدايىنا كەلگەندە مۇنىڭ سالماعى ءتىپتى دە ەسەلەي تۇسەتىندىگى انىق. ارينە, بەينەتتى ەڭبەكتىڭ كىم يگىلىگىن كورگىسى كەلمەيدى. وسى تۇرعىدان العاندا سوڭعى ۋاقىتتارى مەملەكەت باسشىسىنىڭ تاپسىرماسىنا سايكەس دەنساۋلىق سالاسىنا زور كوڭىل ءبولىنىپ جاتقاندىعى, جاڭا مەديتسينالىق تەحنولوگيالاردىڭ ەنگىزىلۋى, دارىگەرلەردىڭ ەڭبەكاقىلارىنىڭ اۋىق-اۋىق ارتتىرىلىپ وتىرۋى ءبىزدىڭ سالامىزدىڭ حالىق الدىنداعى ماڭىزى مەن جاۋاپكەرشىلىگىنىڭ زور ەكەندىگىن بىلدىرەتىن بولسا كەرەك. ءبىزدىڭ ۇجىمىمىزدىڭ مۇشەلەرى دە وسى تالاپ دەڭگەيىنەن كورىنۋگە ۇمتىلىس تانىتىپ وتىر. ءوز ۇجىمىم تۋرالى ءبىر-ەكى اۋىز ءسوز ايتاتىن بولسام, تەمىرجولشىلارعا ارنالعان ءبىزدىڭ اۋرۋحانا ۇزاق جىلداردان بەرى جۇمىس ىستەپ كەلە جاتقان بىلىكتى ۇيىمداردىڭ قاتارىنان سانالادى. دارىگەرلەردىڭ ءبىر-بىرىنە دەگەن قۇرمەتى مەن سىيلاستىعى دا جاقسى. قىسقاسىن ايتقاندا, ءبىر جاعادان باس, ءبىر جەڭنەن قول شىعارىپ دەگەندەي ۇيىمشىلدىقپەن ەڭبەك ەتۋ ۇستىندەمىز. ال 1 ساۋىردەن باستاپ جالاقىمىزدىڭ 10 پايىزعا كوتەرىلەتىندىگى ءبىزدىڭ قىزمەتكە دەگەن جىگەرىمىزدى ودان ءارى ارتتىرا تۇسەتىندىگى انىق. قارلىعاش سالىباەۆا, وسكەمەن قالاسىنداعى تەمىرجول اۋرۋحاناسىنىڭ بالالار دارىگەرى. ________________________شىنايى قامقورلىق جەمىسى
كىتاپ – ءبىلىم بۇلاعى. وسى ءبىر قاناتتى ءسوز مەنىڭ ومىرىمە ەرەكشە ءىز قالدىردى. مەكتەپتە جۇرگەن كەزدەن-اق كىتاپقا ەرەكشە قۇمار بولدىم. وسى قۇمارلىق اقىرى مەنىڭ ماماندىق تاڭداۋىما دا ىقپال ەتتى. مىنە, 30 جىلدان استام ۋاقىتتان بەرى مەن كىتاپحاناشى بولىپ ەڭبەك ەتىپ كەلەمىن. ەڭبەك جولىمدى ساكەن سەيفۋللين اتىنداعى اقمولا (تسەلينوگراد) وبلىستىق كىتاپحاناسىندا باستاعان ەدىم. بۇگىندە استاناداعى نازارباەۆ ورتالىعىندا كىتاپحاناشى بولىپ ەڭبەك ەتەمىن. ءبىز وسى ۋاقىتقا دەيىن ءوز ەڭبەگىمىزدە ەلباسىنىڭ ەرەكشە قامقورلىعىن سەزىنىپ كەلەمىز. جاسىراتىنى جوق, كىتاپحاناشىلار الاتىن ەڭبەكاقى ۇلكەن ەمەس. سوعان بايلانىستى بىزگە مەملەكەت تاراپىنان ۇدايى قامقورلىق جاسالىپ كەلەدى. ءۇستىمىزدەگى جىلعى 14 اقپاندا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى تەڭگە باعامىنىڭ وزگەرۋىنە بايلانىستى حالىقتى الەۋمەتتىك جاعىنان قولداۋدىڭ كەشەندى شارالارىن ۇسىنعان بولاتىن. ۇكىمەت وتىرىسىندا ەلباسى نۇرسۇلتان نازارباەۆ «حالىقتى الەۋمەتتىك قولداۋدىڭ كەشەندى شارالارىن قابىلداۋ كەرەك. ۇستىمىزدەگى جىلدىڭ 1 ساۋىرىنەن باستاپ مەملەكەتتىك مەكەمەلەر مەن مەملەكەتتىك قازىناشىلىق كاسىپورىندارىندا قىزمەت ەتەتىن ازاماتتاردىڭ ەڭبەكاقىلارىنا اي سايىن 10 پايىز ۇستەمە تولەنۋىن قاراستىرۋدى تاپسىرامىن», دەپ اتاپ كورسەتتى. سونىمەن بىرگە, ەلباسى ءوزىنىڭ بيىلعى جولداۋىندا 2015 جىلدىڭ 1 شىلدەسىنەن باستاپ ازاماتتىق قىزمەتكەرلەرگە ەڭبەكاقى تولەۋدىڭ جاڭا مودەلىن جاساۋ تۋرالى ۇكىمەتكە ناقتى تاپسىرما بەرگەن بولاتىن. وسى تاپسىرماعا بايلانىستى الەۋمەتتىك سالا قىزمەتكەرلەرىنىڭ قاتارىنا كىرەتىن ءبىزدىڭ, كىتاپحاناشىلاردىڭ ەڭبەكاقىسى 40 پايىزعا دەيىن وسەتىنىن ەستىپ بىلدىك. مىنە, ەرتەڭ 1 ساۋىردەن باستاپ ەڭبەكاقىمىز 10 پايىزعا وسەتىن بولدى. بۇل ءبىز ءۇشىن ۇلكەن الەۋمەتتىك قولداۋ. مەن ءارىپتەستەرىمدى وسى شىنايى قامقورلىققا ساي جەمىستى ەڭبەك ەتۋگە شاقىرامىن. گۇلنار ءابدىراحمانوۆا, نازارباەۆ ورتالىعىنىڭ كىتاپحاناشىسى. استانا. _______العىسىمىز زور
ەلباسى تەڭگە باعامىنىڭ وزگەرۋىنەن سوڭ جەدەل جيىن وتكىزىپ, مەملەكەتتىك مەكەمەلەر مەن كاسىپورىنداردا جۇمىس ىستەيتىن ازاماتتىق قىزمەتكەرلەردىڭ جالاقىسىن ءوسىرۋ جونىندە تاپسىرما بەرگەن ەدى. بۇل ماسەلە, ەڭ الدىمەن, ءبىلىم, عىلىم, دەنساۋلىق ساقتاۋ, مادەنيەت, سپورت جانە الەۋمەتتىك قورعاۋ سالاسىنىڭ قىزمەتكەرلەرىنە بايلانىستى ەكەنىن باسا ايتتى. ياعني, ءساۋىردىڭ بىرىنەن باستاپ جالاقىمىز 10 پايىزعا كوتەرىلەتىن بولدى. ارينە, بۇل – بىزدەر ءۇشىن جاقسى جاڭالىق. انە-مىنە دەگەنشە, مىنە, ءساۋىر دە بولىپ قالىپتى. ءساتىن سالسا, الداعى ايدا ەلباسى ايتقان 10 پايىز قوسىمشاعا قول جەتكىزەمىز دەپ كۇتىپ وتىرمىز. وتكەندە تەلەديداردان پرەزيدەنتتىڭ وسى تاپسىرماسىنا وراي الەۋمەتتىك كومەك كولەمىن كوتەرۋ تۋرالى زاڭ ماجىلىستە ماقۇلدانعانىن ەستىدىك. وندا زەينەتاقى, مۇگەدەكتەر مەن كوپبالالى وتباسىلار سياقتى جاردەماقىنىڭ بارلىق ءتۇرى وسەتىن بولادى دەلىنگەن. سونداي-اق مۇعالىمدەر مەن دارىگەرلەردىڭ دە جالاقىسى كوتەرىلەتىنى ايتىلدى. بۇعان قاجەتتى 116 ميلليارد تەڭگە بيۋدجەتتەن ءبولىنىپتى. بۇل مەملەكەت تاراپىنان بىزدەرگە جاسالعان زور قامقورلىق دەپ بىلەمىز. ءبىزدىڭ ۇيدە مەن دە, مەنىڭ ايەلىم دە مۇعالىم. سونداي-اق, انام زەينەتاقى الادى. ياعني, بۇل 10 پايىز ءوسىم ءبىزدىڭ وتباسىمىز ءۇشىن ءبىرشاما كىرىس بولاعالى تۇر. ول ءۇشىن ەلباسىنا العىسىمىز زور. باۋىرجان داۋىلباي ۇلى, مۇعالىم. اقمولا وبلىسى, تسەلينوگراد اۋدانى, قاجىمۇقان اۋىلى.
