ۋەفا كونگرەسى – استانادا

كەشە استانادا ەۋروپا فۋتبول قاۋىمداستىعىنىڭ (ۋەفا) كەزەكتى XXXVIII كونگرەسى ءوتتى. وعان پرەمەر-مينيستر سەرىك احمەتوۆ, فيفا باسشىسى يوزەف بلاتتەر, ۋەفا پرەزيدەنتi ميشەل پلاتيني مەن ەۋروپا ەلدەرىنىڭ فۋتبول فەدەراتسيالارىنىڭ وكىلدەرى قاتىستى. جيىندى ۇكىمەت باسشىسى اشىپ, ءسوز سويلەدى. ول ۋەفا كونگرەسiنىڭ تمد ەلدەرi اراسىندا العاش رەت قازاقستاندا وتكiزiلىپ جاتقانىن, ءبىزدىڭ ەلىمىز اتالعان ۇيىمعا بەرتىندە عانا قوسىلعانىنا قاراماستان, قازىردىڭ وزىندە ونىڭ جۇمىسىنا بەلسەنە ارالاسۋعا دايىن ەكەنىن ايتتى. كەلەسى كەزەكتە قازاقستان فۋتبول فەدەراتسياسىنىڭ پرەزيدەنتى ادىلبەك جاق­­­سى­بەكوۆ ءسوز الىپ, ەلىمىزدە ميل­ليونداعان ادامنىڭ سۇيىكتى ويىنىنا اينالعان فۋتبولدىڭ دامۋ دەڭگەيىنە, سوڭعى كەزدەرى ەلىمىزدىڭ تۇكپىر-تۇكپىرىندە بالالار مەن جاسوسپىرىمدەر, جاستار فۋتبولىنا باسا ءمان بەرىلىپ وتىرعانىنا دەن قويىپ, قازاق فۋتبولىنىڭ دامۋىنا ۋەفا-نىڭ ۇلكەن ۇلەس قوسقانىن اتاپ ءوتتى. وسى جەردە ول ەۋروپالىق فۋتبول قاۋىمداستىعىنىڭ ماماندارىنىڭ قاتىسۋىمەن ونعا جۋىق سەميناردىڭ وتكەنىن, وسىنىڭ ءوزى ءبىزدىڭ ەل ءۇشىن ماتەريالدىق جانە مەتودولوگيالىق ادىستەمە تۇرعىسىنان كومەك بولعانىن جەتكىزدى. وسىدان كەيىن ءا.جاق­­سى­­بەكوۆ ۋەفا-مەن بايلانىس ودان ءارى جالعاسا بەرەتىنىن, ويتكەنى, اتالعان ۇيىمنىڭ تالاپتارىنىڭ ارقاسىندا ستاديونداردى قايتا جوندەۋ, فۋتبولدى بۇقارالىق سپورتقا اينالدىرۋ سياقتى جۇمىستاردىڭ جۇرگىزىلگەنىن ايتتى. سونىمەن بىرگە, ول قازاقستان فۋتبول فەدەراتسياسى يتاليا, گەرمانيا, يسپانيا سەكىلدى ەۋروپانىڭ فۋتبولى دامىعان ەلدەرىمەن مەموراندۋم جاساپ, كەلىسسوزدەر جۇرگىزگەنىنەن دە حاباردار ەتتى. «وسىنىڭ ءبارى قازاقستان فۋتبولىنىڭ ەۋروپامەن تىعىز قارىم-قاتىناس ورناتىپ, جاڭا قارقىن الۋىنا جاسالىپ جاتقان شارالار», دەدى ول. كونگرەستە قۇرمەتتى قوناق رەتىندە شاقىرىلعان فيفا پرەزيدەنتى يوزەف بلاتتەر دە قازاق فۋتبولىنا قاتىستى ءوز ويىن ءبىلدىردى. ول الدىمەن قازاقستان بيلىگىنىڭ فۋتبولعا دەگەن كوزقاراسىنىڭ جاقسى ەكەنىنە تاعى دا كوز جەتكىزگەنىن, قازاق فۋتبولىنا 100 جىل دەگەنىمىزدىڭ ءوزى ۇلكەن وقيعا ەكەنىن, ەندى الداعى ۋاقىتتا ۋەفا مەن قازاقستان فەدەراتسياسى بىرىگىپ جۇمىس ىستەۋدى ودان ءارى جالعاستىرا بەرەتىنىن مالىمدەدى. جيىندا ونىڭ بۇل ءسوزىن ۋەفا پرەزيدەنتى ميشەل پلاتيني قولدايتىنىن جەتكىزدى. – قازاقستان – كەرەمەت ەل, استانا – جاس ءارi ادەمi قالا. ءبىز بولاشاقتا وسىنداي عاجاپ ەلمەن بايلانىسىمىزدى ءارى قاراي جالعاستىراتىن بولامىز. 60 جىل بۇرىن ۋەفا قۇرىلعان كەزدە ونىڭ XXXVIII كەزەكتi وتىرىسى قازاقستان اتتى كەرەمەت ەلدە جانە جاس ءارi ارۋ استانادا وتەدi دەپ كiم ويلاعان؟ – دەدى ول. ەندى كونگرەستىڭ وزىنە كەلسەك, وندا فۋتبولدى دامىتۋعا بايلانىستى بىرنەشە ماسەلە قارالدى. اتاپ ايتقاندا, ۋەفا باستاماسىمەن بالالار قورى قۇرىلدى. م.ءپلاتينيدىڭ ايتۋىنشا, ول ۇلتتىق قاۋىمداستىقتار ارقىلى جەرگiلiكتi تالانتتى بالالاردى جاتتىقتىرۋعا ارنالادى. «الدىڭعى كۇنi ۋەفا-نىڭ اتقارۋشى كوميتەتi اتالعان قوردى قۇرۋ تۋرالى قۇجاتقا قول قويدى. ەندi بiز ونى ىسكە اسىرۋعا اتسالىساتىن بولامىز», دەدi ۋەفا پرەزيدەنتى. سونىمەن بىرگە, ول اتالعان قوردىڭ تەك ەۋروپادا ەمەس, جەر ءجۇزىنىڭ باسقا دا ەلدەرىندە مۇقتاج بالالاردى قارجىلاندىرۋ باعدارلامالارىمەن اينالىساتىنىن اتاپ كورسەتتى. كونگرەستە بويكوت ماسەلەسى دە ءسوز بولدى. بۇل تۋرالى م.پلاتيني قازىرگى كەزدە كوپتەگەن ەلدەر ساياسي جاعدايعا بايلانىستى وزدەرىنە ۇناماعان مەملەكەتتەرگە بويكوت جاريالاۋعا دايىن تۇراتىنىن, ەگەر بويكوت جاساعىسى كەلسە, ەكونوميكالىق سانكتسيالار, باسقا دا جولدار ارقىلى بويكوت جاساۋعا بولاتىنىن, ال بىراق تا ونىڭ سپورتقا ەشقانداي قاتىسى بولماۋى كەرەكتىگىن مالىمدەدى. كەشەگى جيىندا, سونداي-اق, «ۇلتتار ليگاسى» جوباسى ماقۇلداندى. بۇل ليگا 2018 جىلعى الەم چەمپيوناتىنان كەيىن قولدانىسقا ەنەدى. قازاقستان فۋتبول فەدەراتسياسىنىڭ حابارلاۋىنشا, اتالعان جوبا ۇلتتىق قۇرامالار اراسىنداعى جولداستىق كەزدەسۋدى الماستىرۋى مۇمكىن. ازىرشە تۋرنيرگە 4 توپقا بولىنگەن 16 كوماندا قاتىسادى دەگەن دەرەك قانا بار. بۇل يدەيانى كونگرەستە 54 ەلدىڭ وكىلدەرى ءبىراۋىزدان قولدادى. داستان كەنجالين, «ەگەمەن قازاقستان».