نىساناعا جەتۋ ءۇشىن نىسان كەرەك
«مەملەكەتتىڭ قارجىسى جەلگە ۇشتى», «سپورتقا جاۋاپتى باسشىلار جۇمىسىنان قۋىلسىن» دەگەن ماندەگى اڭگىمە تىيىلماي تۇر. ول تۇسىنىكتى دە. اقشاقار جاساپ كورمەگەن جۇرتتىڭ بالالارى مەدال الىپ, مەرەيى اسىپ-تاسىپ جاتقاندا ىزالانباي قايتسىن وتاندىق جانكۇيەرلەر. جاڭا زەلانديا, اۋستراليا سياقتى مەملەكەتتەرمەن سالىستىرعاندا قارعا كومىلىپ جاتقان ەلدىڭ ۇلاندارى ەمەس پە ەدىك؟!
پاۆلودار وبلىسى – قىستى ەرتە قارسى الىپ, كوكتەمدى كەش شىعارىپ سالاتىن وڭىرلەردىڭ ءبىرى. كليماتتىق جاعدايدى ەسكەرسەك, حوككەي, كونكي تەبۋ جانە شاڭعى سپورتىنان رەسپۋبليكادا الدىڭعى قاتاردان تابىلۋىمىز مىندەتتى دە. ازىرگە ونداي باقىت بۇيىرماي تۇر. «قولدا باردا التىننىڭ قادىرى جوقتىڭ» سيقى. التىن دەمەكشى, پاۆلودارلىق سپورتشىلار قىسقى وليمپيادادان ءالى التىن الىپ كورمەپتى. جالعىز جۇلدە جانعا مەدەۋ. 1998 جىلى ناگانو قالاسىندا وتكەن قىسقى وليمپيا ويىندارىنىڭ قولا جۇلدەگەرى, جەرلەسىمىز ليۋدميلا پروكاشەۆانىڭ جەڭىستى جولى توقتاپ قالعانى وكىنىشتى-اق.
كونكيشى ارۋ بۇگىندە باپكەرلىك قىزمەتتە. پاۆلودار وڭىرىندە قىسقى سپورتتىڭ اقساپ تۇرعانىن جاسىرمايدى. ايتپەسە, باياعىدا-اق اق وليمپيادانىڭ جۇلدەگەرلەرىن توپ-توبىمەن تۇلەپ ۇشىرۋعا بولار ەدى, دەيدى ول.
– ەلىمىزدە كونكي سپورتىمەن اينالىسۋعا ىڭعايلى ەكى جابىق ستاديون بار. ءبىرى – نۇر-سۇلتان قالاسىندا ورنالاسقان, ەندى ءبىرى – «مەدەۋ». مۇزايدىندار قوستاناي, رۋدنىي جانە سەمەي قالالارىندا عانا بار. پاۆلودار بىلاي تۇرسىن, سوڭعى كەزدە كونكي سپورتى قارقىندى دامىپ كەلە جاتقان وسكەمەن, اقتوبە جانە پەتروپاۆل وڭىرلەرىندە اتىمەن جوق. سپورتتىق ينفراقۇرىلىم ماسەلەسىن شەشپەي, جۇلدەدەن دامەلەنۋ بوس اڭگىمە. پاۆلودار وبلىسىندا كونكي سپورتىنىڭ دامۋىنا كوپ كوڭىل بولىنەدى دەپ ايتا الماسپىن. سپورتشىلارعا ارنايى عيمارات قاراستىرىلماعان. وسىنىڭ سالدارىنان اركىمنىڭ قاباعىنا قاراپ, ءتىپتى نۇر-سۇلتان قالاسىنا بارىپ جاتتىعۋعا ءماجبۇرمىز. كونكيشىلەرگە ەشقانداي جاعداي جاسالماسا دا, ۇزدىك ناتيجەگە قول جەتكىزىپ كەلەدى. «چەمپيوندار قاشان شىعادى؟» دەگەن ساۋالدى قويماستان بۇرىن سپورتتىق ينفراقۇرىلىم ماسەلەسىن قولعا العان ءجون, – دەيدى ل.پروكاشەۆا.
بۇل پىكىرمەن كەلىسپەۋگە بولماس. سپورتشىلارعا جاعداي جاساماي, ناتيجە تالاپ ەتۋ دۇرىس ەمەس-اۋ. كەز كەلگەن سپورت ءتۇرى بولسىن, ەڭ اۋەلى جاتتىعۋ الاڭدارىمەن قامتاماسىز ەتىلۋگە ءتيىس ەمەس پە؟ وسى رەتتە وبلىستىق ءتۋريزمدى جانە سپورتتى دامىتۋ جونىندەگى باسقارمانىڭ ءبولىم باسشىسى اينۇر قوسپاقوۆامەن حابارلاستىق.
– ايماعىمىزدا قىسقى سپورت تۇرلەرىنەن كونكي, شاڭعى تەبۋ, بياتلون, مانەرلەپ سىرعاناۋ, فريستايل-اكروباتيكا, شايبالى حوككەيدىڭ ءباسى بيىك. شورت-ترەك سپورتىنا دا قىزىعۋشىلىق ارتا باستادى. شامامەن 8200-دەن استام ادام قىسقى سپورتپەن تۇراقتى اينالىسىپ ءجۇر. بالالار-جاسوسپىرىمدەر سپورت مەكتەبىندە 1 422 ادام جاتتىعىپ, كاسىبي تۇردە شەبەرلىكتەرىن شىڭداۋدا. ۇلتتىق قۇراما ساپىندا 17 پاۆلودارلىق بار. جۋىقتا اياقتالعان بەيجىڭ وليمپياداسىندا جەرلەستەرىمىز يرينا بىكوۆا (شاڭعى سپورتى), دەنيس نيكيشا, ولگا تيحونوۆا (ەكەۋى دە شورت-ترەك) ونەر كورسەتتى. حالىقارالىق جارىستاردا ەل نامىسىن ابىرويمەن قورعايتىن جەرلەستەرىمىزدىڭ قاتارى ارتادى دەپ ۇمىتتەنەمىز. سەبەبى سوڭعى جىلدارى سپورتتىق ينفراقۇرىلىم, بالالار سپورتىن دامىتۋ ىسىنە كوپ كوڭىل بولىنە باستادى, – دەيدى ا.قوسپاقوۆا.
قىسقى سپورتتىق نىساندار جىل سايىن سالىنىپ جاتىر دەپ ايتا الماسپىز. بىلتىر «سپورت سيتي» جوباسى شەڭبەرىندە وبلىس ورتالىعىندا جاڭا مۇز-سىرعاناۋ ارەناسى پايدا بولدى. وعان دەيىن جەر-جەردە شاعىن فۋتبول الاڭدارىنىڭ سالىنىپ كەلگەنى عانا ەسىمىزدە قالىپتى. سپورت سالاسىنا جاۋاپتى مامانداردىڭ سوزدەرىنە سەنسەك, الداعى ۋاقىتتا باياناۋىل اۋدانىندا شاڭعى روللەر تاس جولى سالىنباق. جوبالىق-سمەتالىق قۇجاتى ءازىر تۇر. تەك بيۋدجەتتەن قاراجات ءبولىنۋى كەرەك. سونداي-اق ەكىباستۇز قالاسىن الەۋمەتتىك-ەكونوميكالىق دامىتۋدىڭ 2021-2025 جىلدارعا ارنالعان كەشەندى جوسپارىنا سايكەس جاڭا مۇز سارايىن سالۋ كوزدەلۋدە. جوبانىڭ بولجامدى قۇنى – 2 500 ملن تەڭگە.
جالپى, ايماعىمىزدا جوعارى سپورتتىق شەبەرلىك مەكتەبىنىڭ يەلىگىندەگى جابىق مۇز كەشەنى (بۇرىنعى «استانا» مۇز سارايى), 3 شاڭعى بازاسى,
70 حوككەي كورتى (ونىڭ 9-ى جابىق تۇردەگى) بار ەكەن. سولتۇستىك ءوڭىر ءۇشىن كوپ ەمەس, ارينە. ايتەۋىر, جىل سايىن توزعانىن جاماپ, ەسكىسىن جاڭارتىپ الەكپىز.
جوعارى سپورتتىق شەبەرلىك مەكتەبىنىڭ ديرەكتورى قايرات قايىرباەۆتىڭ ايتۋىنشا, الدىڭعى جىلى «جۇمىسپەن قامتۋدىڭ جول كارتاسى – 2020» باعدارلاماسى شەڭبەرىندە مۇز كەشەنىنىڭ شاتىرى جاڭارتىلعان.
– شاتىردىڭ اۋىستىرىلماعانىنا 10 جىلدان اسا ۋاقىت وتكەن ەدى. سونىڭ سالدارىنان توبەدەن سۋ اعىپ, اكىمشىلىك كورپۋس, فيتنەس-زال, كورت سياقتى عيماراتتىڭ نەگىزگى بولىكتەرى ءجيى ب ۇلىنەتىن-ءدى. جوباعا سايكەس عيماراتتىڭ جەرتولەسى دە رەتكە كەلتىرىلىپ, جالپى ۇزىندىعى 230 مەتردى قۇرايتىن قۇبىرلار جاڭارتىلدى. نىساننىڭ ىشكى بولىگى ءتۇرلى تۇسكە بويالىپ, اجارى كەلىسە تۇسكەنىن اتاپ وتكەن ءجون, – دەيدى ق.قايىرباەۆ.
مۇز سارايىنداعى جاڭاشىلدىقتاردىڭ ءبىرى – زاماناۋي تابلو. ەندىگى جەردە جازبالار تەك ەكراندا عانا ەمەس, ءتۇرلى-ءتۇستى ارىپپەن مۇز ايدىنىندا دا جارق ەتۋدە. مۇنى تەلەديداردان قۇرلىقتىق حوككەي ليگاسىنىڭ ويىندارىن تاماشالاپ جۇرگەن كوزى قاراقتى جانكۇيەرلەر جاقسى بىلەدى. تابلونىڭ كولەمى دە ۇلكەن. وسىلايشا, كورەرمەندەر سوعىلعان شايبانىڭ قايتالاۋىن, وزگە دە اقپاراتتاردى جاقىننان كورە الادى. مۇزايدىندى جارىقتاندىرۋ ءىسى دە قولعا الىنعان. جارتى بولىگىنە جاڭا شامدار ورناتىلىپ, كەزدەسۋلەردى تىكەلەي ەفيردە ترانسلياتسيالاۋعا جول اشىلماق. سونداي-اق شامدار سىعىرايماۋى ءۇشىن ەلەكتر جەلىسىن جاڭعىرتۋ جۇمىستارى جۇرگىزىلگەن.
– ازىرگە تەحنيكالىق ماسەلەلەر رەتكە كەلتىرىلۋدە. الداعى ۋاقىتتا عيماراتتىڭ قاسبەتىن جاڭارتۋ قولعا الىنادى دەپ جوسپارلانىپ وتىر. باسپالداقتاردى دا گرانيتتەن ورناتۋ ويدا بار. باستىسى – جانكۇيەرلەرگە ىڭعايلى جاعداي جاساۋ. كورەرمەندەر زالدىڭ سۋىق ەكەنىن ءجيى ايتادى. ول ءۇشىن ىلعالدى اۋانى كەپتىرگىش جۇيەنى اۋىستىرۋ قاجەت. وعان شامامەن 20 ميلليون تەڭگە قاراجات قاجەت, – دەيدى قايرات قايىرباەۆ.
باسىمدىق – بالالار سپورتىنا!
وبلىستىق ءتۋريزمدى جانە سپورتتى دامىتۋ جونىندەگى باسقارمانىڭ ءبولىم باسشىسى ولەگ كولەۆتىڭ ايتۋىنشا, شايبالى حوككەيمەن اينالىسۋ قانشا جەردەن قىمبات دەسەك تە, جىل سايىن كوپتەگەن بالا حوككەي ۇيىرمەلەرىنە قاتىسۋعا نيەت بىلدىرەدى ەكەن.
– بالاسىن شايبالى حوككەي ۇيىرمەسىنە بەرگەن اتا-انالارعا سالماق تۇسەتىنى راس. سەبەبى قاجەتتى كيىمدەر مەن قۇرالداردىڭ باعاسىن ەسەپتەگەندە 200-250 مىڭ تەڭگەدەن اسىپ جىعىلادى. ءبىز جىل سايىن بيۋدجەتتى ناقتىلاعان ۋاقىتتا بالالار-جاسوسپىرىمدەر مەكتەبىندەگى حوككەي توپتارىنا فورما ساتىپ الۋ كەرەك ەكەنىن ءجيى كورسەتەمىز. بىراق ۇسىنىسىمىز ءاردايىم قولداۋ تابا بەرمەيدى. سول سەبەپتى, كوبىنە اتا-انالار قاجەتتى زاتتاردى وزدەرى ساتىپ الادى. جالپى, پاۆلوداردا حوككەي سپورتىن سۇيەتىندەر كوپ. وبلىس ورتالىعىنان بولەك, ەكىباستۇز, اقسۋ قالالارىندا, تەرەڭكول اۋدانىندا اۋەسقوي حوككەي كوماندالارى بار, – دەيدى ول.
بالالار سپورتىنا توقتالۋىمىز بەكەر ەمەس. مەملەكەت باسشىسى قاسىم-جومارت توقاەۆ ءوز جولداۋىندا بۇقارالىق جانە بالالار سپورتىن دامىتۋعا باسىمدىق بەرۋ كەرەك ەكەنىن شەگەلەپ ايتقان بولاتىن. بۇل رەتتە شايبالى حوككەيدەن ەل چەمپيوناتىندا باق سىناپ جۇرگەن ەrtis كومانداسىنىڭ بيۋدجەتى قىسقارعانىن اتاپ وتكەن ءجون. قارجىنىڭ قايدا باعىتتالعانىن ءتۇسىنىپ وتىرعان بولارسىز. قارجىلىق قيىندىقتارعا بايلانىستى كوپتەگەن ويىنشى پاۆلودارلىق ۇجىممەن قوش ايتىستى. قوماقتى جالاقى الىپ كەلگەن ليگونەرلەر وزگە باي كوماندالاردىڭ ەسىگىن سىعالاپ كەتتى. قۋانتارلىعى, كەيبىر پاۆلودارلىق ويىنشىلار جالاقى مولشەرى ماڭىزدى ەمەس ەكەنىن ايتىپ, تۋعان قالاسىنىڭ نامىسىن قورعاۋعا كەلىستى. جەرگىلىكتى جاس ويىنشىلارعا سەنىم ارتقان پاۆلودارلىق ۇجىمنىڭ جاعدايى وسى.
قورىتا ايتساق, بالالار سپورتىن دامىتپاي, سپورتتىق ينفراقۇرىلىمدى جانداندىرماي جەتىستىككە جەتۋ قيىن. بەيجىڭ وليمپياداسىنان كەيىنگى وكپە باسىلار. ءتورت جىلدان كەيىن يتاليا جەرىندە (ميلان جانە كورتينا-د’امپەتستسو شاھارلارىندا) وتەتىن اق وليمپياداعا دايىندىقتى بۇگىننەن باستاۋ كەرەك. الەمگە تانىمال وپەرا ءانشىسى پاۆلودارلىق ماريا مۋدرياك باعىندىرعان ميلان شاھارى پاۆلودارلىق سپورتشىلارعا, وتاندىق وعلاندارعا جۇعىستى بولسىن!
پاۆلودار وبلىسى
