الايدا ونىڭ اسكەرگە بارۋ ارمانى بىردەن ورىندالا قويعان جوق. مۇنىڭ مىناداي سەبەبى بار. بوزبالانىڭ بويى – 1 مەتر 99 سانتيمەتر. اياعىنا 47 ولشەمدى ەتىك كيەدى.
– تاراز قالاسىنداعى تەمىرجول كوللەدجىندە ارنايى ورتا ءبىلىم الدىم. كوللەدجدە وقىپ جۇرگەندە اسكەرگە بارۋ تۋرالى ويلانا باستادىم. بىلتىرعى جازدا اسكەرگە شاقىرۋ پۋنكتىنە كەلدىم. بىراق مەنى اسكەرگە الا قويمادى. سەبەبى سول كەزدەگى سالماعىم – 140 كەلى. بۇل اسكەرگە بارۋىما كەدەرگى بولدى. ءسويتىپ, وقۋىمدى جالعاستىرا بەردىم, –دەيدى نيكيتا شەۆين.
اسكەرگە بارۋ ءۇشىن ارتىق سالماقتان ارىلۋدى ماقسات ەتىپتى. ماقساتىنا قول جەتكىزۋ ءۇشىن جاتتىعۋدى باستاعان. بىرنەشە ايدان كەيىن 20 كەلىدەن استامعا ارىقتاعان. بىلتىرعى جەلتوقساندا اسكەرگە شاقىرىلدى. قازىر اسكەري بورىشىن مۇنايلى شاھار – اتىراۋ قالاسىنداعى ۇلتتىق ۇلاننىڭ №5546 اسكەري بولىمىندە اتقارىپ ءجۇر.
– مەنىڭ بويىم دا, سالماعىم دا مەكتەپتەگى كەزىمدە تەز ءوستى. اسكەري بولىمدەگى العاشقى كۇندەر وتە قىزىقتى ءوتتى. مۇندا ءبارى ماعان كوڭىل اۋدارىپ, بويىم مەن سالماعىم تۋرالى قىزىعۋشىلىق تانىتتى. بۇل تارازدان جولاۋشىلار پويىزىنا ءمىنىپ, اتىراۋعا كەلە جاتقاندا باستالدى. مەنىمەن الدىمەن №5546 اسكەري ءبولىم كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, پودپولكوۆنيك بايرام اليەۆ سويلەسىپ, ومىرلىك ماقساتىم تۋرالى سۇرادى. اڭگىمە اراسىندا سالماعىم مەن بويىما قاتىستى ساۋال ءوربىدى. سالماعىم 120 كەلى دەپ جاۋاپ بەردىم, –دەيدى ەڭ ۇزىن سارباز.
ەندى نيكيتا شەۆين سالماعىنىڭ شامامەن 90 كەلىگە دەيىن تومەندەيتىنىنە ءۇمىتتى بولىپ وتىر.
اتىراۋ وبلىسى
