مەملەكەت باسشىسى 2021 جىلعى قىركۇيەكتەگى جولداۋىندا مەملەكەتتىك قىزمەتتەردى الۋ كەزىندەگى پروبلەمالارعا نازار اۋدارىپ, بۇل پروتسەستەردى تولىعىمەن تسيفرلاندىرۋدى تاپسىرعان بولاتىن. QR كود ارقىلى تولەم جاساۋ سياقتى سەرۆيستەر ازاماتتاردىڭ مەملەكەتتىك قىزمەتتەردى الۋ رەتىن جەڭىلدەتۋگە كومەكتەسەدى.
قازىر QR كودتىڭ كومەگىمەن 146 ءتۇرلى مەملەكەتتىك قىزمەتتىڭ اقىسىن تولەۋگە بولادى. بولاشاقتا بۇل ءتىزىم تولىقتىرىلاتىن بولادى.
«سەرۆيس ەنگىزىلگەن ساتتەن باستاپ بولىمدەردەگى كاسسالار جۇكتەمەسى تومەندەدى. كليەنتتەر ۋاقىتىن ۇنەمدەپ, وپەراتوردىڭ الدىندا وتىرىپ-اق قىزمەت اقىسىن تولەيدى, ءارى QR كود ارقىلى تولەم جاسالعاندا كوميسسيا الىنبايدى», دەدى «ازاماتتارعا ارنالعان ۇكىمەت» مەملەكەتتىك كورپوراتسياسى الماتى قالاسى فيليالى ديرەكتورىنىڭ ورىنباسارى اسەم بولاتبەكوۆا.
QR تولەمدى بەلسەندى قولدانعانداردىڭ ىشىندە الماتى قالاسىنىڭ (72 052) تۇرعىندارى كوش باستاپ تۇر, ەكىنشى ورىندا قاراعاندىلىقتار (63 278), ودان كەيىن تىزىمدە استانالىق تۇرعىندار (54 354).
QR كودتىڭ كومەگىمەن مەملەكەتتىك قىزمەتتەردىڭ باج الىمىن ەڭ از تولەگەندەر اتىراۋ (23 080) مەن سولتۇستىك قازاقستان وبلىسىنداعىلار (23 449).
ەستەرىڭىزگە سالا كەتەيىك, QR كود ارقىلى مەملەكەتتىك باج الىمىن تولەۋ Kaspi جانە Halyq Homebank ءموبيلدى قوسىمشالارى ارقىلى قولجەتىمدى.
