سونداي-اق قارجىلىق مونيتورينگ اگەنتتىگىنىڭ توراعاسى جانات ەليمانوۆ بيىل شەتەلگە اۋدارىلعان قاراجاتتىڭ وتكەن جىلدىڭ سايكەس كەزەڭىمەن سالىستىرعاندا 30 پايىزعا ازايعانىن ايتتى.
«قر قارجىلىق مونيتورينگى اگەنتتىگى كاپيتالدى شىعارۋدى باقىلاۋ شارالارىن كۇشەيتۋ بويىنشا جۇرگىزىلىپ جاتقان جۇمىسقا قاتىستى دەپۋتاتتىق ساۋالدى قارادى. كاپيتالدى زاڭسىز شىعارۋعا جول بەرمەۋ ماقساتىندا قارجى رەتتەۋشىلەرى - ۇلتتىق بانك (جانە قارجى نارىعىن رەتتەۋ جانە دامىتۋ اگەنتتىگىمەن (قنردا) بىرلەسىپ, كۇدىكتى ترانسشەكارالىق اۋدارىمداردىڭ كۇشەيتىلگەن مونيتورينگى جولعا قويىلدى. اعىمداعى جىلى جالپى سوماسى 150 ملرد تەڭگەدەن اساتىن ەلدەن تىس جەرلەرگە زاڭسىز اۋدارۋ تاۋەكەلى جوعارى كۇدىكتى وپەراتسيالار 3 ەسە كوپ توقتاتىلدى جانە قۇقىق قورعاۋ ورگاندارىنا جىبەرىلدى. قابىلدانىپ جاتقان شارالار ەسەبىنەن شەتەلگە اقشا قاراجاتىن شىعارۋدىڭ قانداي دا ءبىر اۋىتقۋشىلىعى بايقالمايدى. كەرىسىنشە, بيىل شەتەلگە 30 پايىزعا از اۋدارىلدى», دەدى جانات ەليمانوۆ.
اگەنتتىك توراعاسى قاڭتار ايىندا جاسالعان شەتەلدىك اۋدارىمدار تۋرالى دا ايتىپ بەردى.
«وسىلايشا, كۇدىكتى جانە شەكتى وپەراتسيالار تۋرالى دەرەكتەرگە سايكەس, بيىلعى قاڭتار ايىندا شەتەلگە اۋدارىمدار كولەمى 2,6 ترلن تەڭگەنى قۇرادى (2021 جىلدىڭ سايكەس كەزەڭىندە – 3,5 ترلن تەڭگە). وپەراتسيالاردىڭ 92 پايىزى 9 ەلگە تيەسىلى: اقش-1,1 ترلن تەڭگە; رەسەي – 814 ملرد تەڭگە; ۇلىبريتانيا – 176 ملرد تەڭگە; قىتاي– 80 ملرد تەڭگە; گەرمانيا – 79,7 ملرد تەڭگە; ليحتەنشتەين – 44,5 ملرد تەڭگە; شۆەيتساريا – 43,8 ملرد. تەڭگە; گونكونگ – 30 ملرد تەڭگە جانە ءباا – 29,4 ملرد تەڭگە», دەدى ول.
