ورالدىڭ كوشەلەرى شۇرق تەسىك

وتكەن جىلدىڭ جازىندا دا ورال قالاسى كوشەلەرىنىڭ ويقىل-شويقىلى كوبەيىپ بارا جاتقانى انىق بايقالدى. سونىمەن, كۇز, ونىڭ ارتىنان قىلىشىن سۇيرەتىپ قىس كەلدى. اقپاندا اقىرعان اياز سوقتى. وسى كەزدە جەنتەكتەلگەن, ابدەن نىعىزدالعان قار تۇيىرشىكتەرى كوشەلەردەگى قارا جابىننىڭ تەسىك-شۇڭقىرىن ۋاقىتشا بولسا دا بىتەپ تاستاعانداي كورىندى. ەندى, مىنە, كوكتەم كەلىپ قار ەرىپ ەدى, ورال قالاسىنىڭ تۇرعىندارى كوشەلەردىڭ بۇعان دەيىنگى كۇيىنە زار بولىپ قالدى. مۇرتقا وكپەلەپ جۇرگەندە ساقال شىقتى دەگەن وسى دا. بۇرىنعى, بۇرىنعى ما, كوشەلەر شۇرق تەسىك بولىپ ابدەن سيقى قاشىپ كەتىپتى. ياعني قىس كەزدەرىندەگى اق قار, كوك مۇزدان كوشەلەر ۋاقىتىندا دۇرىس تازالانباعاندىقتان ونىڭ ابدەن جەلىنگەنى مەن مۇجىلگەنى, ونىڭ ورنى تەسىك-شۇڭقىرلارعا اينالعانى كوزگە ۇرىپ تۇر. شەكارالاس وڭىردەگى وبلىس ورتالىعىنىڭ كەيبىر اۋماقتارىن جەڭىل كولىكپەن ءجۇرىپ ءوتۋدىڭ ءوزى ەش مۇمكىن ەمەس. بۇعان ادامنىڭ بەلى دە, كولىكتىڭ بەلتەمىرى دە شىداس بەرە المايدى. ناعىز ازاپ دەرسىز. ءدال وسىنداي كورىنىستەر قالالىق پەرزەنتحانا مەن ونكولوگيالىق ورتالىق ورنالاسقان سول­تۇستىك شىعىس بەتتەگى اۋداندا ورىن الىپ وتىر. ەگەر اياق استىنان تولعاق قىسقان انالار, جاس ايەلدەر مەن كەلىنشەكتەر مۇنداي استان-كەستەڭى شىققان, جول سيقى جوق شۇڭ­قىر­لاردى باسىپ ءوتىپ پەرزەنتحاناعا جەتكەنگە دەيىن تۇسىك تاستايتىن بولسا, بۇعان ەش تاڭدانۋعا بولمايدى. تەك ونىڭ بەتىن ءارى قىلسىن دەڭىز. جەرگىلىكتى بيلىك ورگاندارى ءار جيىن سايىن كوشەلەرگە اسفالت توسەلىپ جاتقانى جونىندە تۇرعىنداردى حابارلاندىرىپ تۇرادى. الايدا, سونىڭ ناتيجەسى كورىنبەي-اق قويدى. وتكەن جىلدىڭ جازىندا سىر بويىنا جولىمىز ءتۇستى. مۇندا وبلىس ورتالىعى كوشەلەرىنە اسفالت توسەۋ جۇمىستارى ءۇش اۋىسىمدا جۇرگىزىلىپ جاتقانىنا كۋا بولىپ ورالدىق. مۇنداي ۇزدىكسىز ىرعاق وندىرمەي قويا ما, از ۋاقىتتىڭ ىشىندە قىزىلوردا قالاسىنىڭ كوشەلەرىنە تاقتايداي تەگىس ساپالى دا ءساندى قارا جابىن توسەلىپ ۇلگەرىپت­ى. ارينە, بۇل ءۇشىن ءبىرىنشى كەزەكتە قارجىلاندىرۋ ماسەلەسى شەشىمىن تابۋى قاجەت. بۇل جونىندە تەك بارەكەلدى دەۋگە تۋرا كەلدى. ويتكەنى, رەسپۋبليكالىق ترانش ارقىلى سىر بويىنىڭ باس قالاسى كوشەلەرىن اسفالتتاۋعا 6,5 ميلليارد تەڭگە بولىنگەن ەكەن. ارينە, از قاراجات ەمەس. ءدال وسى كەزەڭدە ورال وڭىرىنە بولىنگەن قاراجات 500 ميلليون تەڭگەگە دە جەتپەي قالعانى جاسىرىن ەمەس. ارينە, بۇل ارادا ۇكىمەت تاراپىنان قارجى كوزدەرىن قاراستىرۋدا الا-قۇلالىق بولماعانى انىق. ياعني سىر ەلىن باسقارىپ وتىرعان ازاماتتار ءبىرىنشى كەزەكتە وزدەرىنىڭ تىكەلەي فۋنكتسيونالدىق مىندەتتەرىنە ادالدىق كورسەتە بىلگەنى اڭعارىلادى. جول قۇرىلىسىنا قاجەتتى قۇجاتتار مەن نورماتيۆتەر دە ورتالىق ورگاندارعا ەرتەرەك ازىرلەنىپ جىبەرىلگەن ەكەن. ءسويتىپ, مۇندا جايباسارلىق دەگەن دەرت اتىمەن جويىلعانعا ۇقسايدى. ارينە, ءبىز مۇنى ايتقاندا باتىسقازاقستاندىق باسشىلار قول قۋسىرىپ قاراپ وتىر دەگەن ويدى مەڭزەۋدەن اۋلاقپىز. كەرىسىنشە, بيىل ورال وڭىرىندە اۆتوجول قۇرىلىسىنا ەرەكشە قارقىن تۋعىزىلماق. بۇل ءۇشىن ورتالىقتان, ياعني رەسپۋبليكالىق قاراجات كوزدەرىنەن بولىنگەن بەس ميلليارد تەڭگەدەن استام سوماعا قوسىمشا وبلىس بيۋدجەتىنەن دە وسى مولشەرگە جەتەعابىل قاراجات قاراستىرۋ كوزدەلگەن. ارينە, بۇل ازىرگە مەجە مەن العا قويعان ماقسات, بەرىلگەن ۋادە عانا. ال كەز كەلگەن جوبا مەن جوسپار ءبىرىنشى كەزەكتە ونىڭ ورىندالۋىمەن قۇندى, باعالى ەكەنى حاق. ەندەشە, بالاپاندى كۇزدە سانايدى دەگەندەي ورال وڭىرىندەگى جول قۇرىلىسى, سونىڭ ىشىندە وي-شۇڭقىرى كوبەيىپ كەتكەن ورال قالاسى كوشەلەرىنىڭ جاي-كۇيى جونىندەگى ءتۇيىن ءالى الدا دەپ بىلەمىز. تەمىر قۇسايىن, «ەگەمەن قازاقستان». ورال.