قاسىم-جومارت توقاەۆ ازاماتتاردىڭ نارازىلىعىن لاڭكەستەر مەن قىلمىسكەرلەر پايدالانىپ كەتكەنىن ايتىپ ءوتتى.
– بۇعان ءبارىمىز كۋا بولدىق. راسىندا, الەۋمەتتىك جەلىدە تۇڭعىش پرەزيدەنتىمىز تۋرالى ءارتۇرلى ويلار ايتىلىپ, جازىلىپ جاتىر. قانشا ادام بولسا, سونشا پىكىر بولادى, – دەدى ول ءجۋرناليستىڭ تۇڭعىش پرەزيدەنت پەن ونىڭ وتباسىنا قاتىستى سۇراعىنا.
سونداي-اق قاسىم-جومارت توقاەۆ نۇرسۇلتان ءابىش ۇلى نازارباەۆتىڭ 30 جىلدىق ەڭبەگىن جوققا شىعارۋعا بولمايتىنىن جەتكىزدى.
– تاريحقا قيانات جاساماۋ كەرەك. نۇرسۇلتان نازارباەۆ – مەملەكەتىمىزدىڭ ىرگەسىن قالاعان, مەملەكەتتىگىمىزدى نىعايتۋعا زور ۇلەس قوسقان تۇلعا. ونىڭ قىزمەتىنە ءادىل باعا بەرۋگە مىندەتتىمىز. تۇڭعىش پرەزيدەنتتىڭ كەمشىلىكتەرى بولسا, ودان جاس باسشىلار ساباق الۋى قاجەت. قاڭتار وقيعاسى ەلىمىزگە دە, مەنىڭ وزىمە دە ۇلكەن ساباق بولعانى ءسوزسىز. ءتيىستى قورىتىندى جاسالدى. قازىر ەلىمىزدە بولىپ جاتقان ساياسي شەشىمدەر − سونىڭ ناتيجەسى. الدىمىزدا وتە كوپ جۇمىس بار. مۇنى بارلىعى كورىپ, ءبىلىپ وتىر دەپ ويلايمىن, – دەدى پرەزيدەنت.
مەملەكەت باسشىسى حالىق نارازىلىعىنىڭ استارىندا وتكىر الەۋمەتتىك ماسەلە بارىن دا تىلگە تيەك ەتتى.
– حالىقتىڭ كوبىنىڭ الەۋمەتتىك جاعدايى تومەن. بۇل – اقيقات. مەملەكەتتىڭ تۇتاس بايلىعى از عانا توپتىڭ قولىندا. تەڭسىزدىك بەلەڭ الۋدا. نارازىلىقتىڭ ءتۇپ-تامىرى وسىدان باستالدى. بۇل ماسەلە تۋرالى مەن پارلامەنتتە, باسقا دا جيىنداردا ايتتىم, – دەدى ول.
