قاڭتار قاسىرەتىنىڭ ءبىر شەتى شەتەلدىك باق بەتتەرىندە دە كورىندى. كورشىلەس مەملەكەتتەردىڭ جۋرناليستەرى ەلىمىزدە بولعان وقيعالاردى بايانداۋ كەزىندە «رەسەي قازاقستاندى قۇتقاردى» دەگەن ماعىنادا حابار تاراتقانىن كوردىك.
وسى تۇستا, مەملەكەت باسشىسى قازاقستان مەن رەسەي اراسىنداعى قارىم-قاتىناس جايلى ءسوز قوزعادى.
«رەسەي – قازاقستانعا جاقىن ورنالاسقان سەرىكتەس مەملەكەت. وسىنداي جاعدايدا ونىڭ بىزگە كومەككە كەلۋى ايتپاسا دا تۇسىنىكتى. مۇنى قۇتقارۋ ەمەس, ورتاق مۇددەمىزدى قورعاۋ ءۇشىن جاسالعان ءىس-ارەكەت دەپ تۇسىنۋگە بولادى. بۇل – ءبىر. ەكىنشىدەن, اتالعان ماسەلەگە گەوساياسي احۋال تۇرعىسىنان دا قاراۋ كەرەك. ۇجىمدىق قاۋىپسىزدىك تۋرالى شارت ۇيىمى – بارىمىزگە ورتاق قۇرىلىم. رەسەي جانە ۇيىمعا مۇشە مەملەكەتتەر قازاقستاننىڭ عانا ەمەس, وزدەرىنىڭ دە قاۋىپسىزدىگىن ويلادى. سول ءۇشىن كومەك قولىن سوزدى», دەپ ءتۇسىندىردى پرەزيدەنت.
