بۇل تۋرالى ۇكىمەتتىڭ رەسمي سايتى ءمالىم ەتتى.
قازىرگى كەزدە الماتى قازاقستاننىڭ ەڭ ءىرى ساۋدا جانە مادەني ورتالىعى بولىپ تابىلادى. قر-دا تىركەلگەن كاسىپورىنداردىڭ ۇشتەن ءبىر بولىگى وسى قالادا ورنالاسقان.
«ساۋدا الماتى ەكونوميكاسىنىڭ نەگىزگى سالاسى بولىپ تابىلادى. 2021 جىلى بولشەك ساۋدانىڭ ءوسۋى 13,5%, كولەمى – 4 ترلن 212 ملرد تەڭگەنى قۇرادى. قر-نىڭ بولشەك ساۋدا كولەمىندەگى الماتىنىڭ بولشەك ساۋدا ۇلەسى 31,5% قۇرايدى», دەدى باقىت سۇلتانوۆ.
پرەمەر-ءمينيستردىڭ ورىنباسارى – قر ساۋدا جانە ينتەگراتسيا ءمينيسترى باقىت سۇلتانوۆتىڭ ايتۋىنشا, قاڭتارداعى وقيعالار جەكەلەگەن بيزنەس سۋبەكتىلەرىنىڭ, اسىرەسە, ساۋدا سالاسىنداعى جۇمىسىنا تەرىس اسەر ەتتى. بۇگىنگى تاڭدا ۇكىمەتتىك كوميسسيا زارداپ شەككەن كاسىپكەرلەرگە كەلتىرىلگەن شىعىندى وتەۋ تەتىگىن بەكىتتى, وعان بىرقاتار وزگەرىستەر ەنگىزۋ ۇسىنىلادى.
الماتى قالاسىنىڭ وڭىرلىك كوميسسياسى قولدانىستاعى تەتىككە وزگەرىستەر ەنگىزۋدى ۇسىندى. الماتى اكىمى ەربولات دوساەۆ مالىمدەگەندەي, شىعىننىڭ بارلىق ساناتتارى ءۇشىن 10 ملن تەڭگەگە دەيىنگى تولەم سوماسىمەن جەڭىلدەتىلگەن ەسەپ بويىنشا زالالدى وتەۋدى جۇزەگە اسىرۋ, سونداي-اق «جابدىق» ساناتى ءۇشىن جەڭىلدەتىلگەن تەتىكتى قولدانۋ جانە ادۆوكاتتاردىڭ قىزمەتتەرىنە اقى تولەۋدى وتەۋ ۇسىنىلدى.
«بۇل وتىنىمدەردى قاراۋ مەرزىمىن 1 ايدان 2 اپتاعا دەيىن قىسقارتۋعا جانە بيزنەسكە كەلتىرىلگەن شىعىندى وتەۋ ءراسىمىن ەداۋىر جەدەلدەتۋگە مۇمكىندىك بەرەدى», دەدى الماتى اكىمى ەربولات دوساەۆ.
سونداي-اق الەۋمەتتىك ماڭىزى بار ازىق-ت ۇلىك تاۋارلارىنىڭ باعاسىن تۇراقتاندىرۋ ماسەلەسى تالقىلاندى «اينالىمداعى» قارىزدار اياسىندا ءامات باعاسىن تۇراقتاندىرۋ ءۇشىن جەرگىلىكتى بيۋدجەتتەن كوكونىس, ەت ونىمدەرى, جۇمىرتقا جانە باكالەيا باعالارىن بەلگىلەۋ ءۇشىن 11 ملرد تەڭگە ءبولىندى.
سونداي-اق الەۋمەتتىك نان, ءسۇت ونىمدەرى مەن كۇنباعىس مايىنىڭ ءىرى وندىرۋشىلەرىنە قارىز ءبولۋ پىسىقتالۋدا. بۇدان باسقا, قالا اكىمدىگىندە پرەمەر-ءمينيستردىڭ ورىنباسارىنا باياندالعانداي, قازىرگى كەزدە اكىمدىك جەڭىلدىكپەن قارجىلاندىرۋ جانە ۋاقىتشا ساقتاۋ قويمالارىن سالۋ ءۇشىن قالا شەگىندە جەر تەلىمدەرىن ءبولۋ ارقىلى شاعىن حابتار قۇرۋ مۇمكىندىگىن قاراستىرۋدا. بۇل ءۇي جانىنداعى دۇكەندەردىڭ الىپساتارلارعا تاۋەلدىلىگىن تومەندەتۋگە, شاعىن ساۋدا نۇكتەلەرىنىڭ يەلەرىن ءىرى كوتەرمە ساۋدا بازارلارىندا ءوز بەتىنشە ساۋدا-ساتتىق جاساۋ قاجەتتىگىنەن قۇتقارۋعا مۇمكىندىك بەرەدى.
بۇل تۇتاستاي العاندا شاعىن ىشكى دۇكەندەردەگى باعا دەڭگەيىنە وڭ اسەر ەتۋى كەرەك. كەڭەس قورىتىندىسى بويىنشا باقىت سۇلتانوۆ الماتى اكىمدىگىنە جانە قر سيم-ءنىڭ ساۋدا كوميتەتىنە باعالاردى مونيتورينگتەۋ جانە تالداۋ بويىنشا جۇمىستى جالعاستىرۋدى, ءامات باعالارىن تۇراقتاندىرۋ اياسىندا «اينالىم سىزباسىن» ۇلعايتۋ بويىنشا شارالار قابىلداۋدى, ازىق-ت ۇلىك تاۋارلارىنا باعا بەلگىلەۋدىڭ بارلىق تىزبەگى بويىنشا دەلدالدىق سىزبالاردى تەكسەرۋ جونىندەگى وڭىرلىك كوميسسيالاردىڭ قىزمەتىن جانداندىرۋدى, سونداي-اق زارداپ شەككەن كاسىپكەرلىك سۋبەكتىلەرىنە كومەك كورسەتۋ جانە وتەماقى تولەۋ جونىندەگى جۇمىستى جالعاستىرۋدى تاپسىردى.
