سالتاناتتى شاراعا «قازاقفيلم» كينوستۋدياسى مەن م.لەرمونتوۆ اتىنداعى مەملەكەتتىك اكادەميالىق ورىس دراما تەاترى باسشىلىعى مەن ۇجىمى, ۇلتتىق كينونى قولداۋ مەملەكەتتىك ورتالىعىنىڭ وكىلدەرى, شاكەن ايمانوۆتىڭ تۋعان-تۋىستارى, بەلگىلى كينوگەرلەر مەن جۋرناليستەر قاتىستى.
– مىنە, 40 جىلعا جۋىق ءبىزدىڭ كينوستۋديامىز ۇلى رەجيسسەر شاكەن ايمانوۆتىڭ ەسىمىمەن اتالىپ كەلەدى. ول ءبىزدىڭ مادەنيەتىمىزدىڭ دامۋىنا ولشەۋسىز ۇلەس قوستى. شاكەن كەنجەتاي ۇلى زامانداستارىمەن بىرگە ۇلتتىق كينونىڭ بەرىك ىرگەتاسىن قالادى. سونداي-اق بۇگىن قازاق كينوسىنىڭ جۇلدىزدار اللەياسىندا ء«بىزدىڭ سۇيىكتى دارىگەر» فيلمىندە باستى ءرولدى سومداعان قازاقستاننىڭ حالىق ءارتىسى يۋري بوريسوۆيچ پومەرانتسەۆكە ارنالعان اتاۋلى جۇلدىز جاندى, – دەدى ءوزىنىڭ العى سوزىندە «قازاقفيلم» كينوستۋدياسىنىڭ پرەزيدەنتى اقان ساتاەۆ.
– بۇل كۇن ءبارىمىز ءۇشىن ەستە قالارلىق ماڭىزدى كۇن. شاكەن كەنجەتاي ۇلى ويىما ورالعان سايىن, ول كىسى شىعارماشىلىعىمەن, جان جىلۋىمەن ءوز حالقىنا قايتالانباس سەزىمدەردى سىيلاي بىلگەن ۇلى تۇلعا دەگەن ويدا بولامىن. ول ءوز ەلىنىڭ پاتريوتى بولدى. ونىڭ ءاربىر ءفيلمى مەيىرىم پەن ماحابباتقا تولى, – دەدى, رەجيسسەردىڭ كەلىنى يرينا ايمانوۆا.
اتالعان ءىس-شاراعا م.لەرمونتوۆ اتىنداعى مەملەكەتتىك اكادەميالىق ورىس دراما تەاترىنىڭ ديرەكتورى يۋري ياكۋشەۆ قاتىسىپ, كينوستۋديا باسشىلىعىنا ءىلتيپات بىلدىرگەنى ءۇشىن العىس ايتىپ, كەلەسى جىلى يۋري ءبوريسوۆيچتىڭ ءجۇز جىلدىق مەرەيتويى تويلاناتىنىن اتاپ ءوتتى.
ءىس-شارادان كەيىن قازاق كينوسىنىڭ مۋزەيىندە قوناقتارعا ارنالعان شاعىن ەكسكۋرسيا وتكىزىلدى. ەكسكۋرسيا بارىسىندا «قازاقفيلمنىڭ» پرەزيدەنتى اقان ساتاەۆ جينالعاندارعا جاڭعىرتۋ باعدارلاماسى بويىنشا كينوستۋدياعا ساتىپ الىنعان جاڭا كينوتەحنيكانى تانىستىردى.
الماتى
