بيىكتىگى 2 مەترگە جەتەتىن تارماقتالعان جاپىراقتى بۇتا. جاپىراقتارى كەزەكتەسىپ ورنالاسقان, قاراپايىم, سىزىقتى-لانتسەتتى نەمەسە كەڭ ەلليپس ءتارىزدى, قويۋ جاسىل ءتۇستى. گۇلدەرى ۇلكەن اشىق قىزعىلت ءتۇستى, حوش ءيىستى, جاپىراقتاردىڭ اشىلۋى مەن گۇلدەۋى ءبىر مەزگىلدە. جەمىسى قۇرعاق, سۇيەكتى, سىرتى كيىزدەلگەن تۇكتى بولادى. لەدەبۋر بادامى قازاقستان رەسپۋبليكاسىنىڭ «قىزىل كىتابىنىڭ» تىزىمىنە ەنگەن وسىمدىك.
لەدەبۋر بادامى «تارباعاتاي» مەملەكەتتىك ۇلتتىق تابيعي پارك اۋماعىندا دالالى جانە بۇتالى بەلدەۋلەردە كەڭ تارالىپ, توعايلار قاۋىمداستىعىن قۇرايدى. بۇل توعايلار ءارتۇرلى: توبىلعى-بادامدى, قاراعان-بادامدى, مايقاراعان-بادامدى, بادامدى فورماتسيالارمەن ورنالاسقان.
حيميالىق قۇرامى بويىنشا جەمىستەرى 65,97% قابىقتان جانە 34,04% وزەكتەن تۇرادى. قۇرامىندا بەنزالدەگيدكە, تسيان قىشقىلىنا جانە گليۋكوزاعا ىدىرايتىن اميگدالين گليۋكوزيدى بار. تۇقىمنىڭ قۇرامىندا مەديتسينادا جانە تاعام رەتىندە قولدانىلاتىن حوش ءيىستى بادام مايى بار. بادامىنىڭ ەرتە كوكتەمگى گۇلدەۋى وزدەرىنە بالشىرىن جينايتىن ارالاردى تارتادى.
وسى اسەم تابيعاتتىڭ تۋىندىسىن بولاشاق ۇرپاققا ساقتاپ قالۋ –بارلىعىمىزدىڭ مىندەتىمىز!
بايان ساداقوۆا,
«تارباعاتاي» مۇتپ رمم-ءنىڭ اعا عىلىمي قىزمەتكەرى
شىعىس قازاقستان وبلىسى,
ءۇرجار اۋدانى
