ۆەدومستۆو 2020 جىلدىڭ مامىر ايىندا وزبەكستانعا فرانتسيادان 10 ميلليون اقش دوللارى مولشەرىندەگى اكتيۆتەر قايتارىلعانىن اتاپ ءوتتى.
«2022 جىلعى 11 اقپاندا شۆەيتساريا مەن وزبەكستان بىرقاتار كەلىسسوزدەر وتكىزدى, ونىڭ بارىسىندا ەكى دەلەگاتسيا بىرىككەن ۇلتتار ۇيىمىنىڭ جاڭا كوپجاقتى سەنىم قورىن قۇرۋعا كەلىستى. قور گۇلنار كارىموۆاعا قاتىستى قىلمىستىق ءىس جۇرگىزۋ شەڭبەرىندە تۇپكىلىكتى تاركىلەنگەن اكتيۆتەردى قايتارۋ ءۇشىن پايدالانىلاتىن بولادى», دەپ ءتۇسىندىردى وزبەكستان ادىلەت مينيسترلىگى.
مينيسترلىكتىڭ مالىمەتىنشە, قور شۆەيتساريادا ءالى دە جالعاسىپ جاتقان قىلمىستىق ءىس جۇرگىزۋ اياسىندا بولاشاقتا تۇپكىلىكتى تاركىلەنۋى مۇمكىن كەز كەلگەن قوسىمشا اكتيۆتەردى قالپىنا كەلتىرۋ تەتىگى رەتىندە قىزمەت ەتەدى.
قازىرگى ۋاقىتتا وزبەكستانعا شامامەن 131 ميلليون اقش دوللارى قايتارىلۋعا دايىن.
«قوردى باسقارۋ تەتىگى شۆەيتساريا, وزبەكستان جانە بىرىككەن ۇلتتار ۇيىمىنىڭ وكىلدەرىنەن تۇراتىن بولادى. وسىلايشا, شۆەيتساريا مەن وزبەكستان بۇكىل رەستيتۋتسيا پروتسەسىنە قاتىساتىن بولادى. قور وزبەكستاندا ورنىقتى دامۋ ماقساتىنا قول جەتكىزۋگە ىقپال ەتەتىن بولادى. ول بۇۇ-نىڭ وزبەكستان ءۇشىن ورنىقتى دامۋ سالاسىنداعى ىنتىماقتاستىق جونىندەگى نەگىزدەمەلىك باعدارلاماسىنا (UNSDCF) سايكەس جوبالارعا رەسۋرستار بولەتىن بولادى», دەپ قوستى ۆەدومستۆو.
بارلىق جوبالار بۇۇ جۇيەسىنىڭ ەرەجەلەرى نەگىزىندە قوردىڭ مونيتورينگى مەن باعالاۋ جۇيەسىنە سايكەس باقىلاناتىن بولادى, ال ازاماتتىق قوعام ۇيىمدارى كونسۋلتاتسيالىق ءرول اتقارادى دەپ جوسپارلاندى.
قور ءوز قىزمەتىن شۆەيتساريا مەن وزبەكستان اراسىنداعى رەستيتۋتسيا تۋرالى زاڭدى تۇردە مىندەتتەيتىن كەلىسىمگە قول قويىلعاننان كەيىن باستايدى.
سونىمەن قاتار ماسكەۋ قالاسىنىڭ سوتى گۇلنار كارىموۆا مەن ونىڭ سىبايلاستارىنا قاتىستى وزبەك سوتتارىنىڭ ۇكىمدەرىن مويىندادى جانە قازىرگى ۋاقىتتا وزبەكستانعا تۇسكەن قاراجاتتى ودان ءارى قايتارۋ ءۇشىن تاركىلەنگەن م ۇلىكتى ساتۋ بويىنشا رەسەي تاراپىمەن جۇمىستى ۇيىمداستىرۋ بويىنشا ءىس-شارالار جۇرگىزىلۋدە.
حابارلانعانداي, قايتارىلعان قاراجات حالىقتىڭ ءال-اۋقاتىن جاقسارتۋ ءۇشىن الەۋمەتتىك سالادا پايدالانىلاتىن بولادى.
گۇلنار كارىموۆا - وزبەكستاننىڭ بۇرىنعى پرەزيدەنتى يسلام كارىموۆتىڭ قىزى. ول 2015 جىلدىڭ تامىزىندا بوپسالاۋ جانە سالىق تولەۋدەن جالتارعانى ءۇشىن سوتتالدى, ال 2017 جىلدىڭ 18 جەلتوقسانىندا تاعى ءبىر ءىس اياسىندا وعان ون جىل مەرزىمگە باس بوستاندىعىنان ايىرۋ جازاسى تاعايىندالدى. 2020 جىلدىڭ 18 ناۋرىزىندا سوت جاڭا قىلمىستىق ءىس اياسىندا ونىڭ تۇرمە جازاسىن 13 جىل ءتورت ايعا دەيىن ۇزارتتى.
