بۇل ءتۋرالى بىلىم جانە عىلىم مينيسترلىگى ءمالىم ەتتى.
ارنايى تەحنولوگيانىڭ ارقاسىندا وپەراتسيادان كەيىن 3-6 اي ىشىندە سۇيەك جانە شەمىرشەك تىندەرى قالپىنا كەلەدى. كلينيكاعا دەيىنگى سىناقتاردىڭ ناتيجەلەرى پرەپاراتتىڭ تيىمدىلىگى جوعارى ەكەنىن راستادى.
«سۇيەك اقاۋلارىن تولىقتاي قالپىنا كەلتىرۋ تراۆماتولوگيا مەن ورتوپەدياداعى كۇردەلى جانە شەشىلمەگەن ماسەلەلەردىڭ ءبىرى بولىپ قالا بەرەدى. ەمدەۋ ءۇشىن سۇيەك الماستىرعىشتارىن قولدانا وتىرىپ, وستەوپلاستيكانىڭ ءارتۇرلى ادىستەرى ءجيى قولدانىلادى. بىراق بۇل وپەراتسيانىڭ ناتيجەسىندە سۇيەك ءاردايىم تولىق قالپىنا كەلمەيدى. ءبىز سۇيەك اقاۋلارىنىڭ تولىق قالپىنا كەلۋىنە ىقپال ەتەتىن تەحنولوگيانى جاسادىق. باعانالى جاسۋشالار مەن تابيعي بيوپوليمەرلەر زاقىمدالعان سۇيەك نەمەسە شەمىرشەك تىندەرىن قالپىنا كەلتىرۋ پروتسەسىن جەدەلدەتەدى», دەدى ازىرلەمە اۆتورى, ۇلتتىق بيوتەحنولوگيا ورتالىعىنىڭ باعانالى جاسۋشالار زەرتحاناسىنىڭ مەڭگەرۋشىسى, پروفەسسور ۆياچەسلاۆ وگاي.
عالىمنىڭ ايتۋىنشا, گيدروگەلدەر سۇيەك ءتىنىن جاساۋدا قاڭقا رەتىندە قولدانىلادى. قۇرىلىمىندا ولار دانەكەر ءتىنىنىڭ نەگىزىنە ۇقساس, سوندىقتان بارلىق بيوماتەريالدار اراسىندا جاسۋشا ترانسپلانتاتسياسى ءۇشىن ەڭ قولايلى.
قازىر العاشقى وپەراتسيالاردى باعانالى جاسۋشالار نەگىزىندە گيدروگەل ارقىلى جۇرگىزۋ جوسپارلانىپ وتىر. كۇردەلى سىنىقتار مەن زاقىمدالعان بۋىنداردى قالپىنا كەلتىرۋدىڭ بىرەگەي تەحنولوگياسى تراۆماتولوگيا مەن ورتوپەديادا كورسەتىلەتىن مەديتسينالىق قىزمەتتەردىڭ دەڭگەيىن ايتارلىقتاي ارتتىرادى دەپ كۇتىلۋدە. پرەپارات مامانداندىرىلعان اۋرۋحانالار مەن عىلىمي مەديتسينالىق ورتالىقتاردا قولدانىلادى.
بۇل تەحنولوگيا قازىرگى ۋاقىتتا ن.باتپەنوۆ اتىنداعى ۇلتتىق تراۆماتولوگيا جانە ورتوپەديا عزي بازاسىندا كلينيكالىق سىناقتان ءوتىپ جاتىر. عىلىمي باعدارلامانى عىلىمدى باعدارلامالىق-نىسانالى قارجىلاندىرۋ اياسىندا ءبىلىم جانە عىلىم مينيسترلىگى قارجىلاندىرادى.
