جوبادا اعىلشىن ءتىلىن ۇيرەنگىسى كەلەتىن اتا-اجەلەرگە وسى ءتىلدى ەركىن مەڭگەرگەن جاستار قاراپايىم قولدانىستاعى اعىلشىن ءتىلىن وڭاي ءادىس-تاسىلدەرمەن ۇيرەتەدى.
«CES for You» وقۋ ورتالىعىنىڭ قۇرىلتايشىسى ايگۇل قاناتقىزىنىڭ پىكىرىنشە, جوبا الدىڭعى تولقىن مەن كەيىنگى تولقىننىڭ اراسىنداعى بايلانىستى نىعايتۋعا باعىتتالعان.
«بۇل جوباعا ءبىزدىڭ اتا-اجەلەرىمىز, اعا-اپالارىمىز تەگىن قاتىسا الادى. ونداعى ماقسات جاس بۋىن مەن ۇلكەندەر اراسىندا ءوزارا تۇسىنىستىك ورناتۋ. بۇل قىزمەتىمىز ءۇشىن اقى المايمىز. تەك ۇلكەندەردىڭ العىسى مەن باتاسىن الىپ جاتساق جەتكىلىكتى. وسىلايشا عىلىم مەن ءبىلىمنىڭ, تەحنولوگيانىڭ جەتەكشى قۇرالىنا اينالعان اعىلشىن ءتىلىنىڭ كەڭ قانات جايۋىنا بىرىگىپ اتسالىسقىمىز كەلەدى», دەيدى ا.قاناتقىزى.
جوباعا الماتى وبلىسىنىڭ قۇرمەتتى اقساقالى ىباتاەۆ سەيتقالي باستاعان ازاماتتار العاشقى قاتىسۋشى رەتىندە تىركەلىپ, ءتىل ۇيرەنۋ ساباقتارىن باستاپ كەتتى.
«ۇرپاقتار ساباقتاستىعى» جوباسى «CES for You» وقۋ ورتالىعىنىڭ الماتى وبلىسىنداعى بارلىق فيليالدارىندا جۇرگىزىلەدى.
