ءبىلىم • 11 اقپان، 2022

ۋنيۆەرسيتەتتەگى نارازىلىق نەدەن تۋىندادى؟

66 رەت كورسەتىلدى

جۋىردا الماتىداعى قىزدار مەملەكەتتىك پەداگوگيكالىق ۋنيۆەرسيتەتىنىڭ سىرتتاي وقىتۋ بولىمىندە وقىپ جاتقان ستۋدەنتتەر نارازىلىق اكتسياسىن وتكىزگەن ەدى. بۇعان وقۋدىڭ اياق استىنان ءداستۇرلى فورماتقا اۋىسۋى مەن وقۋ اقىسىنىڭ قىمباتتاۋى سەبەپ بولدى.

الدىمەن ستۋدەنتتەردىڭ داتىنا توقتا­لا كەتكەن ءجون.

«ستۋدەنتتەردىڭ كوبىسى – كوپ­بالالى انا، جالعىز باس­تى انا­لار. باسقا وب­لىس­تاردان قاتى­ناۋ­عا تۋرا كەلەتىن ستۋدەنت­تە­رى­مىز بار. ولاردىڭ بارلىعى وسى قاراجاتتى ارەڭ كوتەرىپ ءجۇر. نەگىزى شارت بويىنشا جىل­دىق وقۋ اقشاسى 336 مىڭ تەڭگە بولعان. بىراق وسى جينالىستا بىزگە كۇندىزگى وقۋ فورماتىنا كوشىڭدەر دەدى، وندا بۇعان 555 مىڭ تەڭگە كولەمىندە اقشا قوسىلادى»، دەيدى ستۋدەنت مەرەي مەركىباي.

قىسقاسى، قاشىقتان ديپلوم العىسى كەلەتىن ستۋدەنتتەردىڭ العا تارتقان تاعى ءبىر ماسەلەسى –  كۇندىزگى وقۋ فورماتىنا كوشۋ­مەن بىرگە وقۋ اقىسىن بۇ­رىن­عى­دان ەداۋىر كوپ تولەۋى.

«قاشىقتان وقۋدى باستادىق پا، قا­شىقتان اياقتايىق، سول ءۇشىن وقۋعا ءتۇسىپ وتىرمىز. ەندى اياقاستى بىزگە اقپان ايىنىڭ 20-نان ناۋرىزدىڭ 20-نا دەيىن كەلىپ وقىڭدار دەپ جاتىر. كوپ قىزدار كەلە المايدى. سول ءۇشىن ءبىز ونلاين فورماتتا وقيىق، ءارى قاراي وسىلاي اياقتايىق دەپ سۇراپ كەلىپ وتىرمىز»، دەيدى ستۋدەنت روزا تۇرعىمبەكوۆا.

بىراق ونلاين وتىرىپ، ۇستاز­دىق ديپلوم العىسى كەلەتىن ستۋدەنت­تەرگە ۋنيۆەرسيتەت باس­شى­­لىعىنىڭ ايتاتىن ءۋاجى باسقا. جوعارى وقۋ ورنىنىڭ رەسمي وكىلى جاندار اسان تومەن­دە­گىدەي تۇسىنىكتەمە بەردى.

«بۇگىندە ۋنيۆەرسيتەتتە قا­شىقتان ءبىلىم بەرۋ تەحنولوگياسىن قولدانا وتىرىپ ءبىلىم الاتىن ستۋدەنتتەردىڭ سانى شامامەن 1 700 ادامدى قۇرايدى. ءبىلىم الۋشىلار وقۋ باعدارلاماسىنىڭ ءداستۇرلى، ياعني وففلاين فورماتتا وتۋىنە قارسىلىقتارىن بىل­دىرۋدە. وسى ورايدا ەرەكشە استىن سىزىپ وتەتىن نارسە: قازاقستان رەسپۋبليكاسىنىڭ 2007 جىلعى 27 شىلدەدەگى ء«بىلىم تۋرالى» زاڭىنىڭ 5-بابىنىڭ 25-تارماقشاسىنا جانە قازاقستان رەسپۋبليكاسى ءبىلىم جانە عىلىم ءمينيسترىنىڭ 2015 جىلعى 20 ناۋرىزداعى №137 بۇيرىعىنا (2021 جىلعى 25 اقپانداعى №34 وزگەرىستەر مەن تولىقتىرۋلارمەن) سايكەس قاشىقتان ءبىلىم بەرۋ تەحنولوگيالارى بويىنشا وقۋ پروتسەسىن ۇيىمداستىرۋ قاعيدالارى بە­كى­تىلدى. جوعارىدا اتالعان ەرە­جە­نىڭ 25-تارماعىنا سايكەس پەدا­گوگيكالىق عىلىمدار، قۇ­قىق، حورەوگرافيا، اسپاپتىق ورىنداۋ، اۆياتسيالىق تەحنيكا جانە تەحنولوگيالار، قۇرىلىس، تەڭىز تەحنيكاسى جانە تەحنولوگيالار، دەنساۋلىق ساقتاۋ، اسكەري ءىس، ۆەتەريناريا سالاسىندا كادرلار دايارلاۋ ءۇشىن جوعارى كاسىپتىك وقىتۋ ۇيىمدارىندا قاشىقتان ءبىلىم بەرۋ تەحنولوگياسىن پايدالانا وتىرىپ، پاندەردى وقىتۋدا اكادەميالىق كرەديتتەردىڭ جالپى كولەمىنىڭ 20%-ى عانا كوزدەلگەن. ناقتىراق ايتقاندا، وقۋ بارىسىنىڭ قالعان 80%-ى ءداستۇرلى (وففلاين) فورماتتا وتكىزىلەدى. بۇل تالاپتار اتالعان بولىمدە وقيتىن ستۋدەنتتەرمەن 2021 جىلعى 20 تامىزدا ۋنيۆەر­سيتەتپەن جاساسقان كەلى­سىم شارتتا ەگجەي-تەگجەيلى كور­سەتىلگەن»، دەدى ول.

ونىڭ اقپاراتىنا سۇيەنەر بولساق، اتالعان ءبىلىم الۋ تەحنو­لوگياسى ارقىلى وقيتىن ستۋ­دەنت­تەر ۋنيۆەرسيتەتتە وقۋ­دىڭ ءداستۇرلى فورماتتا باستالۋى 2022 جىلدىڭ 21 اقپانى مەن 20 ناۋرىزى ارالىعىندا، ال جازعى ەمتيحان سەسسيالارى 30 مامىر مەن 26 ماۋسىم ارالىعىندا وتكىزىلمەك. بۇل تۋرالى ءبىلىم الۋشىلارعا الدىن الا ەسكەرتىلگەن ەكەن.

«كۇندىزگى بولىمگە قا­شىق­تان ءبىلىم بەرۋ تەحنولوگيا­سى ارقىلى تۇسكەن ءبىلىم الۋشى­لاردىڭ جوعارىدا اتالعان وزگە­رىس­تەرگە بايلانىستى تۇسىنىس­پەۋ­شىلىك پەن ءوز تاراپتارىنان كەلىسپەۋشىلىكتىڭ تۋىنداۋىنا بايلانىستى دۇيسەنبى كۇنى ۋنيۆەرسيتەتتە ستۋدەنت­تەر­مەن ارنايى كەز­دەسۋ ۇيىم­داس­تىرىلدى. كەزدەسۋ با­رى­سىندا ۋنيۆەرسيتەتتىڭ باس­قار­ما تور­اعاسى – رەكتورى گۇلميرا قاناي ءبىلىم الۋشى­لار تاراپىنان تۋىنداعان سۇ­راق­­تارعا جان-جاقتى جاۋاپ بەرىپ، ۇسىنىس­تاردىڭ بار­لىعىن نازارعا الاتىنىن جەتكىزدى. ەڭ باستىسى، ستۋدەنتتەرگە دە، ۋني­­ۆەرسي­تەتكە دە ەكىجاقتى ءوزارا ءتيىمدى شەشىم­دەردىڭ تەتىك­تەرى قاراستىرىلدى. ۋني­ۆەر­سي­تەتىمىزدىڭ باستى ماقساتى – ءبىلىم الۋشىلار الدىنداعى مىندەتىمىزدى ساپالى ورىنداۋ. ستۋدەنتتەردىڭ كوپ بولىگى جۇ­مىس ىستەپ جۇرگەن ماماندار بولعاندىقتان، ۋنيۆەرسيتەت ءوز تاراپىنان مۇمكىندىگىنشە ىڭ­عاي­لى كۇنتىزبە قويىپ، تولە­ما­قىداعى كۇتىلەتىن وزگە­رىس­تەر­دى دە تومەنگى شەكتە ۇستاۋعا ارەكەت جاسايدى»، دەدى ج.اسان.

 

الماتى

 

سوڭعى جاڭالىقتار

اقجايناق استانا

ەلوردا • كەشە

ديماش پەن دجەكسون

ونەر • كەشە

ۇقساس جاڭالىقتار