جۇلدە الماۋىمىزعا قارسىلاستار كىنالى
قازاقستاندىق سپورتشىلاردان وليمپيا ويىندارىنىڭ بەسىنشى جارىس كۇنىن كونكيمەن جۇگىرۋ سپورتشىلارى تۇيىندەدى. 1 500 مەترگە ەرلەر اراسىنداعى جارىستا قازاقستان اتىنان دميتري موروزوۆ سىنعا ءتۇستى. وسى سپورت تۇرىنەن ەلىمىزدىڭ ەڭ ۇزدىك سپورتشىسى سانالعان موروزوۆ بۇل جارىستا وليمپيادا چەمپيونى نيدەرلاند وكىلى كەلد نيويستەن 3.80 سەكۋندقا ۇتىلىپ, وليمپيادانى 18-ورىنمەن اياقتادى. بۇل – جەرلەسىمىزدىڭ ءوز كارەراسىنداعى ۇزدىك ناتيجەسى ەكەنىن ايتا كەتكەن ءجون. ول بۇعان دەيىنگى حالىقارالىق باسەكەلەردە ۇزدىك 20 سپورتشىنىڭ قاتارىنان كورىنبەگەن.
جارىستان كەيىن جۋرناليستەرمەن تىلدەسكەن موروزوۆ ناتيجەسىنە كوڭىلى تولاتىنىن جەتكىزدى. «ارينە, ۇزدىكتەر قاتارىنان كورىنە الماعانىم وكىنىشتى. الايدا ءوز ناتيجەمە كوڭىلىم تولادى. دەسە دە تاكتيكالىق جانە فيزيكالىق تۇرعىدا ءالى جەتىلدىرەتىن تۇستارىم كوپ. الدا ماسس-ستارت باسەكەسى بار. ەكى قاشىقتىقتا جۇلدەگە تالاسىپ كورەمىن. ماسس-ستارتتى كونكيمەن جۇگىرۋدەگى لوتەرەيا دەپ ايتۋعا بولادى. بۇل جارىستا كىمنىڭ باعى جانادى, سول چەمپيون بولادى. قىتايداعى مۇز ەلورداداعى «الاۋ» مۇز ايدىنىنا قاتتى ۇقسايدى ەكەن. زايىبىم نادەجدانىڭ (موروزوۆا) جارىسقا تۇسكەن ءساتىن تەك تەلەديدار ارقىلى عانا تاماشالاپ ءجۇرمىن. بىراق ەكەۋمىز كۇندە بىرگە جاتتىعامىز», دەدى ول.
سونىمەن قاتار كونكيمەن جۇگىرۋدەن قازاقستان كومانداسىنىڭ باس باپكەرى دميتري بابەنكو موروزوۆتىڭ كورسەتكىشىنە ءوز باعاسىن بەرىپ, شاكىرتى قارسىلاسىنىڭ كەسىرىنەن ۇزدىكتەر قاتارىنا ىلىگە الماي قالعانىن ايتتى.
– كورسەتكىش مەن كۇتكەندەي بولعان جوق. الايدا ول ءوزىنىڭ سپورتتىق كارەراسىنداعى ەڭ ۇزدىك ناتيجەسىن تىركەدى. موروزوۆقا قارسىلاس ءساتسىز ءتۇستى. ول (قىتايلىق قارسىلاسى ليان تسزىۆەن) كوبىنە سپرينتكە بەيىم ەكەن. العاشقى مەترلەردە ەكپىن الىپ, قالعان بولىكتەرگە كۇشىن دۇرىس جۇمساۋ ماڭىزدى ەدى. سوندىقتان دميتري جولاققا شىققاندا كەدەرگى كەلتىرمەس ءۇشىن العاشقى 300 مەتردە بارىن سالدى. ءارى قاراي بەيىمدەلۋ قيىن بولدى. سول سەبەپتى سوڭعى اينالىم وعان وتە اۋىر سوقتى. ەگەر قارسىلاسى ىڭعايلى بولعاندا, ءدميتريدىڭ ناتيجەسى بۇدان دا جاقسى بولار ما ەدى؟! بۇل – ونىڭ العاشقى وليمپياداسى بولعاندىقتان, شاكىرتىمنىڭ ناتيجەسىنە كوڭىلىم تولادى, – دەدى باس باپكەر.
وسى قاشىقتىقتى 32 جاستاعى كەلد نيويس 1:43.21 ۋاقىت كورسەتكىشىمەن ءجۇرىپ ءوتىپ, 2002 جىلعى سولت-لەيك-سيتي وليمپياداسىنان بەرى جاڭارماي كەلە جاتقان وليمپيادا رەكوردىنىڭ مۇرتىن بۇزدى. بۇعان دەيىنگى رەكورد اقش سپورتشىسى دەرەك پارراعا تيەسى بولعان ەدى. ول بۇل قاشىقتىقتى 1:43.95 ۋاقىتتا باعىندىرعان. بۇل – نيدەرلاند سپورتشىسىنىڭ وليمپيا ويىندارىنداعى ءۇشىنشى التىن مەدالى. 2018 جىلعى پحەنچحانداعى دودادا نيويس 1000 جانە
1 500 مەترگە جارىسۋدا الدىنا جان سالماي, تۇعىردىڭ بيىك ساتىسىنان كورىنگەن-ءدى.
سونىمەن قاتار ءدال وسى 1 500 مەترگە جارىسۋداعى الەم رەكوردى كەلد نيويسكە تيەسىلى. ول بۇل رەكوردىن 2019 جىلدىڭ ناۋرىزىندا سولت-لەيك-سيتيدە وتكەن الەم بىرىنشىلىگىندە جاساعان ەدى. ۋاقىت كورسەتكىشى – 1:40.17. ەندى وليمپيا ويىندارىنىڭ دا, الەم چەمپيوناتىنىڭ دا رەكوردى كەلد نيويسكە تيەسىلى بولىپ وتىر. اتالعان قاشىقتىقتا كۇمىس جۇلدەنى ءنيويستىڭ وتانداسى, ءۇش دۇركىن الەم چەمپيونى توماس كرول يەلەندى. ءسويتىپ ول وليمپياداداعى العاشقى جۇلدەسىنە قول جەتكىزدى. ال قولا جۇلدە پحەنچحان وليمپياداسىنىڭ كۇمىس جانە قولا جۇلدەگەرى وڭتۇستىك كورەيا وكىلى كيم مين سوكتىڭ ەنشىسىندە.
مارەگە جەتۋدىڭ ءوزى دە ارمانعا اينالدى
سونىمەن قاتار تاۋ شاڭعىسى سپورتىنىڭ سلالوم تۇرىندە قازاقستان قۇراماسىنان الەكساندرا ترويتسكايا ونەر كورسەتتى. وليمپيا ويىندارىنا تۇڭعىش رەت قاتىسىپ جاتقان 18 جاستاعى جەرلەسىمىز, وكىنىشكە قاراي, جارىستى سوڭىنا دەيىن اياقتاي المادى. مارە سىزىعىنا دەيىن جەتىپ كەلە الماعانداردىڭ قاتارىندا ترويتسكايادان بولەك, وسى جارىستىڭ باستى ءفاۆوريتى, سوچي جانە پحەنچحان وليمپياداسىنىڭ جەڭىمپازى, بىرنەشە دۇركىن الەم چەمپيونى امەريكالىق ميكاەلا شيففرين دە بار. ءسويتىپ ول دا العاشقى مۇمكىندىكتە جۇلدەسىز قالدى.
بۇل باسەكەدە التىن مەدال 2019 جىلعى الەم چەمپيونى سلوۆاكيالىق پەترا ۆلگوۆاعا بۇيىردى. ال اۋستراليالىق كاتارينا لينسبەرگەر وليمپيا ويىندارىنىڭ ەكى دۇركىن كۇمىس جۇلدەگەرى اتاندى. ول ءتورت جىل بۇرىنعى وڭتۇستىك كورەياداعى دودانىڭ كوماندالىق جارىسىندا كۇمىس مەدالدى موينىنا ىلگەن ەدى. سونداي-اق پحەنچحاندا وليمپيادانىڭ ءۇش جۇلدەسىن (التىن, كۇمىس, قولا) قورجىنعا سالعان شۆەيتساريالىق ۆەندي حولدەنەر بەيجىڭدە العاشقى قولاسىن جەڭىپ الدى.
جارىستان كەيىن الەكساندرا ترويتسكايا ءوزىنىڭ العاشقى وليمپياداسى جانە كەشەگى ونەرى تۋرالى پىكىر ءبىلدىردى. «باس باپكەرسىز جاتتىعۋ ماعان وتە قيىنعا سوقتى. سوندىقتان ءوز قاتەلىگىمدى سىرتتاي كورە الماعاندىقتان, جارىس تۋرالى ەشتەڭە ايتا المايمىن. مۇنداعى جارىس جولى راسىندا قيىن, ماعان ىڭعايسىزدىق تۋدىردى. ءبىرىنشى مۇمكىندىگىمدى بارىنشا ناتيجەلى اياقتاعىم كەلگەن ەدى. الايدا ءبارى مەن ويلاعانداي بولمادى. قازاقستاندا بەيجىڭدەگىدەي قاتتى قار مەن مۇز جوق. ونىڭ ۇستىنە, تاجىريبەسىز, جاتتىعۋسىز باسەكەلەسۋ قيىنعا سوقتى. دەسە دە, بۇل مەن ءۇشىن ۇلكەن تاجىريبە بولدى دەپ ايتا الامىن», دەدى الەكساندرا.
ەرلەر اراسىنداعى شاڭعى جارىسىنىڭ ەركىن ستيلىندە ءۇش دۇركىن وليمپيادا, التى دۇركىن الەم چەمپيونى نورۆەگيالىق يوحاننەس حيوسفلوت كلەبو الدىنا جان سالمادى. يتاليالىق فەدەريكو پەللەگرينو قاتارىنان ەكىنشى مارتە وليمپيا ويىندارىنىڭ كۇمىس جۇلدەگەرى اتاندى. ول پحەنچحاندا دا وسى قاشىقتىقتا كۇمىس جۇلدەنى موينىنا ىلگەن ەدى. رەسەيلىك الەكساندر تەرەنتەۆ قولا مەدالدى قاناعات تۇتتى.
ايەلدەر باسەكەسىندە شۆەتسيالىق قىزدار جاسىنداي جارقىلدادى. الەمنىڭ ەكى دۇركىن چەمپيونى يوننا سۋندلينگ باس جۇلدەنى ولجالاسا, تاعى ءبىر الەم چەمپيونى مايا دالكۆيست ەكىنشى ورىنعا تابان تىرەدى. ءۇشىنشى ساتىعا پحەنچحاندا كوماندالىق سايىستا توپ جارعان امەريكالىق دجەسسيكا ديگگينس جايعاستى.
سنوۋبوردتا ءتورت جىل بۇرىنعى وليمپيادا چەمپيونى چەحيالىق ەستەر لەدەتسكايا جەڭىسكە جەتسە, اۋستريالىق دانيەلا ۋلبينگ پەن سلوۆەنيالىق گلوريا كوتنيك جۇلدەگەرلەر قاتارىنان كورىندى. ەرلەر جارىسىندا سوچي وليمپياداسىنىڭ قولا جۇلدەگەرى اۋستريالىق كارل بەندجامين التىن تۇعىردان كورىندى. سلوۆەنيالىق تيم ماستناك پەن رەسەيلىك ۆيك ۋايلد وليمپيادانىڭ كۇمىس جانە قولا مەدالداردى ءوزارا ءبولىستى.
فريستايل بيگ-ەيردەن وتكەن جارىستا قىتاي قىزى گۋ ايلين التىننان القا تاقتى. فرانتسيالىق الەم چەمپيونى تەسس لەديو كۇمىس السا, شۆەيتساريالىق ماتيلدا گرەمو قولا مەدالدى موينىنا ءىلدى.
كوش باسىندا – نورۆەگيا
وليمپيادانىڭ العاشقى التى كۇنىندە 23 ەلدىڭ سپورتشىلارى جۇلدە الىپ ۇلگەردى. كوش باسىندا نورۆەگيا سپورتشىلارى تۇر. بۇگىنگە دەيىن ولار 4 التىن, 1 كۇمىس جانە 4 قولا مەدال يەلەندى. ەكىنشى جانە ءۇشىنشى ورىنداردى شۆەتسيا (4+1+2) مەن نيدەرلاند (3+3+1) ءوزارا بولىسۋدە. العاشقى التىنىنا كەشە عانا قول جەتكىزگەن اقش سپورتشىلارى 1 التىن, 5 كۇمىس جانە 1 قولا مەدالمەن 10-ورىندا تۇر. ازىرگە ەڭ كوپ جۇلدە (10) ولجالاعان رەسەي قۇراماسى 2 التىن, 3 كۇمىس, 5 قولامەن 8-ساتىعا جايعاسقان.
