وتكەن ءبىر سەنبىدە گرۋزين اسحاناسىن ساعىنىپ, «دارەدجانيگە» جولىمىز ءتۇستى. كەشقۇرىم مەيرامحانا ءىشى ادەتتەگىدەي قاراكولەڭكە, مايشامنىڭ جارىعىمەن ۇندەسكەن گرۋزين مۋزىكاسى الىستان تالىقسىپ ەستىلەدى.
داياشى ءمازىردى اكەلىپ, قالاۋىمىزدى سۇرادى. ارينە, ورىس تىلىندە. بۇعان دەيىن ىشتەگى پاتريوتتىق ءھام قازاقى كوزقاراستى جيىپ قويىپ, ورىسشا سويلەسە بەرەتىنبىز. ءسىرا, كوڭىل كۇي جاقسى بولسا كەرەك. الايدا بۇل جولى ولاي بولمادى: جالپى ادامزاتقا دەگەن مەيىرىم مەن تۇسىنىستىك ءدال سول ساتتە باس كوتەرمەدى. جۇيكە ءسال سىر بەرىپ تۇرعان سوڭ با, داياشىعا قازاق ءتىلىن بىلەتىن بىرەۋدى جىبەرۋىن تالاپ ەتتىك. شىتىلعان قاباققا ول دا قۋانا قويمادى: بىزگە رەنجىگەنى انىق. ارادا ءبىرشاما ۋاقىت ءوتتى: قازاقشا بىلەتىن داياشى تابىلماي جاتسا كەرەك. سوعان وراي بىزگە «اسا قۇرمەتتى قوناق» رەتىندە مەيرامحانانىڭ اكىمشىسى قىزمەت كورسەتتى. باعىمىز با؟..
اكىمشىگە تاپسىرىسىمىزدى ايتىپ وتىرىپ, ادەتىمىزشە, اراسىندا ءبىردى-ەكىلى ورىسشا سوزدەردى دە قوسىپ قويامىز. ءبىز دە ومىردە تازا قازاقشا سويلەيتىن دەڭگەيگە جەتپەگەنىمىز راس. مويىندايمىز. دەگەنمەن قوعامدىق ورىندا مەملەكەتتىك ءتىلدى تالاپ ەتىپ ءھام ونىمىز ورىندالعانىنا ىشتەي ءمازبىز (نەگىزى, بۇل – كومپلەكس). كەلگەن كەزدەگى شەكەنىڭ تىرىسۋى دا قايتقان سياقتى.
ەكىجاقتى تاراپ ورتاق كەلىسىم تاۋىپ, ءمازىردىڭ سوڭىنا كەلگەندە اكىمشى تاعى تاڭعالدىردى. سۋسىندار تىزىمىندەگى «سمورودينا» دەگەن ءسوزدى «قاراقاتتان» دەپ ءتۇسىندىرىپ جاتىر. قاراقاتتى ەستىپ تۇرىپ, كۇلكىمىزدى ارەڭ تىيدىق. ءوزىمىز كەي تۇرمىستىق سوزدەردى ورىسشا ايتىپ وتىرعاندا, الگى كىسىنىڭ «سمورودينانى» اۋدارىپ تۇرعانىنا قالاي كۇلمەيسىڭ؟.. شارتتىلىق.
اقيقاتىندا, ول اكىمشى قاراقاتتى بىلگەنىمەن, سويلەمنىڭ باس-اياعىن قۇراپ ايتا المايدى. ءبىزدىڭ مەملەكەتتىك ءتىلدى كوڭىل كۇيدىڭ رايىنا سالىپ تالاپ ەتكەنىمىز دە, بالكي, دۇرىس ەمەس. ەگەر سولاي بولسا, سىزدەن دە, الگى داياشى مەن اكىمشىدەن دە كەشىرىم سۇرايمىز. ال ارقايسىمىز ارقاشان قازاق ءتىلىن تالاپ ەتەيىك دەسەك, ول وندا مورال بولادى. «تەرەزەنىڭ» شارتى بويىنشا, وقىرمانعا اقىل ايتپاۋىمىز كەرەك.
دەگەنمەن قاراقات دەگەنگە قازاقشا بىلەدى ەكەن دەپ قالماڭىز.
