مەملەكەت باسشىسى قاسىم-جومارت توقاەۆ وزبەكستان رەسپۋبليكاسىنىڭ ولي ءماجىلىسى زاڭ شىعارۋ پالاتاسىنىڭ توراعاسى نۋردينجون يسمويلوۆقا ءىلتيپات بىلدىرە وتىرىپ, ەلدەرىمىز دوستىق پەن تاتۋ كورشىلىككە, ورتاق مادەني قۇندىلىقتارعا نەگىزدەلگەن, مەملەكەتارالىق ىنتىماقتاستىقتىڭ ۇلگىسى بولاتىن بەرىك ءارى ۇيلەسىمدى قاتىناستاردى ورناتقانىن اتاپ ءوتتى.
قازاقستان پرەزيدەنتى وتكەن جىلدىڭ جەلتوقسان ايىندا شاۆكات ميرزيوەۆتىڭ ەلىمىزگە جاساعان مەملەكەتتىك ساپارىن جوعارى باعالادى. سول ساپار قازاق-وزبەك ىنتىماقتاستىعىن وداقتاستىق دەڭگەيىنە كوتەرۋگە نەگىز بولعان.
«وزبەكستان – قازاقستان ءۇشىن باۋىرلاس, سەرىكتەس ەل. سوندىقتان ەكى ەل اراسىنداعى ءوزارا قارىم-قاتىناستاردى دامىتۋعا باسا ءمان بەرەمىز. ءبىزدىڭ وداقتاس قاتىناستارىمىز كەڭ اۋقىمدى جانە ساياسي, ساۋدا-ەكونوميكالىق, مادەني-گۋمانيتارلىق بايلانىستاردى قامتيدى. وسى رەتتە پارلامەنت ديپلوماتياسى ەرەكشە ءرول اتقارادى», دەدى مەملەكەت باسشىسى.
ءوز كەزەگىندە نۋردينجون يسمويلوۆ قاسىم-جومارت توقاەۆقا كەزدەسۋگە ۋاقىت بولگەنى ءۇشىن العىس ءبىلدىرىپ, وزبەكستان پرەزيدەنتىنىڭ ىزگى تىلەگى مەن سالەمىن جەتكىزدى.
