ساۋد ارابياسى مەن گايتي العاش قاتىسىپ جاتىر
قىسقى وليمپيا ويىندارىنىڭ تاريحىنا كوز جۇگىرتسەك, ءار وليمپياداعا قاتىسقان مەملەكەتتەر سانى جاڭا ەلدەرمەن تولىعىپ وتىرادى. ماسەلەن, بيىلعى بەيجىڭدەگى ءتورت جىلدىقتىڭ باستى باسەكەسىنە گايتي مەن ساۋد ارابياسى تۇڭعىش رەت قاتىسىپ جاتىر. تاۋ شاڭعىسى سپورتىنان سىنعا تۇسەتىن ريچاردسون ۆيانا گايتيدى وليمپيادادا لايىقتى تانىستىرۋعا تىرىسىپ كورمەك. ول ەرلەر اراسىنداعى سلالوم گيگانت بويىنشا باق سىنايدى.
تاعى ءبىر تاۋ شاڭعىشىسى فايك ابدي قىسقى وليمپيا ويىندارىندا ساۋد ارابياسىنىڭ اتىنان قاتىسقان العاشقى سپورتشى بولماق. ال ساۋد ارابياسىنىڭ ءوزى قىسقى وليمپياداعا سپورتشىسىن جىبەرگەن پارسى شىعاناعىنداعى العاشقى ەل اتانىپ وتىر.
شلەپەردىڭ شاماسى نەگە جەتەدى؟
تاۋ شاڭعىسى سپورتىنىڭ جانكۇيەرلەرىنە سارا شلەپەردىڭ ەسىمى جاقسى تانىس بولسا كەرەك. ول 1998 جىلدان بەرى قىسقى وليمپيا ويىندارىندا اقش پەن مەكسيكا قۇرامالارىنىڭ اتىنان ونەر كورسەتىپ كەلەدى. 19 اقپاندا 43 جاسقا تولاتىن شلەپەر بەيجىڭدە تاريحي جەتىستىك تىركەپ وتىر. ول تاۋ شاڭعىسى سپورتى بويىنشا قاتارىنان التى وليمپياداعا قاتىسقان ءۇشىنشى جانە العاشقى ايەل سپورتشى اتاندى. بۇعان دەيىن تەك ەكى سپورتشى عانا التى بىردەي وليمپيادادا ونەر كورسەتۋ قۇرمەتىنە يە بولعان ەدى. ولار: مەكسيكالىق تاۋ شاڭعىشىسى حۋبەرتۋس فون گوگەنلوە مەن ليحتەنشتەيندىك ماركو بيۋحەل.
2014 جىلدان باستاپ مەكسيكانىڭ تۋى استىندا جارىستارعا قاتىسا باستاعان شلەپەر مۇنىڭ الدىندا قاتارىنان ءتورت وليمپيادادا اقش نامىسىن قورعاعان بولاتىن. سارا وليمپيا ويىندارىندا تۇڭعىش رەت 1998 جىلعى ناگانو وليمپياداسىندا 19 جاسىندا باق سىنادى.
كەرلينگتەگى التىنشى وليمپيادا
قىسقى وليمپيا ويىندارىندا جانكۇيەرلەر كوپ تۇسىنە بەرمەيتىن بىرنەشە سپورت ءتۇرى بار. سونىڭ ەڭ نەگىزگىسى – 1998 جىلدان بەرى وليمپيادا باعدارلاماسىنا ەنگەن كەرلينگ سپورتى. قىزىعى, سول جىلدان بەرى ءدال قازىرگى وليمپيادا چەمپيونى امەريكالىق دجون شۋستەر مەن نورۆەگ تورگەر نەرگور كەرلينگ بويىنشا بەس وليمپياداعا قاتىسقان العاشقى سپورتشىلار.
الايدا نەرگور ءۇشىن بۇل التىنشى وليمپيادا بولۋى كەرەك ەدى. الايدا ول نورۆەگيا قۇراماسىمەن 2006 جىلعى تۋرين وليمپياداسىنا بارسا دا, سول كۇيى جارىس جولىنا شىققان جوق. بىراق العاشقى سولت-لەيك-سيتي (2002) وليمپياداسىندا-اق التىن جۇلدە جەڭىپ الدى. ۆانكۋۆەردە (2010) نورۆەگيالىقتار شەبەرلىگىمەن عانا ەمەس, ەرەكشە كيىم ۇلگىسىمەن جانكۇيەرلەر نازارىن وزدەرىنە اۋداردى. اسىرەسە ولاردىڭ ءتۇرلى-ءتۇستى شالبارى كوپشىلىكتىڭ قىزىعۋشىلىعىن تۋدىردى. باتىل جاسالعان ديزاين ونسىز دا اسەرلى جارىسقا ودان سايىن كورىك بەرە تۇسكەندەي بولدى.
تاكەۋتي مەن فيشناللەر رەكورد الدىندا
جاپونيالىق توموكا تاكەۋتي مەن يتاليالىق رولاند فيشناللەر سنوۋبورد بويىنشا وليمپيادا جارىستارىنا بيىل التىنشى رەت قاتىسىپ وتىر. سنوۋبوردشىلار اراسىنداعى وليمپيادا رەكوردى كانادالىق دجەسسي-دجەي اندەرسونعا تيەسىلى ەدى. ەندى بۇل تىزىمگە تاكەۋتي قوسىلدى. سونداي-اق ول التى وليمپياداعا قاتىسقان العاشقى جاپون قىزى بولماق. ول سوچي وليمپياداسىندا (2014) پاراللەلدى سلالوم گيگانتتا كۇمىس مەدال يەگەرى اتانىپ, ايەلدەر اراسىنداعى سنوۋبورد بويىنشا جاپونياعا العاشقى وليمپيادا جۇلدەسىن سىيلاعان ەدى.
سكەلەتون شەبەرلەرى
اعالى-ءىنىلى مارتينس جانە توماس دۋكۋرستار مەن امەريكالىق كەتي يۋلەندەر – وليمپيادا تاريحىنداعى ەڭ تاجىريبەلى سكەلەتونشىلار. ولار ءۇشىن بيىلعى بەيجىڭدەگى دودا – بەسىنشى وليمپيا ويىندارى. مارتينس – الەمنىڭ التى دۇركىن چەمپيونى. لاتۆيالىق سپورتشىدان بولەك تاعى ءۇش ادام عانا سكەلەتون بويىنشا ەكى وليمپيادا مەدالىن العان. وليمپيادانىڭ ەكى كۇمىسىنەن (2010, 2014) كەيىن مارتينس بەيجىڭدە التىن الاتىنىنا سەنىمدى. الەمنىڭ ەكس-چەمپيونى كەتي يۋلەندەر ايەلدەر اراسىندا قىسقى وليمپيا ويىندارىنا قاتىسۋى بويىنشا اقش رەكوردىن قايتالايدى.
پەحشتاين توقتاپ قالمايدى
گەرمانيالىق كونكيمەن جۇگىرۋ سپورتىنىڭ وكىلى كلاۋديا پەحشتاين بەيجىڭدەگى ويىنداردا بىرنەشە رەكوردتىڭ مۇرتىن بۇزدى. ول سەگىز قىسقى وليمپيا ويىندارىنا قاتىسقان ەكىنشى سپورتشى اتانىپ, جاپونيالىق نورياكي كاسايدىڭ رەكوردىن قايتالادى. پەحشتاين وليمپيادا جولىن 1992 جىلى البەرۆيلدە باستادى. 49 جاسىندا قىسقى ويىندارداعى جاسى ەڭ ۇلكەن قاتىسۋشى رەتىندە تاريحتا قالدى. بەيجىڭ وليمپياداسىنىڭ جابىلۋ سالتاناتى راسىمىنەن ەكى كۇننەن كەيىن نەمىس سپورتشىسى 50 جاسقا تولادى. پەحشتاين قورجىنىندا كونكيمەن جۇگىرۋ سپورتى بويىنشا توعىز وليمپيادا مەدالى بار: بەس التىن, ەكى كۇمىس جانە ەكى قولا.
شورت-ترەكتەگى رەكوردتار
شورت-ترەكتەن يتاليا قۇراماسىنىڭ وكىلدەرى ارياننا فونتانا مەن يۋري كونفورتولا جانە كانادالىق شارل املەن بەس وليمپياداعا قاتىسقان شورت-ترەكشىلەردىڭ قاتارىنا قوسىلىپ وتىر. بەيجىڭدەگى دوداعا دەيىن تەك ءۇش سپورتشى عانا وسىنداي اتاققا قول جەتكىزگەن ەدى.
فونتانا 2006 جىلعى تۋريندەگى ويىنداردا دەبيۋت جاساپ, ءوزىنىڭ بارلىق ءتورت وليمپياداسىندا دا ەلىنە جۇلدەسىز قايتپاعان. ءوز وتانىندا ول 15 جاس 314 كۇنىندە يتاليا تاريحىنداعى ەڭ جاس وليمپيادا جۇلدەگەرى اتاندى. فونتانا قورجىنىندا شورت-ترەك بويىنشا سەگىز وليمپيادانىڭ جۇلدەسى بار. ول ايگىلى اپولو ونو مەن ۆيكتور اننىڭ رەكوردىن قايتالادى.
بەس دۇركىن وليمپيادا جۇلدەگەرى املەن – كانادا تاريحىنداعى شورت-ترەكشىلەر مارك گانون مەن فرانسۋا-لۋي-ترامبلە جانە مانەرلەپ سىرعاناۋشى سكوتت موير سەكىلدى ەڭ قۇرمەتتى قىسقى وليمپياداشىنىڭ قاتارىندا.
قىستا دا, جازدا دا...
الەمدە قىسقى وليمپيادامەن قاتار, جازعى ويىندارعا دا قاتىسۋ مارتەبەسىنە يە بولعان سپورتشىلار قاتارى كوپ ەمەس. بەيجىڭ وليمپياداسىندا ەكى دوداعا بىردەي قاتىسقان تاعى ءبىر سپورتشى قوسىلدى. ول – بريتانيالىق مونتەلل دۋگلاس. ءبىر تاڭعالارلىعى, ول 2008 جىلى بەيجىڭدەگى جازعى وليمپيادادا جەڭىل اتلەتيكادا جارىس جولىنا شىقسا, اراعا 14 جىل سالىپ بەيجىڭدەگى قىسقى وليمپياداعا قايتا كەلدى. مونتەلل بۇل جولى بوبسلەي سپورتىنان جۇلدەگە تالاسىپ كورەدى. وسىلايشا, مونتەلل دۋگلاس جازعى ويىندارمەن قاتار, قىسقى وليمپياداعا قاتىسقان العاشقى بريتاندىق سپورتشى رەتىندە تاريحقا ەندى.
