بۇل جۇيەنىڭ ارتىقشىلىعى – «التىنالماس» باسشىلىعى ديسپەتچەرلەۋ قىزمەتىنىڭ كومەگىمەن الەمنىڭ كەز كەلگەن ينتەرنەتى بار جەرىنەن وندىرىستەگى ناقتى جاعدايدى بارلىق وندىرىستىك جۇيەلەردەن جيناقتالعان دەرەكتەر ارقىلى كورە الادى. ال ساپانى باقىلاۋ قىزمەتتەرى كاسىپورىن تەحنولوگتارىنا كەندى قايتا وڭدەۋ كەزىندەگى تەحنولوگيالىق ۇدەرىستەردەگى اقاۋ مەن اۋىتقۋلاردى جەدەل انىقتاپ, جويۋعا مۇمكىندىك بەرەدى.
وسىلايشا, التىن وندىرۋدە العى شەپتەگى كومپانيالاردىڭ ءبىرى ZIIoT زاتتار ينتەرنەتى پلاتفورماسىندا ءوندىرىستى باسقارۋ جۇيەسىن ورىستەتىپ وتىر. پلاتفورما مەن ءوندىرىستى باسقارۋ سەرۆيستەرىنىڭ ءبىر بولىگى قاراعاندى وبلىسىنىڭ اقتوعاي اۋدانىنداعى «پۋستىننوە» كەن ورنىندا ەنگىزىلدى. ەندىگى كەزەكتە وندىرىستىك كەستەمەن قاتار ەنەرگەتيكالىق تەڭگەرىمدى وڭتايلاندىرۋ قىزمەتىن دامىتۋ قاراستىرىلىپ جاتىر. بۇل جۇيە «دوليننوە» كەن ورنىنداعى باسقا جوبالارعا دا ەنگىزىلمەك.
جوبانىڭ ءبىرىنشى كەزەڭىندە «پۋستىننوە» كەنىشىندە ZIIoT پلاتفورماسىن ERP, SCADA, پەرسونالدى باسقارۋ, نارياد-تاپسىرمالاردى باقىلاۋ جۇيەلەرىمەن, زەرتحانالىق, تاۋ-كەن-گەولوگيالىق, سول سياقتى التىن شىعارۋ فابريكاسى مەن باعالى مەتالدار ءوندىرۋ زاۋىتىنىڭ باسقا دا اقپاراتتىق جۇيەلەرىمەن ينتەگراتسيالاۋ جۇرگىزىلەدى. وسىلايشا, بىرىڭعاي تسيفرلى قابات قۇرىلادى دا, قايتا وڭدەۋ جونىندەگى وندىرىستىك دەرەكتەر جاڭا پلاتفورماعا جيناقتالىپ بىرىكتىرىلەدى. بۇل دەرەكتەر نەگىزگى پايدالانۋشىلارعا جەدەل رەجىمدە قولجەتىمدى بولادى. بۇدان باسقا, پلاتفورما نەگىزىندە قوسىمشالار جاساۋ ءۇشىن ينفراقۇرىلىم جاسالىپ, دياگنوستيكالىق جۇيە ەنگىزىلمەك.
كەن ورنىندا ءوندىرىستى باسقارۋ ماقساتىندا ديسپەتچەرلەۋدى اۆتوماتتاندىرىپ, ساپانى باقىلاۋ ءۇشىن بىرقاتار قولدانبالار ەنگىزىلدى, زەرتحانالىق ۇدەرىستەر تسيفرلاندىرىلدى جانە مەتالل تەڭگەرىمى بويىنشا بلوك جاساقتالدى.
زەرتحانانى اۆتوماتتاندىرۋ ارقىلى سىنامالاردى ىرىكتەۋ جانە ەسەپتەۋ كەزىندە ادام فاكتورىنىڭ اسەرى قىسقارتىلدى. بۇل جالپى العاندا, زەرتحانالىق سىناقتاردىڭ ساپاسى مەن تيىمدىلىگىن ارتتىردى, ساپا تۋرالى دەرەكتەردىڭ بىرىڭعاي كوزى قۇرىلدى, دەرەكتەردى وندىرۋشىلەرگە دەرەۋ بەرۋ جولعا قويىلدى, ىشكى قۇجات اينالىمى تسيفرلاندىرىلدى جانە ادىستەمەلەر دەڭگەيىندە سىرتقى زەرتحانامەن جىكسىز ينتەگراتسيالاۋ ىسكە اسىرىلدى. «مەتالل تەڭگەرىمى» بلوگى شەڭبەرىندە ماتەريالدىق اعىنداردىڭ سىزباسى مەن مەتالدى وڭدەۋ ۇردىستەرىنىڭ مودەلى جاسالدى, ماتەريالدىق جانە تاۋارلىق بالانستار جيناقتالدى, ساپالىق-تسيفرلى اعىنداردى جيناۋ جانە مەرزىمدى بالانستىق كورسەتكىشتەردى ەسەپتەۋ اۆتوماتتاندىرىلدى, سونداي-اق ەسەپتىك نىساندار تسيفرلاندىرىلدى. بۇل ەسەپكە الۋ كەزىندە شىعىندار مەن قاتەلىكتەردىڭ پايدا بولۋ ورنىن تەز انىقتاۋعا, جوسپاردان تىس شىعىنداردىڭ الدىن الۋعا جانە ماتەريالدىق-تاۋارلىق تەڭگەرىم اراسىنداعى ۇيلەسپەۋشىلىكتى ازايتۋعا مۇمكىندىك بەرەدى.
جوبانىڭ كەلەسى كەزەڭدەرىندە ءوندىرىس كەستەسىن جاساقتاۋ مەن وڭتايلاندىرۋ جانە ەلەكتر ەنەرگياسىن تولاسسىز ەسەپكە الۋ قىزمەتىن ىسكە اسىرۋ, سونداي-اق بىرىڭعاي تسيفرلى پلاتفورمانى دامىتۋدى جالعاستىرۋ جوسپارلانعان. بۇدان ءارى ءوندىرىستى باسقارۋ ءۇشىن ەنگىزىلگەن پلاتفورما مەن قولدانبالى شەشىمدەر «دوليننوە» نىسانىندا جالعاستىرىلادى.
«التىنالماس اك» اق ات جانە كورپوراتيۆتىك دامۋ جونىندەگى ۆيتسە-پرەزيدەنتى جانار امانجولوۆا «تسيفرلى كەنىش» باعدارلاماسى تۋرالى: «بۇل جوبا ءبىزدىڭ كاسىپورىننىڭ دەڭگەيىندە عانا ەمەس, بۇكىل تاۋ-كەن مەتاللۋرگيا سالاسى ءۇشىن دە ماڭىزدى. ءبىز وسى باعدارلاما ارقىلى 20 شاقتى جوبانى ىسكە اسىرىپ وتىرمىز. «تسيفرلى كەنىش» باعدارلاماسى نەگىزىندە جاسالىپ جاتقان پلاتفورما مەن قولدانبالى سەرۆيستەردى ەنگىزۋ – ماڭىزدى جوبالاردىڭ ءبىرى. ول بارلىق نەگىزگى وندىرىستىك ۇدەرىستەردى قامتيدى جانە كەيىنگى بارلىق تسيفرلى باستامالاردى ىسكە اسىرۋعا «وتىن» بولاتىن وندىرىستىك دەرەكتەردى جينايدى», دەيدى.
«تسيفرا» باسقارۋشى ديرەكتورى پاۆەل راستوپشي قولدانبالى تسيفرلى شەشىمدەردى قۇرۋ مەن قولدانىستاعى جۇيەلەرمەن ينتەگراتسيالاۋ مۇمكىندىگى بار ەكەنىن ايتادى. ءوز كەزەگىندە مۇنداي تسيفرلى پلاتفورما ءوندىرىستى باسقارۋدى ايتارلىقتاي جەڭىلدەتەدى, كومپانيالارعا بيزنەس الدىندا تۇرعان مىندەتتەردى تەز ءارى از ەڭبەك شىعىنىمەن شەشۋگە مۇمكىندىك بەرەدى.
ZIIoT پلاتفورماسىنا كوشۋ 2019 جىلى باستالعان «التىنالماس» پەن «تسيفرا» ىنتىماقتاستىعىنىڭ جالعاسى ەكەنىن ايتا كەتكەن ابزال. بۇعان دەيىن «تسيفرا» «التىنالماس» ءۇشىن ەلەكتروندى تسيفرلى قولتاڭبانى پايدالانا وتىرىپ, اۋىسىمدىق تاپسىرمالاردى باسقارۋدىڭ اۆتوماتتاندىرىلعان جۇيەسىن ورىستەتۋدى ىسكە اسىرعان بولاتىن. وسى جۇيەنىڭ كومەگىمەن كاسىپتەرىنە سايكەس قىزمەتكەرلەر اراسىندا تاپسىرما ۇلەستىرۋ مەن اۋىسىم الدىنداعى تەكسەرۋ نەگىزىندە قىزمەتكەرلەردىڭ جۇمىسقا كىرىسۋىن باقىلاۋعا بولادى.
الماتى
